ގޯލްޑް ކަޕް: ދެވަނަ ބުރުގެ ފަހު ދެ ޖާގަ ކަށަވަރުވާނީ މިއަދު

ގްރޫޕް-އޭގެ ދެވަނަ އަދި ތިންވަނަ ހޯދައިގެން ނައިންޓީ ޕްލަސް ގޯލްޑް ކަޕްގެ ދެވަނަ ބުރަށް ދަތުރުކުރާ ފަހު ދެ ޓީމު މިއަދު ހަވީރާއި ރޭގަނޑު ކުޅޭ މެޗުތަކުން ޔަގީންވާނެއެވެ. މި ފުރުސަތު އޮތީ ދިއްދޫ، މީދޫ އަދި ކުޑަހުވަދޫއަށެވެ. 

މި ގްރޫޕްގައި ފަސް ޓީމު ހިމެނޭއިރު، ގްރޫޕްގެ އެއްވަނަ ޔަގީންކޮށްފައިވަނީ، ކުޅުނު ހުރިހާ މެޗެއް ކާމިޔާބުކޮށް ފުވައްމުލަކު ސިޓީއެވެ. އެއީ މި މުބާރާތުގައި އެންމެ ވަރުގަދަކޮށް ފެންނަ އެއް ޓީމު ވެސް މެއެވެ. އެ ޓީމު ގްރޫޕްގެ އެއްވަނައިގައި އޮތީ 12 ޕޮއިންޓާއެކުއެވެ. ގްރޫޕްގެ ދެވަނައިގައި ދިއްދޫ އޮތީ ހަތަރު ޕޮއިންޓާއެކުއެވެ. ނަމަވެސް ހަމަ މިއަދަދަށް ޕޮއިންޓު ލިބިފައިވާ މީދޫ ތިންވަނައިގައި އޮތީ 1- ގޯލާއެކުއެވެ. އަދި ތިންވަނައިގައި އޮތް ކުޑަހުވަދޫއަށް ލިބިފައިވަނީ ތިން ޕޮއިންޓެވެ.

ގްރޫޕް-އޭ އިން ދެވަނަ ބުރުގެ ޖާގައެއް ހޯދުމުގެ އުންމީދުގައި މިއަދު ހަވީރު ނިކުންނާނީ ކުޑަހުވަދޫ އާއި މީދޫއެވެ. މި މެޗުން މީދޫ މޮޅުވެއްޖެނަމަ، ނުވަތަ މެޗު އެއްވަރުވެއްޖެނަމަ ކުޑަހުވަދޫ މުބާރާތުން އަލްވަދާއު ކިޔަން ޖެހޭނެއެވެ. އަދި އޭރުން ދިއްދޫއަށް ޓީމުގެ ފަހު މެޗު ނުކުޅެނީސް ދެވަނަ ބުރުގެ ޖާގައެއް ޔަގީން ވާނެއެވެ. އެހެންކަމުން ކުޑަހުވަދޫއަށް މިއީ ފައިނަލް މެޗެކެވެ. އަނެއްކޮޅުން މި މެޗުން މީދޫ ބަލިވެއްޖެނަމަ، އެ ޓީމަށް ވެސް މުބާރާތާއި އަލްވަދާއު ކިޔަން ޖެހޭނެއެވެ.

މީދޫ ވަނީ ބުރާސްފައި ދުވަހު ދިއްދޫއާ ދެކޮޅަށް ކުޅުނު މެޗުގައި ދެވަނަ ބުރާއި ވަރަށް ކައިރިއަށް ޖެހިލާފައެވެ. އެ ޓީމު 2-1 ގެ ލީޑެއްގައި މެޗު ނިންމާލަން ދަނިކޮށް، މެޗު ނިމެން 12 މިނެޓަށް ވެފައި އޮއްވައި، ދިއްދޫގެ އާދަމް ނަސީހު ވަނީ މެޗުގެ ނަތީޖާ ހަމަހަމަކޮށްފައެވެ. މި މެޗުގައި މޮޅު ކުޅުމެއް ދައްކާފައިވަނީ، ޒުވާން ގައުމީ ޓީމާއި ޓީސީ ސްޕޯޓްސް ކްލަބަށް ކުޅެފައިވާ އިބްރާހިމް އިމްރާނެވެ. އެ މެޗުގައި މީދޫއިން ކާމިޔާބުކުރި ދެ ގޯލަކީ ވެސް އޭނާ ކާމިޔާބުކުރި ދެ ގޯލެވެ. 

މުބާރާތުގެ ދެވަނަ ބުރުގެ މެޗުތައް ފެށުމަށް ހަމަޖެހިފައިވަނީ އަންނަ ހޯމަ ދުވަހުއެވެ. ދެވަނަ ބުރުގެ ފުރަތަމަ މެޗުގައި އެ ދުވަހުގެ ހަވީރު ބައްދަލުކުރާނީ ފުވައްމުލަކު ސިޓީއާއި ތިމަރަފުއްޓެވެ.

ދެވަނަ ބުރުން ފަހަނައަޅާ މުބާރާތުގެ ކުއާޓާ ފައިނަލަށް ދަތުރުކުރާނީ ކޮންމެ ގްރޫޕަކުން ދެ ޓީމެވެ. ކުއާޓާ ފައިނަލްގެ މެޗުތައް 17 އަދި 18 ޑިސެންބަރުގައި ކުޅުމަށް ހަމަޖެހިފައިވާއިރު، މުބާރާތުގެ ފައިނަލް ކުޅޭނީ 22 ޑިސެންބަރުގައެވެ.