ވެސްޓް ހޭމްގެ ކުރިޔަށް ކުޅޭ އެންޓޯނިއޯ ދުއްވަންއިން ކާރު އެކްސިޑެންޓުވެއްޖެ

އިންގްލިޝް ޕްރިމިއަރ ލީގުގެ ވެސްޓް ހޭމް ޔުނައިޓެޑުގެ ކުރިޔަށް ކުޅެމުން އަންނަ މިޝައިލް އެންޓޯނިއޯ ދުއްވަން އިން ކާރު ހޮނިހިރު ދުވަހުގެ މެންދުރުފަހުގެ ވަގުތެއްގައި އެކްސިޑެންޓުވެ އޭނާއަށް ހޮސްޕިޓަލުގައި ފަރުވާދޭން ފަށައިފިއެވެ. 

މި ހާދިސާއާ ގުޅިގެން ވެސްޓް ހޭމްއިން ނެރުނު ބަޔާނެއްގައި ބުނީ، ލަންޑަންގެ ހޮސްޕިޓަލެއްގައި އޭނާއަށް ފަރުވާ ދެމުން އަންނަ ކަމަށާއި، މިހާރު އޭނާ ހޭ އަރައި، ވާހަކަ ދައްކަން ފަށާފައިވާ ކަމަށެވެ. އަދި އޭނާގެ އާންމު ހާލަތު ރަގަޅު ވަމުން އަންނަ ކަމަށް ވެސް ކްލަބުން ހާމަކޮށްފައި ވެއެވެ. 

ކާރު އެކްސިޑެންވި ސަރަހައްދުން އެސެކްސް ޕޮލިސް އިން ހާމަކުރީ، އެ ސަރަހައްދުގެ އެޕިންގގައި ހިނގި ނުރައްކާތެރި އެކްސިޑެންޓެއްގެ ރިޕޯޓު ހޮނިހިރު ދުވަހުގެ މެންދުރުފަހު 12.50 ގައި ލިބުމާ ގުޅިގެން ވަގުތުން ހަރަކާތްތެރިވި ކަމަށާއި، އަދި މިއީ އިތުރު އުޅަނދެއްގައި ޖެހިގެން ހިނގި ހާދިސާއެއް ނޫންކަމަށް ވެސް ހާމަކޮށްފައިވެއެވެ. މި ހާދިސާގައި ހިމެނެނީ އެންޓޯނިއޯ ދުއްވަން އިން ފެރާރީ ސްޕޯޓްސް ކާރު އެކަންޏެވެ.

މި ހާދިސާ ޕޮލިހުން ތަހުގީގު ކުރަމުން އަންނަ ކަމަށާއި، ހާދިސާއާ ގުޅޭ ވީޑިއޯ ފޫޓެޖެއް ލިބޭނަމަ، ޕޮލިހުންނާއި ހިއްސާ ކޮށްދިނުމަށް ވެސް ވަނީ އެދިފައެވެ. 

ކުޑަ ވަގުތު ކޮޅެއްގެ ތެރޭގައި އެކްސިޑެންޓުވި ސަރަހައްދަށް ހާޒިރުވި އެސެކްސް ފަޔަރ ސަރވިސަސް އިން ބުނީ، އެ ސަރވިސަސްއިން އެ ތަނަށް ދިޔައިރު ކާރު ދުއްވަން އިން ފަރާތް އޮތީ ކާރުގައި ތާށިވެފައި ކަމަށާއި، ނަމަވެސް އޭނާ ވަގުތުން ސަލާމަތް ކުރެވުނު ކަމަށެވެ. 

އުމުރުން 34 އަހަރުގެ އިނގިރޭސިވިލާތަށް އުފަން ޖެމެއިކާގެ އޮންޓޯނިއޯ، ވެސްޓް ހޭމްއަށް ކުޅެމުން އަންނަތާ މިއީ 10 ވަނަ ސީޒަނެވެ. އޭނާ ވެސްޓް ހޭމްއާ ގުޅުނީ ނޮޓިންހަމް ފޮރެސްޓްއިން 2015 ވަނަ އަހަރުއެވެ. އޭގެ ފަހުން ވެސްޓް ހޭމްއަށް 323 މެޗު ކުޅެދީފައިވާއިރު، އޭނާ ވަނީ މިހާތަނަށް އެ ކްލަބަށް 83 ގޯލު ކާމިޔާބުކޮށްދީފައެވެ.