ރާއްޖެ އިޝްތިހާރުކުރުމަށް އަޒަރުބައިޖާނާއި ޖޯޖިއާގައި ރޯޑްޝޯއެއް ބާއްވަނީ

ނެޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން (އެންއެޗްޖީއޭއެމް)، މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) އަދި މޯލްޑިވްސް އެސޯސިއޭޝަން އޮފް ޓްރެވެލް އޭޖެންޓްސް އެންޑް ޓުއާ އޮޕަރޭޓާސް (މަޓާޓޯ) ގުޅިގެން އަޒަރުބައިޖާނާއި ޖޯޖިއާގައި ރާއްޖެ އިޝްތިހާރުކުރުމަށް ރޯޑްޝޯއެއް ބޭއްވުމަށް ތައްޔާރުވެއްޖެއެވެ.

ގެސްޓްހައުސް އެސޯސިއޭޝަނުން ނެރުނު ބަޔާނެއްގައި ބުނެފައިވާ ގޮތުގައި، "އައި އެމް މޯލްޑިވްސް ރޯޑްޝޯ" ގެ ނަމުގައި މި ހަރަކާތްތައް ބޭއްވުމަށް ހަމަޖެހިފައިވަނީ މި މަހުގެ 17 އިން 20 އަށް އަޒަރުބައިޖާނުގެ ބާކޫގައި އާއި ޖޯޖިއާގެ ތިބިލީސީގައެވެ. މި ރޯޑްޝޯގެ މައިގަނޑު މަޤްޞަދަކީ ރާއްޖެއަކީ ފަތުރުވެރިކަމުގެ މަންޒިލެއްގެ ގޮތުގައި އެ ސަރަޙައްދުގައި އިޝްތިހާރުކުރުމެވެ.

މި ހަރަކާތުގައި ރާއްޖޭގެ ރިސޯޓުތަކާއި، ހޮޓާތަކާއި، ގެސްޓްހައުސްތަކާއި އަދި ޓްރެވެލް އޭޖެންސީތައް ހިމެނޭ ގޮތަށް 18 ފަރާތަކުން ބައިވެރިވާނެއެވެ. މި ފަރާތްތަކުން ބޭރުގެ ވިޔަފާރިތަކާ ގުޅުން ބަދަހިކޮށް، އެ ފަރާތްތަކުން ފޯރުކޮށްދޭ ޚިދުމަތްތަކުގެ މަޢުލޫމާތު ހިއްސާކުރާނެއެވެ. އަދި އެ ދެ ޤައުމުގެ މާކެޓާ ގުޅޭ މަޢުލޫމާތު ހޯދާނެ ކަމަށްވެސް ގެސްޓްހައުސް އެސޯސިއޭޝަނުން ބުނެފައިވެއެވެ.

ގެސްޓްހައުސް އެސޯސިއޭޝަންގެ ރައީސް އަބްދުﷲ ނަޝީދު ވިދާޅުވެފައިވަނީ މިއީ ރާއްޖޭގައި ކުރިއަރަމުން އަންނަ މާކެޓްތަކުގައި ލޯކަލް ޓޫރިޒަމް ޕްރޮމޯޓް ކުރުމަށް އެޅޭ މުހިންމު ފިޔަވަޅެއް ކަމަށެވެ. އޭނާ އިތުރަށް ވިދާޅުވީ މި ހަރަކާތުގެ މަޤްޞަދަކީ ގެސްޓްހައުސް އޮޕަރޭޓަރުންނާއި ލޯކަލް ޓޫރިޒަމް ވިޔަފާރިތައް މި މާކެޓުތަކާ ގުޅުވައި، މެންބަރުންގެ ވިޔަފާރިތައް ދެމެހެއްޓެނިވި ގޮތެއްގައި ކުރިއެރުވުމުގެ ފުރުޞަތުތައް ހޯދައިދިނުން ކަމަށެވެ.

މި ރޯޑްޝޯގައި، ޖޯޖިއާއާއި އަޒަރުބައިޖާނާއި ރާއްޖެ ގުޅުވައިދޭ ދަތުރުތަކާ ގުޅޭ މަޢުލޫމާތުވެސް ފޯރުކޮށްދޭނެއެވެ. އަދި ބައިވެރިންގެ މެދުގައި ގުރުއަތުލައި، މި އިންޑަސްޓްރީގައި ހިމެނޭ ފަރާތްތަކުން ފޯރުކޮށްދޭ ހޮލިޑޭ ޕެކޭޖްތައް 40 މީހަކަށް ލިބޭނެއެވެ. މި ރޯޑްޝޯގެ ޓްރެވެލް ޕާޓްނަރަކީ އެއާ އަރަބިއާއެވެ.

މީގެ އިތުރުން، އަޒަރުބައިޖާންގައި ރާއްޖެ އިޝްތިހާރުކުރުމުގެ ގޮތުން އެމްއެމްޕީއާރުސީން އަޒަރުބައިޖާން އެއާލައިންސްއާ ގުޅިގެން ޚާއްޞަ ދަތުރެއް ރާވާފައިވެއެވެ. މި ދަތުރުގައި މީޑިއާ އަދި ސޯޝަލް މީޑިއާ ޝަޚްޞިއްޔަތުތައް ބައިވެރިވާނެއެވެ.