ޚަބަރު
މުސާރަ ނުލިބިގެން އެއްވި 55 ބިދޭސީން އިމިގްރޭޝަނުގެ ބެލުމުގެދަށަށް

އިމިގްރޭޝަނުން ހިންގް އޮޕަރޭޝަނެއްގެ ތެރެއިން ފޮޓޯ: އިމިގްރޭޝަން
މުސާރަ ނުލިބޭ ކަމަށް ބުނެ މުލިއާގެ ކައިރިއަށް މިއަދު އެއްވި 55 ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
ފުލުހުން މަޢުލޫމާތު ދެއްވާފައިވާ ގޮތުގައި، މުސާރަ ނުދޭ ކަމަށް ބުނެ ބިދޭސީންތަކެއް މުލިއާގެއާ ހިސާބުގައި ހިތްހަމަނުޖެހުން ފާޅުކުރަމުންދާ މައްސަލައަކާ ގުޅިގެން ފުލުހުން އެތަނަށް ދިޔައެވެ. މި މައްސަލާގައި އެ ސަރަޙައްދަށް އެއްވި ބިދޭސީން މިހާރު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން ވިދާޅުވިއެވެ.
ފުލުހުން އިތުރަށް މަޢުލޫމާތު ދެއްވާފައިވާ ގޮތުގައި، އިމިގްރޭޝަންގެ ބެލުމުގެ ދަށަށް ގެންދެވުނު 55 ބިދޭސީންގެ ތެރޭގައި ހިމެނެނީ އިންޑިއާގެ 38 މީހުންނާއި ބަންގްލަދޭޝަށް ނިސްބަތްވާ 17 މީހުންނެވެ.
ބިދޭސީން ރާއްޖެ ގެނައުމަށް ފަހު މަސައްކަތް ކުރުވައި، މުސާރަ ނުދޭ މައްސަލައަކީ ދިވެހިރާއްޖޭގައި އާންމުކޮށް ދިމާވާ މައްސަލައެކެވެ. މީގެ ކުރިން ވެސް މިފަދަ މައްސަލަތަކުގައި ބިދޭސީން އެއްވުންތައް ބާއްވައި މުޒާހަރާކޮށްފައިވެއެވެ. މިފަދަ މައްސަލަތައް ހައްލުކުރުމަށް ސަރުކާރުން އަންނަނީ ޚާއްސަ މަސައްކަތްތަކެއް ކުރައްވަމުންނެވެ.