ކުޅިވަރު
ޗެމްޕިއަން ޓީމަށް އެއްލައްކަ ރުފިޔާ ހުށަހަޅައި، އޮފީސް އަދި ކުންފުނިތަކަށް ހާއްސަ ފުޓްސަލް މުބާރާތެއް އިއުލާންކޮށްފި

އޮފީސް ލީގު ފެށުމަށް ހަމަޖެހިފައިވަނި މި އަންނަ އެޕްރީލްގައި
ހުލާސާ
ސަރުކާރު އޮފީސްތަކާއި ކުންފުނިތަކަށް ހާއްސަކޮށް "އޮފީސް ލީގު 2025" ގެ ނަމުގައި ބިގް ގޭމް މޯލްޑިވްސް އިން ފުޓްސަލް މުބާރާތެއް އިއުލާންކޮށްފި.
މުބާރާތުގައި ޖުމްލަ 32 ޓީމަށް ފުރުސަތު ދިނުމަށް ނިންމާފައިވާއިރު، މި މުބާރާތް ހާއްސަކޮށްފައިވަނީ ހަމައެކަނި މާލެ އާއި ހުޅުމާލޭ ސަރަހައްދުގެ އޮފީސްތަކާއި ކުންފުނިތަކަށް.
ސަރުކާރު އޮފީސްތަކާއި ކުންފުނިތަކަށް ހާއްސަކޮށް "އޮފީސް ލީގު 2025" ގެ ނަމުގައި ބިގް ގޭމް މޯލްޑިވްސް އިން ފުޓްސަލް މުބާރާތެއް އިއުލާންކޮށްފިއެވެ. މި މުބާރާތުގެ ޗެމްޕިއަން ޓީމަސް ހުށަހަޅާފައިވަނީ 100،000 (އެއް ލައްކަ ރުފިޔާ)އެވެ.
މުބާރާތުގައި ޖުމްލަ 32 ޓީމަށް ފުރުސަތު ދިނުމަށް ނިންމާފައިވާއިރު، މި މުބާރާތް ހާއްސަކޮށްފައިވަނީ ހަމައެކަނި މާލެ އާއި ހުޅުމާލޭ ސަރަހައްދުގެ އޮފީސްތަކާއި ކުންފުނިތަކަށެވެ. މުބާރާތް އިންތިޒާމު ކުރާ ފަރާތުން ހާމަކޮށްފައިވާ ގޮތުގައި، ކޮންމެ ޓީމެއްގައި ވެސް ހިމެނޭނީ އެ އޮފީހެއް ނޫނީ އެ ކުންފުންޏެއްގެ މުވައްޒަފުން އެކަންޏެވެ. އެހެންކަމުން، މުބާރާތަށް ހާއްސަކޮށް، އޮފީހުން ބޭރުން އެއް ވެސް ކުޅުންތެރިއެއް ޓީމު ލިސްޓުގައި ނުހިމެނޭނެއެވެ. އަދި އެ އޮފީހެއް ނުވަތަ ކުންފުންޏެއްގެ މުވައްޒަފެއްގެ ގޮތުގައި ބަލާނީ މުބާރާތް ފެށުމާއި ހަމައަށް 3 މަސް ވަންދެން އެ ވަޒީފާގައި ހޭދަކޮށްފައިވާނަމަވެ.
މި މުބާރާތް އިއުލާންކޮށްފައިވާ ބިގް ގޭމް މޯލްޑިވްސްއަކީ ރާއްޖޭގައި ބާއްވަމުން އަންނަ ރިޒޯޓު ލީގު ވެސް އިންތިޒާމު ކުރާ ފަރާތެވެ. މި ފަރާތުން މިހާތަނަށް 50 މުބާރާތް އިންތިޒާމު ކޮށްފައިވާއިރު، އަލަށް ބޭއްވުމަށް އިއުލާންކޮށްފައި މިވާ އޮފީސް ލީގު ފެށުމަށް ހަމަޖެހިފައިވަނީ މިއަންނަ މަހުގެ އެޕްރީލް މަހުގެ ތެރޭގައެވެ.
މި މުބާރާތާ ގުޅޭ ގޮތުން، މުބާރާތް އިންތިޒާމުކުރާ ފަރާތުން ބުނެފައިވަނީ، ރިޒޯޓު ލީގާއެކު އޮފީސް ލީގު ވެސް ކުރިޔަށް ގެންގޮސް، އެ ފަރާތުން ބޭނުންވަނީ ‘ކޯޕޮރޭޓް ސެކްޓަރ’ ހިމެނޭ ގޮތަށް ފުޓްސަލްގެ ފޯރި ރާއްޖޭގައި ދެމެހެއްޓުމަށްކަމަށްށެވެ.