އދ. ކުނބުރުދޫގައި ފެނުގެ ރައްކާތެރި ނިޒާމެއް ޤާއިމްކޮށް ނިމިއްޖެ

އދ. ކުނބުރުދޫގެ ފެނުގެ ނިޒާމް ޤާއިމްކުރުމުގެ މަސައްކަތް މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) އިން ނިންމާލައިފިއެވެ. މި މަޝްރޫޢުގެ ދަށުން ރައްޔިތުންނަށް ރައްކާތެރި ބޯފެން ލިބޭނެ ނިޒާމެއް ޤާއިމްކުރެވިފައިވެއެވެ.

2021 ވަނަ އަހަރުގެ ޑިސެމްބަރު މަހު ރަސްމީކޮށް އިފްތިތާހުކުރެވުނު މި މަޝްރޫޢަކީ ސަރުކާރުގެ ބަޖެޓުން 45 މިލިއަން ރުފިޔާ ޚަރަދުކޮށްގެން ހިންގުނު މަޝްރޫޢެކެވެ. މި މަޝްރޫޢުގެ ދަށުން ކުނބުރުދޫގައި 2.75 ކިލޯމީޓަރުގެ ފެން ހޮޅީގެ މައި ނެޓްވޯކެއް އަޅާފައިވެއެވެ. މީގެ އިތުރުން، އާރުއޯ ފެސިލިޓީ ބިލްޑިންގ އިމާރާތްކުރުމާއި، ފެން އުފެއްދުމަށް ދެ އާރުއޯ ޕްލާންޓް ބެހެއްޓުމާއި، ފެން ރައްކާކުރުމަށް ތިން ތާނގި ބެހެއްޓުމުގެ އިތުރުން ގޭގޭގައި ފެން މީޓަރު ބަހައްޓައި ފެނުގެ ކަނެކްޝަން ގުޅައިދީފައިވެއެވެ.

އެމްޑަބްލިއުއެސްސީގެ މެނޭޖިންގ ޑިރެކްޓަރ އަބްދުލް މަތީން މުޙައްމަދު ވިދާޅުވި ގޮތުގައި، މި މަޝްރޫޢު ނިމިގެން ދިޔައީ ވަރަށް ގިނަ ބައެއްގެ ބުރަ އަދި މިންނެތް މަސައްކަތުންނެވެ. މި މަޝްރޫޢު ނިމުމާއެކު، ކުނބުރުދޫގެ ރައްޔިތުންނަށް މިހާތަނަށް ފެނުގެ ރައްކާތެރި ނިޒާމެއް ނެތުމުގެ ސަބަބުން ކުރިމަތިވަމުން އައި ތަކުލީފަށް ލުޔެއް ލިބިގެންދާނެއެވެ.

ސަރުކާރުން އަތޮޅުތަކުގެ ތަރައްޤީގެ ދުވެލި ކުރިއަށް ޖެއްސުމަށް މަސައްކަތްކުރަމުންދާއިރު، އާބާދީގެ ކުޑަބޮޑުމިނަކަށް ބެލުމެއްނެތި ތަރައްޤީގެ މަޝްރޫޢުތައް އަތޮޅުތަކުގައި ހިންގުމަކީ ސަރުކާރުގެ އަމާޒެކެވެ. މި މަޝްރޫޢަކީ މި އަމާޒާ އެއްގޮތަށް ކުރިއަށްގެންދެވުނު މަޝްރޫޢެއްކަން ފާހަގަކުރެވެއެވެ.

އދ.ކުނބުރުދޫގައި ފެނުގެ ނިޒާމު ޤާއިމުކޮށްނިމި ރައްޔިތުންނަށް ރައްކާތެރި ފެނުގެ ޚިދުމަތް ކަށަވަރުވެގެން މިދިޔައީ ވަަރަށް ގިނަބައެއްގެ ބުރަ އަދި މިންނެތް މަސައްކަތުން. އެކަމަށްޓަކައި މި މަސައްކަތް ކާމިޔާބު ކަމާއެކު ނިންމާލުމުގައި އެކި ގޮތްގޮތުންނާ އެކި ހައިސިއްޔަތުން ބައިވެރިވި… pic.twitter.com/8K5noFW1wr

— Abdul Matheen (@amathyn) December 6, 2024