ރަސްފަންނު މޫދުން ނުރައްކާތެރި ކޯން ސްނެއިލް ފެންނަމުންދާތީ ސަމާލުވުމަށް އިލްތިމާސްކޮށްފި

ރަސްފަންނު މޫދުން މި ދުވަސްވަރު ނުރައްކާތެރި ކޯން ސްނެއިލް ފެންނަމުންދާ ކަމަށް ބުނެ އެ ކަމަށް ސަމާލުވާން ރާއްޖޭގެ ތިމާވެށި ހިމާޔަތްކުރުމަށް މަސައްކަތްކުރާ ޖަމިއްޔާއެއް ކަމަށްވާ އޯޝެނޯހޯލިކް މޯލްޑިވްސް އިން އެދިއްޖެއެވެ.

އޯޝެނޯހޯލިކް މޯލްޑިވްސް އިން މިއަދު ކޮށްފައިވާ ޕޯސްޓެއްގައި ބުނެފައިވަނީ، މި ދުވަސްވަރު ރަސްފަންނުން ނުރައްކާތެރި ކޯން ސްނެއިލް ފެންނަމުންދާ ކަމަށެވެ. މި ޖަމިއްޔާއިން މަޢުލޫމާތު ދީފައިވާ ގޮތުގައި މި ނުރައްކާތެރި ދިރޭ ތަކެތި އާންމުކޮށް ފެންމައްޗަށް އަރަނީ އިރުއޮއްސޭ ވަގުތުގައެވެ. އެހެންކަމުން، ހަވީރާއި ރޭގަނޑު އެ ސަރަހައްދަށް މޫދަށް އެރެން ދާނަމަ ސަމާލުވުމަށް އެ ޖަމިއްޔާއިން އިލްތިމާސްކޮށްފައިވެއެވެ.

ޚާއްޞަކޮށް ކުޑަކުދިން ރަސްފަންނު މޫދަށް އެރުވާއިރު، މޫދަށް އަރާ ކަހަލަ ފައިވާން އެޅުމަށާއި ހުސްފަޔާ މޫދަށް ނޭރުމަށް އޯޝެނޯހޯލިކް މޯލްޑިވްސް އިން ވަނީ އާންމުންނަށް އިލްތިމާސްކޮށްފައެވެ.

ދުނިޔޭގެ އެކި ކަންކޮޅުތަކުގައި 600 އަށްވުރެ ގިނަ ވައްތަރުގެ ކޯން ސްނެއިލް އުޅޭއިރު، މިއީ އާންމުކޮށް އިންސާނުންނަށް ހަމަލަދޭ އެއްޗެކެވެ. ކޯން ސްނެއިލްއަކީ ވަރަށް ވިހަގަދަ އެއްޗެއް ކަމަށާއި، އޭގެ ވިހައިގައި ޖެހި އިންސާނުން މަރުވުން އެކަށީގެންވާ ކަމަށް ވެސް އޯޝެނޯހޯލިކް މޯލްޑިވްސް އިން ވަނީ ހާމަކޮށްފައެވެ.

ކޯން ސްނެއިލްގެ ވިހައަކީ އެކި ވިހަ މާއްދާތައް ހިމެނޭ ކޮނޯޓޮކްސިންއެއް ކަމަށާއި، އޭގެ އަސަރުކޮށްފިނަމަ ނާރުގެ އެކި މައްސަލަތައް ދިމާވެދާނެ ކަމަށް ކަނޑުގެ ދިރުންތަކާ ގުޅޭ މަޢުލޫމާތު ހާމަކުރާ އެކުއާ މެޑްއިން ބުނެފައިވެއެވެ. އަދި މީގެ ސަބަބުން ޕެރަލައިޒްވުން ފަދަ ނުރައްކާތެރި ހާލަތްތައް ވެސް ކުރިމަތިވެދާނެ ކަމަށް އެ ފަރާތުން ވަނީ އިންޒާރުދީފައެވެ.

މި ނުރައްކާތެރި ހާލަތާ ގުޅިގެން، އާންމުން ވީހާވެސް ބޮޑަށް ސަމާލުވެ، ރަސްފަންނު ސަރަހައްދުގެ މޫދަށް އެރުމުގައި ފަރުވާތެރިވުމަށް އޯޝެނޯހޯލިކް މޯލްޑިވްސް އިން ގޮވާލައިފައިވެއެވެ.