ކާވާ މެންސް ވޮލީބޯލް ޗެމްޕިއަންޝިޕްގައި ވާދަކުރުމަށް ކްލަބް އެޗްޑީސީއިން ފުރައިފި

ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ)ގެ މެންސް ވޮލީބޯލް ކްލަބް ޗެމްޕިއަންޝިޕްގައި ވާދަކުރުމަށް ކްލަބް އެޗްޑީސީއިން ނޭޕާލަށް ފުރައިފިއެވެ. ނޭޕާލުގެ ކަތުމަންޑޫގައި މި މަހުގެ 7-14 އަށް ބޭއްވުމަށް ހަމަޖެހިފައިވާ މި މުބާރާތުގައި ހަތަރު ގައުމަކުން 5 ޓީމު ކުޅުމަށް ވަނީ ހަމަޖެހިފައެވެ.

ކްލަބް އެޗްޑީސީއަކީ ގައުމީ ޓީމުގެ ގިނަ ކުޅުންތެރިން ވެސް ހިމެނޭ ޓީމެކެވެ. އެގޮތުން ޓީމުގައި ތިބި ފާހަގަކޮށްލެވޭ ކުޅުންތެރިންގެ ތެރޭގައި އިސްމާއިލް ސާޖިދު (ކުޑަކާއްޓެ) އާއި އާދަމް ފައިރޫޒް ހިމެނެއެވެ. މީގެ އިތުރުން ގައުމީ ޓީމުގައި މޮޅު ކުޅުމެއް ދައްކަމުން އަންނަ ޝަމާއިލް ހުސެއިން އާއި ތަޖުރިބާކާރު ކުޅުންތެރިޔާ، މުހައްމަދު އަހުސަން ވެސް މި ޓީމުގައި ހިމެނެއެވެ.

އެޗްޑީސީއިން މި މުބާރާތަށް ފުރިއިރު، އެ ކްލަބުން ވަނީ މި ފަހުން ބޭއްވި އެސޯސިއޭޝަން އޮފް މޯލްޑިވްސް (ވީއޭއެމް)ގެ ފިރިހެން ޑިވިޝަނަށް ބޭއްވި މުބާރާތްތަކުގައި މޮޅު ކުޅުމެއް ދައްކައި ރަގަޅު ނަތީޖާތަކެއް ހޯދާފައެވެ. އެގޮތުން ވޮލީބޯލް އެސޯސިއޭޝަން ކަޕްގެ ޗެމްޕިއަނުންނަކީ ވެސް އެޗްޑީސީއެވެ.

އެޗްޑީސީގެ ކޯޗަކަށް މިވަގުތު ހުރީ ހުސެއިން ޝަރީފް (ނަލަ ހުސެން) އެވެ. އެ ކްލަބުން ވޮލީބޯލް އެސޯސިއޭޝަން ކަޕްގެ ޗެމްޕިއަންކަން ވެސް ހޯދީ އޭނާގެ އިރުޝާދުގެ ދަށުންނެވެ.

މި މުބާރާތުގައި ވާދަކުރާ 5 ޓީމުގެ ތެރެއިން ދެ ޓީމަކީ ނޭޕާލްގެ ޓީމުތަކެވެ. މީގެ އިތުރުން ދެން މި މުބާރާތުގައި ވާދަކުރާނީ ކްލަބް އެޗްޑީސީއާއި، އިންޑިއާގެ ޓީމަކާއި އިރާނުގެ ޓީމެކެވެ.