ކެފޭ ރެސްޓޯރަންޓްގެ މަނާ ސަރަޙައްދުގައި ދުންފަތުގެ އިސްތިޢުމާލެ ކުރާނަމަ ހުއްދަ ބާތިލުކުރަން ނިންމައިފި

ކެފޭ އަދި ރެސްޓޯރެންޓް ފަދަ ކާބޯތަކެތީގެ ޚިދުމަތްދޭ ތަންތަނުގައި ދުންފަތުގެ އިސްތިއުމާލުކުރަން ހުއްދަ ނޯންނަ ސަރަޙައްދުތަކުގައި އެކަން ކުރާނަމަ، އެ ތަނެއްގެ ވިޔަފާރި ހުއްދަ ބާތިލުކުރެވޭ ގޮތަށް ދުންފަތް ކޮންޓްރޯލްކުރުމުގެ ޤާނޫނު އިޞްލާޙުކުރަން ނިންމާފައިވާ ކަމަށް ހެލްތު މިނިސްޓްރީން މިއަދު ބުނެފިއެވެ.

މިނިސްޓްރީން މިއަދު ބޭއްވި މީޑިއާ ބައްދަލުވުމުގައި ހެލްތު ޕްރޮޓެކްޝަން އެޖެންސީގެ ޑެޕިއުޓީ ޑިރެކްޓަރު ހަސަން މުޙައްމަދު ވިދާޅުވީ، މިހާރު އިޞްލާޙުކުރަން ހުށަހަޅާފައިވާ ޤާނޫނުން އިތުރު ބާރުތަކެއް މިނިސްޓްރީއަށް ލިބިފައިވާތީ، އެކަމަށް ފިޔަވަޅު އަޅައި، އިތުރު ޙައްލުތަކެއް ހޯދޭނެ ކަމަށެވެ.

"އެއީ އެ ތަންތަން ހިންގާ ފަރާތްތައް ޒިންމާ އެބަކުރެވޭ. އެ ވަގުތު އެތަން މެނޭޖުކުރާ މީހުންގެ އިތުރުން ތަނުގެ ވެރިފަރާތް ވެސް ޒިންމާ ކުރެވޭ ގޮތަށް މި ފަހަރުގެ ގާނޫނަށް އެބައިން ބަދަލެއް އައިސްފައި،" އޭނާ ވިދާޅުވިއެވެ.

މަނާ ތަނެއްގައި އަދި ހުއްދައާ ޚިލާފަށް ދުންފަތުގެ އިސްތިއުމާލުކުރުމުން، ޤާނޫނުގައި މިހާރުވެސް ބަޔާންކޮށްފައިވާ ފިޔަވަޅުތަކުގެ އިތުރުން، އެ ތަނަކަށް ދޫކޮށްފައިވާ ވިޔަފާރިކުރުމުގެ ހުއްދަ ވަގުތީ ގޮތުން ހިފެހެއްޓުމަށް ނުވަތަ ބާޠިލުކުރުމަށް ކަމާބެހޭ ފަރާތްތަކަށް ހުށަހެޅުމުގެ ބާރު މިނިސްޓްރީއަށް އާ އިޞްލާޙުން ލިބޭނެ ކަމަށްވެސް ހަސަން ވިދާޅުވިއެވެ.

މީގެ 14 އަހަރު ކުރިން، 2010 ވަނަ އަހަރުގެ އޮގަސްޓް މަހު ޢަމަލުކުރަން ފެށި އެ ޤާނޫނު ބުނާ ގޮތުން، މަނާ ތަނެއްގައި ދުންފަތުގެ އިސްތިއުމާލުކުރާނަމަ 500 ރުފިޔާއިން ޖޫރިމަނާކުރާނެއެވެ. ނަމަވެސް، ފަހަކަށް އައިސް އެކަން ތަންފީޛުކުރެވިފައެއް ނުވެއެވެ.

ހެލްތު މިނިސްޓަރު ޢަބްދުﷲ ނާޒިމް އިބްރާހީމް ވިދާޅުވީ މިއީ އެންމެން ގުޅިގެން ނޫނީ ނުކުރެވޭނެ ކަމެއް ކަމަށެވެ.

ސަރުކާރުން ވަނީ މިދިޔަ މަހުގެ 15 އިން ފެށިގެން ރާއްޖެއަށް ވޭޕް އެތެރެކުރުން މަނާކޮށްފައެވެ. އަދި މި މަހު 15 އިން ފެށިގެން ރާއްޖޭގައި އެ ތަކެތި ބޭނުންކުރުން މަނާވާނެއެވެ. މީގެ އިތުރުން، ސިނގިރޭޓާއި ބީޑީ ފަދަ ދުންފަތުގެ ބާވަތްތަކުން ޑިއުޓީ ވަނީ މިދިޔަ މަހުގެ އެއްވަނަ ދުވަހުން ފެށިގެން ބޮޑުކޮށްފައެވެ.