މާލޭ އާޓިފިޝަލް ބީޗުގައި ހިނގި މާރާމާރީގައި ބައިވެރިވި ބިދޭސީންނާމެދު ފިޔަވަޅު އަޅަން އިމިގްރޭޝަނުން ނިންމައިފި

އިއްޔެގެ އިރުއޮއްސުނު ވަގުތު މާލޭ އާޓިފިޝަލް ބީޗުގައި ހިނގި މާރާމާރީއެއްގައި ބައިވެރިވި ބިދޭސީންނާމެދު ފިޔަވަޅު އަޅާނެކަމަށް އިމިގްރޭޝަންގެ ކޮންޓްރޯލާ ޖެނެރަލް ޝައްމާން ވަހީދު  ވިދާޅުވެއްޖެއެވެ.

ފުލުހުންގެ މަޢުލޫމާތު ދެއްވާފައިވާ ގޮތުގައި އިއްޔެ 18:22 ހާއިރު އާޓިފިޝަލް ބީޗު ސަރަހައްދުގައި ބަޔަކު މާރާމާރީ ހިންގި މައްސަލައެއް ރިޕޯޓުކޮށްފައިވެއެވެ. މި ހާދިސާއާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާ ކަމަށާއި، މާރާމާރީއާ ގުޅޭގޮތުން ބަލަންޖެހޭ ކަންކަން ބަލަމުން އަންނަ ކަމަށް ފުލުހުން ބުނެފައިވެއެވެ.

މި މައްސަލައާ ގުޅޭގޮތުން ކޮންޓްރޯލާ ޖެނެރަލް ޝައްމާން ވަހީދު ވިދާޅުވެފައިވަނީ، އާޓިފިޝަލް ބީޗުގައި މާރާމާރީ ހިންގައި، އާންމު މަސްލަހަތު ނަގާލުމުގައި ބައިވެރިވެފައިވާ ބިދޭސީންގެ މައްސަލަ އިމިގްރޭޝަންގެ ޓާސްކްފޯހުން ބަލަމުން އަންނަ ކަމަށެވެ. އަދި މި ކަމުގައި ޝާމިލުވާ ބިދޭސީންނާމެދު ފިޔަވަޅު އަޅާނެކަމުގެ ޔަގީންކަން ވެސް އޭނާ ވަނީ ދެއްވާފައެވެ.

މި މާރާމާރީއާ ގުޅުންހުރި ވީޑިއޯއެއް ސޯޝަލް މީޑިއާގައި ދައުރުވެފައިވެއެވެ. އެ ވީޑިއޯގައި ފެންނަނީ ގިނަ އަދަދެއްގެ މީހުން އެއްވެ އަޑުގަދަކުރާ މަންޒަރާއި، އެކަން ހުއްޓުވަން އެހެން ބަޔަކު މަސައްކަތްކުރާ މަންޒަރެވެ. އަދި އެ ސަރަހައްދުގައި ގިނަ އަދަދެއްގެ މީހުން ހަރަކާތްތެރިވާ މަންޒަރުވެސް ވީޑިއޯއިން ފެންނަން ހުއްޓެވެ.އަދި މިހާދިސާގައި ދިވެހި ކުޑަކުއްޖަކަށް އަނިޔާވީ ކަމަށާއި އެމީހުން ބަނގުރާ ބޭނުންކޮށްގެން މަސްތުގެ ޙާލަތުގައިތިބި  ކަމަށް ބުނެ މީޑިއާގައި އާންމުން ވަނީ ކަންބޮޑުވުން ފާޅުކޮށްފައެވެ.