ވެލާނާ އެއަރޕޯޓުގެ އައު ޓާމިނަލް ކުރިން ކަނޑައެޅި ތާރީޚަށްވުރެ އަވަހަށް ހުޅުވުމަށް މަސައްކަތް ކުރަނީ

ވެލާނާ އިންޓަރނޭޝަނަލް އެއަރޕޯޓުގެ އައު ޓާމިނަލް ހުޅުވުމަށް ކުރިން ކަނޑައަޅާފައި އޮތް ތާރީޚަށްވުރެ އަވަސް ތާރީޚެއްގައި އެތަން ހުޅުވައި ޚިދުމަތް ދިނުމަށް މަސައްކަތް ކުރަމުންދާކަމަށް ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ވަޒީރު މިފަދައިން ވިދާޅުވީ ބައިނަލްއަޤްވާމީ ވައިގެ ދަތުރު ފަތުރުގެ ދުވަހާ ގުޅިގެން ދެއްވި ޚިތާބުގައެވެ. މި ޚިތާބުގައި ވަޒީރު ވިދާޅުވީ ސަރުކާރުގެ އިސްނެގުމާއެކު މިހާރު މަސައްކަތް ކުރަމުން މިދަނީ ކުރިން ކަނޑައެޅި ތާރީޚަށްވުރެ އަވަސް ތާރީޚެއްގައި އައު ޓަމިނަލް ހުޅުވައި ޚިދުމަތް ދޭން ފެށުމަށްކަމަށެވެ.

މި މަޝްރޫޢުގެ ސަބަބުން ރާއްޖެއާއި ބޭރުގެ އެއަރލައިންތަކުގެ އުދުހުމުގެ ހަރަކާތްތައް އިތުރުކުރެވި، ފަސިންޖަރުންނަށް މިހާރަށްވުރެ ފެންވަރު ރަނގަޅު ޚިދުމަތްތަކެއް ފޯރުކޮށްދެވޭނެކަމަށް ވަޒީރު ވިދާޅުވިއެވެ. އައު ޓާމިނަލް ހުޅުވާ ތާރީޚު އަވަސް ކުރުމަށް މަސައްކަތް ކުރަމުން އަންނައިރު، އެ ޓާމިނަލް އަންނަ އަހަރުގެ މެދުތެރޭގައި ބޭނުންކުރަން ފަށާނެ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މީގެ ކުރިން ބުނެފައިވެއެވެ.

މީގެ އިތުރުން ވަޒީރު ވަނީ ރާއްޖޭގެ މަދަނީ އުދުހުމުގެ ސިނާޢަތް ސިންދަފާތުކުރުމުގެ ގޮތުން ރާއްޖޭގައި ހެލިކޮޕްޓަރ އޮޕަރޭޝަންތައް އަލުން ފެށުމަށް ތައްޔާރުވަމުންދާކަން ފާހަގަކުރައްވާފައެވެ. މިކަމުގެ ސަބަބުން މެޑިކަލް އިވެކުއޭޝަން އަދި ރިސޯޓްތަކާއި އެއަރޕޯޓާ ދެމެދު ފަތުރުވެރިން ވައިގެ މަގުން އުފުލުމުގެ ޚިދުމަތް ލިބިގެންދާނެކަމަށް ވަޒީރު ވިދާޅުވިއެވެ.

އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) ގެ މިންގަނޑުތަކާ އެއްގޮތަށް ރާއްޖެއިން މަސައްކަތް ކުރާ މިންވަރު ބެލުމަށް އަންނަ އަހަރުގެ މެދުތެރޭގައި އައިކާއޯގެ ފަރާތުން ރާއްޖެއަށް ޒިޔާރަތްކޮށް އޮޑިޓެއް ކުރިއަށްގެންދިޔުމަށް ހަމަޖެހިފައިވާކަމަށްވެސް ވަޒީރު ވިދާޅުވިއެވެ. މި އޮޑިޓުން ފަޚުރުވެރި ނަތީޖާއެއް ރާއްޖެއަށް ލިބިގެންދާނެކަމަށް ވަޒީރު އުންމީދު ކުރައްވައެވެ.