ޚަބަރު
ދުންފަތުގެ އިސްތިޢުމާލު ހުއްޓުވުމަށް 24 ގަޑިއިރުގެ ހޮޓްލައިނެއް ޤާއިމުކޮށްފި

ހޮޓްލައިން ނަންބަރު ފޮޓޯ: ފަރުދުން
ހެލްތު މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި، ދުންފަތުގެ އިސްތިޢުމާލު ހުއްޓުވުމަށް 24 ގަޑިއިރުގެ ހޮޓްލައިނެއް ޤާއިމުކޮށްފައިވާ ކަމަށް ހެލްތު މިނިސްޓަރ އަބްދުﷲ ނާޒިމް އިބްރާހީމް ވަނީ ހާމަކުރައްވާފައެވެ.
މިނިސްޓަރު ވިދާޅުވި ގޮތުގައި، ދުންފަތުގެ މައްސަލަތައް ހައްލުކުރުމަށް ސެސޭޝަންގެ ޚިދުމަތް ފަސޭހައިން ފޯރުކޮށްދިނުމަށްޓަކައި މި "ކުއިޓް ލައިން" ޤާއިމުކޮށްފައިވަނީ ހެލްތު ޕްރޮޓެކްޝަން އޭޖެންސީ (އެޗްޕީއޭ) މެދުވެރިކޮށެވެ. މި ޚިދުމަތް ފެށިގެންދާނީ މިއަހަރުގެ ޑިސެމްބަރު މަހުގެ 8 ވަނަ ދުވަހުން ފެށިގެންނެވެ.
ދުންފަތުގެ އިސްތިޢުމާލު ހުއްޓުވުމަށް އެހީތެރިވުމަށް ޤާއިމުކޮށްފައިވާ މި ހޮޓްލައިންގެ ނަންބަރަކީ 1676 އެވެ. މި ނަންބަރަށް ގުޅައިގެން 24 ގަޑިއިރު ވެސް ޚިދުމަތް ލިބިގެންދާނެ ކަމަށް މިނިސްޓަރު ވަނީ ހާމަކުރައްވާފައެވެ.
މީގެ އިތުރުން، ދުންފަތް ކޮންޓްރޯލް ކުރުމަށް ރާއްޖޭގައި ކުރަންޖެހޭ ހުރިހާ ކަމެއް ރޭވުންތެރިކަމާއެކު ކުރިއަށް ގެންދިއުމަށް 5 އަހަރު ދުވަހުގެ ޕްލޭނެއް ވޯލްޑް ހެލްތު އޯގަނައިޒޭޝަން (ޑަބްލިއު.އެޗް.އޯ) ގެ އެހީތެރިކަމާއެކު ވަނީ ފަށާފައިވާ ކަމަށްވެސް މިނިސްޓަރު ވަނީ ފާހަގަކުރައްވާފައެވެ.
މި ޕްރޮގްރާމްތަކުގެ މަޤްޞަދަކީ ދުންފަތުގެ އިސްތިޢުމާލުން ރައްޔިތުންގެ ޞިއްޙަތަށް ކުރާ ނޭދެވޭ އަސަރުތައް ކުޑަކޮށް، ދުންފަތުގެ އިސްތިޢުމާލު ހުއްޓުވުމަށް ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމެވެ.