ހުޅުމާލޭގެ ވޯޓާ ތީމް ޕާކު އަލުން ތަރައްޤީކުރަން އެޗްޑީސީން ނިންމައިފި

ހުޅުމާލޭގައި ހަދަން ފަށައި ހުއްޓިފައިވާ ވޯޓާ ތީމް ޕާކު އަލުން ތަރައްޤީކުރުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ނިންމައިފިއެވެ. މި މަޢުލޫމާތު ހާމަކުރެއްވީ ރައްޔިތުންގެ މަޖިލީހުގެ މާލިއްޔަތު ކޮމިޓީގައި ވާހަކަދައްކަވަމުން އެޗްޑީސީގެ މެނޭޖިންގ ޑިރެކްޓަރ އިބްރާހީމް ފަޟުލް ރަޝީދެވެ.

ފަޟުލް ވިދާޅުވި ގޮތުގައި، ވޯޓާ ތީމް ޕާކާއެކު ކުޑަކުދިން ކުޅޭ ސަރަހައްދެއްވެސް ތަރައްޤީކުރުމަށް ވަނީ ނިންމާފައެވެ. މި މަޝްރޫޢުގެ ޕްލޭން ޑިޒައިންކުރުމުގެ މަސައްކަތް މިހާރު ދަނީ ސްރީލަންކާގެ ބަޔަކާއެކު ކުރިއަށެވެ. އަދި މި ވަގުތު އެކަމުގެ އީއައިއޭވެސް ކުރިއަށްދާކަން އޭނާ ފާހަގަކުރެއްވިއެވެ.

"ވޯޓާ ތީމް ޕާކުގެ މައްސަލައަކީ ދުވަސްވީ އަދި ޒަމާންވީ މައްސަލައެއް، ހުޅުމާލޭގެ ބޮޑު ސަރަހައްދެއް އޭގެ ޒާތުގަ، ނުކުރެވި އޮތް ކަމެއް. އަޅުގަނޑުމެން އެބަ މަސައްކަތް ކުރަން އެތަނުގައި ވޯޓާ ތީމް ޕާކަކާއި ކުޑަ ކުދިން ކުޅޭ ވޯކާޓް ފެސިލިޓީ އަދި އެހެނިހެން ވަސީލަތްތައް ގާއިމުކުރުމަށް." އެޗްޑީސީގެ މެނޭޖިންގ ޑިރެކްޓަރ ވިދާޅުވިއެވެ.

ވޯޓަރ ތީމް ޕާކަކީ 2017 ވަނަ އަހަރު، ގާތްގަނޑަކަށް 35 މިލިއަން ޑޮލަރު (385.5 މިލިއަން ރުފިޔާ) ޚަރަދުކޮށްގެން ކުރިއަށްގެންދަން ނިންމި މަޝްރޫޢުއެކެވެ. ނަމަވެސް މަސައްކަތް ކުރިއަށް ނުގޮސް ގިނަ ދުވަސްތަކެއް ވުމުން، އެޗްޑީސީއާއި މަސައްކަތް ޙަވާލުކުރެވުނު ކުންފުންޏާ ދެމެދު ވެފައިވާ އެއްބަސްވުން އުވާލުމަށް އެޗްޑީސީން ވަނީ ނިންމާފައެވެ.

ފަޟުލް ވިދާޅުވި ގޮތުގައި، ކުރިއަށް އޮތް އަހަރެއްހާ ދުވަހުގެތެރޭގައި މި މަސައްކަތް ފަށައި، އެތަނުގައި އެޑްވެންޗާ ޕާކެއް ވީހާވެސް އަވަހަކަށް ތަރައްގީކުރާނެއެވެ. މި މަޝްރޫޢުގައި ސްޕައިރަލް ސްލައިޑްސް، ސްޕީޑް ސްލައިޑްސް، ފެމެލީ ސްލައިޑްސް، ކުޑަކުދިންގެ ޕޫލް، ބަމްޕަރ ބޯޓްސް، ވޯޓަރ ހައުސްތައް، ވޯޓަރ ރޯލާރސް، ވޯޓަރ ގައިރޯ، އަކުއަރ ލޫޕްސް، ފައުންޓެއިން ސްކޮޔަރ އަދި ކޯރެއް ތަރައްޤީކުރުން ހިމެނެއެވެ.