ޖަލުގައި ހުންނެވި އިމްރާން ޚާން އަންނަ ހަފުތާގައި މުޒާހަރާއެއް ބޭއްވުމަށް ގޮވާލައްވައިފި

ޕާކިސްތާނުގެ ކުރީގެ ބޮޑުވަޒީރު އިމްރާން ޚާން، އަންނަ ހަފުތާގައި މުޒާހަރާއެއް ބޭއްވުމަށް ގޮވާލައްވައިފިއެވެ. 2023ވަނަ އަހަރުގެ ޖުލައި މަހުން ފެށިގެން ޖަލުގައި ހުންނެވި ޚާން މިކަމަށް ގޮވާލައްވާފައިވަނީ އެ ޤައުމުގެ ވެރިރަށް އިސްލާމްއާބާދުގައި އޭނާގެ ސިޔާސީ ޕާޓީން އެއްވުންތަކެއް ބާއްވައި ބޮޑެތި ހަމަނުޖެހުންތަކެއް ހިންގިތާ ދުވަސްކޮޅެއް ފަހުންނެވެ.

އެކްސްގައި ކުރެއްވި ޕޯސްޓެއްގައި ޚާންވަނީ އޭނާގެ ޕާޓީ، ޕާކިސްތާން ތަހްރީކް އިންސާފް (ޕީޓީއައި)ން ވެރިކަންކުރާ ޚައިބަރު ޕަޚްތުންޚްވާ ޕްރޮވިންސުގެ ވެރިރަށް ޕެޝާވަރަށް އޭނާއަށް ތާޢީދުކުރާ ފަރާތްތައް ޑިސެމްބަރު މަހުގެ 14ވަނަ ދުވަހު ޖަމާވުމަށް އެދިވަޑައިގެންފައެވެ.

އިސްލާމްއާބާދުގައި ނޮވެމްބަރު މަހުގެ 25ވަނަ ދުވަހު ހިންގި ހަމަނުޖެހުންތަކުގައި 12އަށްވުރެ ގިނަ މީހުން މަރުވިކަމަށް ބުނެ، އެ ހާދިސާގެ މައްޗަށް ޝަރުޢީ ތަޙުޤީޤެއް ހިންގަންޖެހޭކަމަށް ޚާން ވިދާޅުވިއެވެ. އަދި މިދިޔަ އަހަރުގެ މެއި މަހުގެ 9ވަނަ ދުވަހު ހިންގި ހަމަނުޖެހުންތަކުގައި 8 މީހުން މަރުވި މައްސަލަ ވެސް ބަލަންޖެހޭ ކަމަށާއި، ހައްޔަރުކޮށްފައިވާ ހުރިހާ ސިޔާސީ މަސައްކަތްތެރިން މިނިވަން ކުރަންޖެހޭ ކަމަށް އޭނާ ވިދާޅުވިއެވެ.

"މި ކަންތައްތައް މިގޮތަށް ކުރިއަށް ނުގެންދާނަމަ ޑިސެމްބަރު މަހުގެ 14ވަނަ ދުވަހު މަދަނީ ބަސްނޭހުމުގެ ޙަރަކާތެއް ފަށާނަން. އޭގެ ސަބަބުން ނިކުންނަ ކޮންމެ ނަތީޖާއެއްގެ ޒިންމާ އުފުލަންޖެހޭނީ ސަރުކާރުން،" ޚާން ވިދާޅުވިއެވެ.

ނޮވެމްބަރު 25ވަނަ ދުވަހު ބޭއްވި ހިނގާލުމުގައި މީހަކު މަރުވިކަން ޕާކިސްތާނުގެ ސަރުކާރުން ދޮގުކުރެއެވެ. އަދި މިދިޔަ އަހަރުގެ މެއި މަހުގެ 9ވަނަ ދުވަހު ޚާނަށް ތާޢީދުކުރާ މީހުން އަސްކަރީ މަޤާމުތަކަށް ޙަމަލާ ދިންކަމަށް ސަރުކާރުން ބުނެއެވެ.

މެއި 9ގެ ޙަމަލާތައް ރާވައި ހިންގުމަށް އިރުޝާދު ދިން ކަމުގެ ތުހުމަތުގައި ޚާންގެ މައްޗަށް ވަނީ ދަޢުވާކޮށްފައެވެ. އޭނާވަނީ އެ ތުހުމަތުތަކަށް އިންކާރުކުރައްވާފައެވެ. ޚާންގެ ޕާޓީން ބުނީ މި ދައުވާތަކަކީ 2022ވަނަ އަހަރު ޚާންގެ ވެރިކަމުން ވައްޓާލުމުގެ ކުރިން، އަސްކަރިއްޔާގެ ވެރިންނާ އޭނާ ދެބަސްވެވަޑައިގަނެފައިވާތީ ސިޔާސީ މައިދާނުން އޭނާ އެއްކިބާކުރުމަށް ކުރާ މަސައްކަތްތަކެއް ކަމަށެވެ.