ޖީޕީއީގެ ބޯޑު ޑިރެކްޓަރުންގެ ބައްދަލުވުމުގައި ތަޢުލީމީ ވަޒީރު ޑރ ޝަފީޢު ބައިވެރިވެވަޑައިގެންފި

ގްލޯބަލް ޕާޓްނަޝިޕް ފޮރ އެޑިޔުކޭޝަންގެ ބޯޑް އޮފް ޑިރެކްޓަރސްގެ ބައްދަލުވުމުގައި ރާއްޖޭގެ ތަޢުލީމީ ވަޒީރު ޑރ އިސްމާޢީލް ޝަފީޢު ބައިވެރިވެ ވަޑައިގެންފިއެވެ.

ވަޒީރު ޝަފީޢު މި ބައްދަލުވުމުގައި ބައިވެރިވެ ވަޑައިގެންނެވީ އޭޝިއާ އަދި ޕެސިފިކް ދާއިރާ ތަމްސީލުކުރައްވާ ބޯޑް މެންބަރުގެ ހައިސިއްޔަތުން ކަަމަށް ތަޢުލީމީ ވުޒާރާއިން ބުނެފައިވެއެވެ.

ޑިސެންބަރު މަހުގެ 3 އިން 5 އަށް ދުބާއީގައި ކުރިއަށްދިޔަ މި ބައްދަލުވުމުގައި ވަޒީރު ޝަފީޢުގެ އަރިހުގައި ސްޓޭޓް މިނިސްޓަރ އަދި ޓެކްނިކަލް އެޑްވައިޒަރ ޑރ އަޙުމަދު މުޙައްމަދު ބައިވެރިވެ ވަޑައިގެންނެވި ކަަމަށް އެވުޒާރައިން ވަނީ ބުނެފައެވެ.

މި ބައްދަލުވުމުގައި ޖީޕީއީގެ ހިންގުމާއި ގުޅުންހުރި ގިނަ ނިންމުންތަކާއި، ކުރިއަށްގެންދިއުމަށް ރާވާ ހަރަކާތްތަކުގެ އިތުރުން، ކުރިއަށް އޮތް 3 އަހަރަށް ލަފާކުރާ ބަޖެޓު ކަނޑައެޅުމަށް ކުރިއަށްގެންދިޔަ މަޝްވަރާތަކުގައި ވަޒީރު ޑރ  ޝަފީޢު ބައިވެރިވެ ވަޑައިގެންނެވިކަމަށްވެސް އެވުޒާރާއިން ބުނެފައިވެއެވެ.

ތަޢުލީމީ ވުޒާރާއިން ބުނެފައިވަނީ ޖީޕީއީ އަކީ ތަރައްޤީވަމުން އަންނަ ޤައުމުތަކުގެ ތަޢުލީމީ ނިޒާމު ކުރިއެރުވުމަށް ހިލޭ އެހީ ދޭ ބައިނަލްއަޤްވާމީ އެންމެ ބޮޑު އެއް ފަންޑުކަމަށެވެ. އަދި  ޖީޕީއީގެ މެންބަރު ޤައުމަކަށް ދިވެހިރާއްޖެ ވީ 2019 ވަނަ އަހަރުގެ ތެރޭގައި ކަަމަށްވެސް އެވުޒާރާއިން ބުނެއެވެ.

އޭގެ ފަހުން ޖީޕީއީ އިން ވަނީ ރާއްޖޭގެ ތަޢުލީމީ ނިޒާމު ކުރިއެރުވުމަށް ގިނަ މަސައްކަތްތަކެއް ކޮށްދެއްވާފައި ކަމަށާއި، އެގޮތުން ޖީޕީއީގެ 9.5 މިލިއަން އެމެރިކާ ޑޮލަރުގެ އެހީއާއެކު ތައުލީމީ ނިޒާމަށް އިންގިލާބީ ހެޔޮ ބަދަލެއް ގެނައުމަށްޓަކައި "ތައިބަ' ގެ ނަމުގައި ތަޢުލީމީ ވުޒާރާގައި ހާއްސަ ޕްރޮޖެކްޓެއް ގާއިމުކުރެވި، އޭގެ މަސައްކަތް ކުރިއަށްދެއެވެ.