ޖަމާލުއްދީން ސްކޫލްގެ ދަރިވަރެއްގެ ފަންނުވެރި ކެލިގްރަފީގެ ހުނަރު

ޖަމާލުއްދީން ސްކޫލްގެ ދަރިވަރެއް ކަމުގައިވާ ނައިސްގެ ފަންނުވެރި  ކެލިގްރަފީ ލިޔުމުގެ ހުނަރު ފާހަގަކޮށް އެ ސްކޫލުން ވަނީ ތަޢުރީފުކޮށްފައެވެ.

އެ ސްކޫލުން ހާމަކުރިގޮތުގައި ނައިސްގެ ފަންނުވެރި ހުނަރު ވަނީ ހަމައެކަނި ޖަމާލުއްދީން ސްކޫލްގެ ފާރުތަކުގައި ނޫން، އެ ސްކޫލްގެ މުވައްޒަފުންނާއި ދަރިވަރުންގެ ހިތްތަކުގައިވެސް ނުފޮހެވޭނެ ގޮތަކަށް ޗާޕުކުރެވިފައެވެ. އޭނާގެ ފަންނުވެރިކަމުގެ ހުނަރުން އަބަދުވެސް އާ މިންގަނޑުތަކެއް ކަނޑައަޅަމުންދާ ކަމަށް ސްކޫލުން ބުނެއެވެ.

ނައިސްއަކީ ޙާއްސައެހީއަށް ބޭނުންވާ ކުއްޖެއްކެވެ.  އެހެންނަމަވެސް އެކަން އޭނާގެ ހުނަރަށް ހުރަހަކަށް ވެފަ ނުވާކަމަށާއި އަދި އެކަމަކީ މީހެއްގެ ޤާބިލުކަމަށް ނުވަތަ ހުވަފެންތައް ޙަޤީޤަތަކަށް ހެދުމަށް ހުރަސްއެޅޭނެ ކަމެއް ނޫންކަން އޭނާ ވަނީ ސާބިތުކޮށްދީފައިކަމަށް  ޖަމާލުއްދީން ސްކޫލުން ހާމަކުރެއެވެ.

މިފަދަ ހުނަރުވެރި ދަރިވަރަކަށް އެހީތެރިވެ، އެ ހުނަރު ތަރައްޤީކުރުމަށް މަގުފަހިކޮށްދިނުމުގެ ފުރުޞަތު ލިބުނުކަމީ އެ ސްކޫލަށް ލިބުނު ޝަރަފެއް ކަމުގައި ސްކޫލުން ބުނެއެވެ. އަދި ނައިސްގެ ކުރިއެރުމާއި ކާމިޔާބީތަކާމެދު ސްކޫލުން ފަޚުރުވެރިވާ ކަމަށާއި، ކުރިމަގުގައިވެސް އޭނާ އުއްމީދުތަކަށްވުރެ މަތިވެރި ނަތީޖާތަކެއް ހާސިލުކުރާނެކަމުގެ ޔަޤީންކަން އޮތް ކަމަށް ސްކޫލުން ބުނެއެވެ.