މީޑިއާ ކައުންސިލުގެ ހުސްވެފައިވާ 10 ގޮނޑިއަށް އައު މެންބަރުން ހޮވައިފި

މޯލްޑިވްސް މީޑިއާ ކައުންސިލުގެ ހުސްވެފައިވާ 10 ގޮނޑިއަށް އައު މެންބަރުން ހޮވައިފިއެވެ. މި ގޮނޑިތަކުގެ ތެރޭގައި ހިމެނެނީ މީޑިއާ ތަމްސީލްކުރާ 7 ގޮނޑިއާއި އަމިއްލަގޮތުން ވާދަކުރާ 3 ގޮނޑިއެވެ.

މާބޮޑު ވާދަވެރިކަމެއް ނެތި ބޭއްވުނު މި އިންތިޚާބުގައި މީޑިއާތައް ތަމްސީލްކުރާ ގޮނޑިތަކަށް ހޮވުނީ އާފަތިސް ނޫސް، ވަގުތު ނޫސް، ހަތާވީސް ނޫސް، މިހާރު ނޫސް، ދިޔަރެސް ނޫސް، ހަފްސީ ނޫސް އަދި ތިލަދުން ނޫހުގެ ކެންޑިޑޭޓުންނެވެ. އާއްމުންގެ ތެރެއިން އިންތިޚާބު ކާމިޔާބު ކުރީ ފާތިމަތު ފަހުމީ، އިބްރާހިމް ފައުޒީ އަދި އިބްރާހިމް މުހައްމަދު އެވެ.

މި އިންތިޚާބުގައި ޖުމްލަ 139 މީޑިއާއަކުން ވޯޓުލާފައިވާކަން ފާހަގަކުރެވެއެވެ. މީގެ ތެރޭގައި ޓީވީ، ރޭޑިއޯ، އޮންލައިން އަދި އެކި ނަންނަމުގައި ރަޖިސްޓްރީކޮށްފައިވާ މަޖައްލާތައްވެސް ހިމެނެއެވެ. ރާއްޖޭގައި ރަޖިސްޓްރީކޮށްފައި އޮންނަ ކޮންމެ މީޑިއާއަކަށްވެސް މި އިންތިޚާބުގައި ވޯޓުލެވޭކަން ފާހަގަކުރެވެއެވެ.

މީޑިއާ ކައުންސިލުގެ ދައުރަކީ މީލާދީ ގޮތުން ދެ އަހަރެވެ. މި ކައުންސިލުގެ މައިގަނޑު މަސްއޫލިއްޔަތުތަކުގެ ތެރޭގައި މީޑިއާ ރެގިއުލޭޓްކުރުމާއި ކޮންމެ އަހަރަކު ނޫސްވެރިކަމުގެ އިނާމު ދިނުން ހިމެނެއެވެ.

ރާއްޖޭގައި މީޑިއާތައް ރެގިއުލޭޓްކުރަން މީޑިއާ ކައުންސިލާއި ބްރޯޑްކާސްޓިން ކޮމިޝަން އޮތްނަމަވެސް، މީޑިއާގައި މަސައްކަތްކުރާ ފަރާތްތަކުގެ އަޚްލާޤީ މިންގަނޑުތައް އެކަށައަޅައި ތަންފީޒު ނުކުރެވޭކަމުގެ ޝަކުވާ ދަނީ އިތުރުވަމުންނެވެ. މި ދެ މުއައްސަސާ އެއްކޮށްލުމަށް ހުށަހެޅުނު ބިލެއް ވަނީ އަނބުރާ ގެންގޮސްފައެވެ.