ޚަބަރު
މޫސުމަށް އަންނަ ބަދަލުތަކުގެ މައްސަލައިގައި އައިސީޖޭގައި ރާއްޖެއިން ބަޔާނެއް ދީފި

ބަންޑާރަ ނައިބު އަހުމަދު އުޝާމް ފޮޓޯ: ކޯޕަރޭޓް މޯލްޑިވްސް
މޫސުމަށް އަންނަ ބަދަލުތަކުގެ މައްސަލައިގައި ގައުމުތަކުގެ މަސްއޫލިއްޔަތުތަކާ ގުޅޭގޮތުން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގެ އިސްތިޝާރީ ލަފަޔަކަށް އެދި އދ. ގެ ޢާންމު މަޖިލީހުން ހުށަހަޅާފައިވާ މައްސަލައިގައި މިއަދު އެ ކޯޓުގައި ބޭއްވުނު އަޑުއެހުމުގައި ރާއްޖެއިން ބައިވެރިވެ، ބަޔާނެއް ދީފިއެވެ.
މި އަޑުއެހުމުގައި ރާއްޖެ ތަމްސީލު ކުރެއްވީ ބަންޑާރަނައިބު އަޙްމަދު އުޝާމެވެ. އޭނާ ދެއްވި ބަޔާނުގައި، މޫސުމަށް އަންނަ ބަދަލުތަކުގެ މައްސަލައިގައި ކެނޑިނޭޅި ވަކާލާތު ކުރެއްވުމުގައި ރައީސް ޑރ. މުޙައްމަދު މުޢިއްޒުގެ އިސްނެންގެވުން ފާހަގަކުރެއްވިއެވެ.
ބަންޑާރަނައިބު އުޝާމް އޭގެ އިތުރުން ވިދާޅުވީ، މޫސުމަށް އަންނަ ބަދަލުތަކުގެ ސަބަބުން ދިގު މުއްދަތެއްގެ ތެރޭގައި ކުރާ އަސަރުތަކަށް ރާއްޖެ ނާޒުކުކަމާއި، އެ އަސަރުތަކުގެ ސަބަބުން ދިވެހި ރައްޔިތުން ދިރިއުޅެމުންދާ ރަށް ބަދަލު ކުރަން ޖެހުމަކީ ސަރުކާރުން ދެކޮޅު ހަދާ ކަމެއް ކަމަށެވެ. އަދި ރާއްޖެ ފަދަ ނާޒުކު ގައުމުތަކަށް ބައިނަލްއަގުވާމީ މުޖުތަމަޢުއިން އެހީ ފޯރުކޮށްދެއްވުމަށް ވެސް އޭނާ ގޮވާލެއްވިއެވެ.
މި އަޑުއެހުމުގައި ރާއްޖެ ތަމްސީލުކުރެއްވި ބައިނަލްއަޤްވާމީ ވަކީލުން ހުށަހެޅުއްވި ބަޔާންތަކުގައި، ތިމާވެއްޓާ ބެހޭ ބައިނަލްއަގުވާމީ ޤާނޫނުތަކުގެ ދަށުން ރާއްޖެފަދަ ތަރައްގީވަމުން އަންނަ ގައުމުތަކަށް އެހީތެރިކަން ފޯރުކޮށްދިނުމަށް އޮންނަ ޒިންމާއަށް އަލިއަޅުއްވާލައްވާފައިވެއެވެ. އަދި ކަސްޓަމަރީ އިންޓަނޭޝަނަލް ލޯގެ ދަށުން ޤައުމުތަކަށް އެއްބާރުލުން ދިނުމަށް އޮންނަ ޒިންމާއެއް ކަމާއި، މޫސުމީ ބަދަލުތަކުން ކުރާ އަސަރުތަކުން އަރައިގަތުމަށް ތަރައްޤީވަމުން އަންނަ ކުދި ޖަޒީރާ ޤައުމުތަކަށް އެހީ ފޯރުކޮށްދިނުމަކީ ބައިނަލްއަގުވާމީ މުޖުތަމަޢުގެ މަސްއޫލިއްޔަތެއްކަން ފާހަގަކުރައްވާފައިވެއެވެ.
އޭޖީ އޮފީހުން ވަނީ، މޫސުމަށް އަންނަ ބަދަލުތަކުގެ ސަބަބުން ތިމާވެއްޓަށް ކުރާ ނޭދެވޭ އަސަރުތަކުން އަރައިގަތުމަށް ބައިނަލްއަގުވާމީ މުޖުތަމަޢުއާ ގުޅިގެން މަސައްކަތްކުރުމުގަޔާއި ރައްޔިތުންގެ ޙައްޤުގައި ވަކާލާތުކުރުމުގައި ސަރުކާރުން ސާބިތުކަމާ އެކު ކުރިއަށް ދާނެކަމުގެ ޔަޤީންކަން ދީފައެވެ.