ޚަބަރު
ކާނިވާ ސްޓޭޖް ތަޅާލައި އައު ސްޓޭޖެެއް އަޅަނީ

އަލިމަސް ކާނިވާގެ ސްޓޭޖް. ފޮޓޯ: ޕީއެސްއެމް
ކާނިވާ ސަރަހައްދުގައި ހުރި ސްޓޭޖް ތަޅާލައި އައު ސްޓޭޖެއް އަޅަން މާލެ ސިޓީ ކައުންސިލުން ނިންމައިފިއެވެ.
މާލެ ސިޓީ ކައުންސިލުން މިކަން ހާމަކޮށްފައިވަނީ އެކައުންސިލުން ކޮށްފައިވާ އިޢުލާނެއްގައެވެ.
ސިޓީ ކައުންސިލްގެ އިޢުލާނުގައި ބުނެފައިވަނީ ސްޓޭޖް ތަޅާލުމަށް ފަހު، އެތަނުގައި އާ ސްޓޭޖެއް އަޅައިދިނުމުގެ މަސައްކަތް އަމިއްލަ ތަކެތީގައި ކޮށްދޭނެ ފަރާތެއް ހޯދަން ބޭނުންވާ ކަމަށެވެ.
އެހެންވެ، އެ މަސައްކަތްކުރުމަށް ޝައުޤުވެރިވާ ފަރާތްތަކުން ބީލަން ހުށަހެޅުމުގެ ފުރުސަތު މިހާރު ހުޅުވާލާފައިވާ ކަމަށް ވެސް އެ އިޢުލާނުގައި ބުނެފައިވެއެވެ.
އެ މަސައްކަތްކުރުމަށް ޝައުޤުވެރިވާ ފަރާތްތަކުން މި މަހު 16 ގެ ކުރިން ބީލަން ހުށަހަޅަން ޖެހެ އެވެ. ބީލަން ހުޅުވުން ވެސް އޮންނާނީ ހަމަ އެ ދުވަހު، ސިޓީ ކައުންސިލްގެ އިދާރާގަ އެވެ. ބީލަމުގައި ބައިވެރިވެވޭނީ ދިވެހި ކުންފުނި، ޕާޓްނާޝިޕް، ލޯކަލް އިންވެސްޓްމެންޓް އަދި ވިޔަފާރިކުރުމުގެ ހުއްދަ ލިބިފައިވާ ފަރާތްތަކަށް އެކަނި ކަމަށް ސިޓީ ކައުންސިލްގެ އިޢުލާނުގައި ބުނެފައިވެއެވެ.
މި މަސައްކަތާ ހަވާލުވާ ފަރާތުން ކާނިވާގައި މިހާރު ހުރި ސްޓޭޖު ތަޅާލައި ކުނިތައް އުކާލަން ޖެހޭނެ ކަމަށާއި، އައު ސްޓޭޖުގެ ކޮންސެޕްޓް ޑިވެލޮޕްކޮށް، އިންޖީނިއަރިންނާއި ޑްރޯވިންގްސް ތައްޔާރުކޮށް ހުއްދަތައް ހޯދަން ވެސް ޖެހޭނީ އެ ފަރާތުންނެވެ.
އާ ސްޓޭޖުގެ ސްޓްރަކްޗާ ހަދައި ފިނިޝިންގެ ހުރިހާ މަސައްކަތެއް ވެސް ކުރަން ޖެހޭނެ އެވެ. އަދި އެ ސްޓޭޖުގެ އިލެކްޓްރިކް އަދި ޕްލަމްބިންގެ ހުރިހާ މަސައްކަތެއް ވެސް ކޮށްދޭން ޖެހޭނެ އެވެ.
އަލިމަސް ކާނިވަލަކީ މަޖީދިއްޔާ ސްކޫލަށް 75 އަހަރު ފުރުމުގެ މުނާސަބަތުގައި 2004 ވަނަ އަހަރު ސަރުކާރުން ހުޅުވި ތަނެކެވެ.