ޚަބަރު
އާސަންދަ ސްކީމްގެ ދަށުން އެއްެވެސް ބޭހެއް ކަވަރުކުރުން ހުއްޓައެެއްނުލާ: އާސަންދަ

އާސަންދަ އޮފީސް.ފޮޓޯ:އާސަންދަ
އާސަންދަ ސްކީމްގެ ދަށުން އެއްވެސް ބޭހެއް ކަވަރުކުރުން ހުއްޓައެއް ނުލާނެ ކަމަށް އާސަންދައިން ބުނެފިއެވެ.
އާސަންދައިން ބުނެފައިވަނީ އާސަންދަ ސްކީމްގެ ދަށުން އެއްވެސް ބޭހެއް ކަވަރުކުރުން ހުއްޓާނުލާ ކަމަށާއި ކުރިއެކޭވެސް އެއްގޮތަށް މިހާރުވެސް އާސަންދަ ސްކީމްގެ ދަށުން ބޭހަށް ކަވަރޭޖް ލިބޭނެ ކަމަށެވެ.
މީގެއިތުރުން އާސަންދަ ސްކީމުން ކަވަރުކުރާ ބޭސްތަކާއި އެބޭސްތަކަށް ސްކީމުން ކަވަރުކުރާ މިންވަރު އާސަންދަގެ ވެބްސައިޓުން ފެންނަން ހުންނާނެ ކަމަށް އާސަންދަ ކުންފުނިން ބުނެއެވެ.
އާސަންދައިން މިފަދައިން ބުނެފައިމިވަނީ އާސަންދައަށް ގެނައި ބައެއް ބަދަލުތަކާ ގުޅިގެން ރާއްޖޭގައި އާންމުންކޮށް ބޭނުންކުރާ ބައެއް ބޭސްތައް އާސަންދައިން ކަވަރު ނުކުރާ ކަމަށް ބުނާ ޚަބަރުތަކެއް ފެތުރެމުންދާ ދަނޑިވަޅެއްގައެވެ.
މީގެއިތުރުން އިއްޔެ އާސަންދައިން އެކްސްގައި ކޮށްފައިވާ ޕޯސްޓެއްގައި ބުނެފައިވަނީ އާސަންދަ ސްކީމުން ކަވަރުނުކުރާ ޚިދުމަތަކާ ގުޅިގެން ދޭ ބޭހެއްނަމަ "ނޮޓް ކަވަރޑް" ބޭސް ސިޓީގައި ލިޔެފައި އޮންނާނެ ކަމަށެވެ.
އަދި ސްކީމުން ކަވަރުނުކުރާ ބޭހެއް، ސްކީމްގެ ދަށުން ޚިދުމަަތް ފޯރުކޮށްދޭ ބޭސްފިހާރައަކުން ގަންނަން ޖެހިއްޖެނަމަ "ޝިކާވަތި" ޗެޓްލައިން 7951400 އަށް ވައިބަރ ނުވަތަ ވަޓްސްއެޕް މެސެޖް މެދުވެރިކޮށް ރިޕޯޓުކުރުމަށް އާސަންދައިން ބުނެފައިވެއެވެ.