ޚަބަރު
ކޮންމެ ސަރުކާރަކުން ފަށައިފައިފައި އޮތް މަޝްރޫޢު އެއް ކަމަށްވިޔަސް މިސަރުކާރުން އިޚްތިރާމް ކުރާނެ: ނައިބުރައީސް

ނައިބުރައީސް ހުސެއިން މުޙައްމަދު ލަޠީފް. ފޮޓޯ: ރައީސް އޮފީސް
ކޮންމެ ސަރުކާރަކުން ފަށައިފައިއޮތް މަޝްރޫޢުއެއް ކަމަށްވިޔަސް އެމަޝްރޫޢަކަށް މިސަރުކާރުން އިޚްތިރާމް ކުރާނެ ކަމުގެ ޔަޤީންކަން ނައިބުރައީސް ހުސެއިން މުޙައްމަދު ލަޠީފް ދެއްވައިފިއެވެ.
ނައިބުރައީސް ހުސެއިން މިފަދަ ޔަޤީންކަމެއް ދެއްވައިފައިމިވަނީ އއ އުކުޅަހުގައި ހުޅުވި އެރަށުގެ ފުޓުބޯޅަ ދަނޑު ހުޅުވުމުގެ ރަސްމިއްޔާތު ޝަރުފުވެރިކޮށްދެެއްވައި ދެއްކެވި ވާހަކަފުޅުގައެވެ.
ނައިބުރައީސް ހުސެއިން ވިދާޅުވީ ކޮންމެ ސަރުކާރަކުން ފައްޓައިފައިއޮތް މަޝްރޫޢެއް ކަމަށްވިޔަސް މި ސަރުކާރުން އިޚްތިރާމްކޮށް އެ މަޝްރޫޢެއް ނިންމަވައި ދެއްވާނެ ކަމަށެވެ.
މީގެއިތުރުން އިއްޔެ އުކުޅަހުގައި ހުޅުވި މި ފުޓުބޯޅަ ދަނޑަކީ، މިކަމުގެ ނަމޫނާއަކަށް ފުދޭނެކަމަށް ނައިބުރައީސް ވިދާޅުވިއެވެ. ހަމަމިއާއި އެކު މިގޮތަށް ނުނިމި ހުރި ހުރިހާ ދަނޑުތަކެއް ސަރުކާރުން ނިންމަވައިދޭނެ ކަމަށްެވެސް އެމަނިކުފާނު ވިދާޅުވިއެވެ.
ޒުވާނުންނަކީ މި ޤައުމުގެ ހަކަތަ ކަމަށާއި، ޒުވާނުން ޒުވާނުންގެ ގޮތުގައި މިސަރުކާރުން ބަލައިގަންނާނޭކަމަށްވެސް ނައިބުރައީސް ހުސެއިން ވަނީ ވިދާޅުވެފައެވެ. އަދިހަމަ އެހަކަތައިގައި ވަރު ނެތްކަމުގައިވާނަމަ ދިވެހި ޤައުމު ނުހިނގާނޭކަން ފާހަގަކުރައްވަމުން، ޒުވާނުންގެ އަޑު އަހައިގެން، ޒުވާނުންނަށް ހުރި ކަންކަން ފުރިހަމަކޮށްދެއްވުމަށް މި ސަރުކާރުން އަހަންމިއްޔަތުކަން ދެއްވާކަމުގައި އެމަނިކުފާނު ވިދާޅުވިއެވެ.
ނައިބުރައީސް ހުސެއިން ވަނީ ފުޓްބޯޅަ ދަނޑު ހުޅުއްވައިދެއްވުމުގެ ގޮތުން ، ދަނޑުގެ ސްޓޭޖު ކުރިމަތީގައި ދަމާފައިވާ ރިބަންފަށް ކަނޑުއްވާލައްވާފައެވެ. އަދި ދަނޑު ހުޅުވުމުގެ މުނާސަބަތުގައި ކުޅުނު މެޗުގައި ބޭނުންކުރި ބޯޅައިގައި ނައިބުރައީސް ހުސެއިން މުޙައްމަދު ލަޠީފް ސޮއިކުރައްވާފައިވެއެވެ.
ދަނޑު ހުޅުވުމުގެ މުނާސަބަތުގައި ކުޅުނު މެޗުގައި ވާދަކުރީ، ދިވެހިރާއްޖޭގެ ޤައުމީ ޓީމުގެ ކުރީގެ ކުޅުންތެރިންގެ މައްޗަށް އެކުލަވާލާފައިވާ ލެޖެންޑުންގެ ޓީމަކާއި، އުކުޅަހު ޒުވާނުންގެ ޓީމެކެވެ.
މި ރަސްމިއްޔާތުގައި ކުޅިވަރާ ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު އަދި އއ. އުކުޅަހު ކައުންސިލްގެ ރައީސް ޝައުކަތު އިބްރާހިމްވެސް ބައިވެރިވެވަޑައިގަތެވެ.