އިންގްލިޝް ޕްރިމިއަރ ލީގު: މެންޗެސްޓަރގެ ދެ ޓީމަށް ވެސް ހިތި ނަތީޖާތަކެއް

އިންގްލިޝް ޕްރިމިއަރ ލީގުގެ ޗެމްޕިއަން މެންޗެސްޓަރ ސިޓީއަށް އަނެއްކާ ވެސް ދެ ޕޮއިންޓު ގެއްލުނުއިރު، ރޫބެން އަމޮރިމް ހަވާލުވިފަހުން އަމިއްލަ ދަނޑުގައި މެންޗެސްޓަރ ޔުނައިޓެޑު ފުރަތަމަ ފަހަރަށް ބަލިވެއްޖެއެވެ.

ސިޓީއިން ރޭ ކްރިސްޓަލް ޕެލެސްއާ ދެކޮޅަށް، ލަންޑަންގެ ސެލްހާސްޓް ޕާކުގައި ކުޅުނު މި މެޗު 2-2 އިން އެއްވަރުވިއިރު، މިއީ ރަށުން ބޭރުގައި އެ ޓީމުން މޮޅުނުވާތާ ހަތަރު ވަނަ މެޗެވެ.

އެ މެޗުގައި ޗެމްޕިއަން މެންޗެސްޓަރ ސިޓީގެ ގޯލު ފޫއަޅުވާ ލުމަށް ކްރިސްޓަލް ޕެލެސްއަށް މާ އުނދަގޫ ކަމަކަށް ނުވިއެވެ. އެގޮތުން އެ ޓީމުން ވަނީ މެޗުގެ ހަތަރު ވަނަ މިނެޓުގައި ޑެނިއެލް މުނޯޒްގެ ގޯލަކުން ލީޑު ނަގާފައެވެ. ނަމަވެސް ސިޓީއިން ހާފު ނިންމާލީ މެޗުގެ ނަތީޖާ ހަމަހަމަ ކުރުމަށްފަހުއެވެ. މެޗުގެ 30 ވަނަ މިނެޓުގައި، ސިޓީއަށް ނަތީޖާ ހަމަހަމަ ކޮށްދިނީ އެ ޓީމުގެ ފޯވާޑް، އަރލިން ހާލަންޑެވެ. 

ނަމަވެސް ދެވަނަ ހާފުގައި ކްރިސްޓަލް ޕެލެސް އިން އަނެއްކާ ވެސް ލީޑު ނެގިއެވެ. މެކްސެންސް ލެކްރޮއިޒް މެޗުގެ 56 ވަނަ މިނެޓުގައި ކާމިޔާބު ކުރި މި ގޯލުން، ސިޓީއަށް މެޗު ކާމިޔާބު ކުރުމަށް އަނެއްކާ ވެސް ބޮޑު ގޮންޖެހުމަކާ ކުރިމަތިލާން ޖެހުނެވެ. 

މެންޗެސްޓަރ ސިޓީއަށް ދެވަނަ ފަހަރަށް ނަތީޖާ ހަމަހަމަކޮށްދިނީ، ޒުވާން ކުޅުންތެރިޔާ ރިކޯ ލެވިސްއެވެ. އޭނާއަށް ވަނީ މި މެޗުގައި ރަތް ކާޑެއް ވެސް ދައްކާފައެވެ. ދެވަނަ ރީނދޫ ކާޑަކާއެކު ރަތް ކާޑެއް ދައްކައި ރިކޯ ލެވިސް ދަނޑުން ފޮނުވާލީ މެޗުގެ 84 ވަނަ މިނެޓުގައެވެ. 

ރޭ ކުޅުނު އެހެން މެޗެއްގައި، ރޫބެން އަމޮރިމްގެ މެންޗެސްޓަރ ޔުނައިޓެޑަށް އޭނާ ހަވާލުވިފަހުން އަމިއްލަ ދަނޑުގައި ފުރަތަމަ ފަހަރަށް ނާކާމިޔާބީއާ ކުރިމަތިލާން ޖެހުނުއިރު، ލީގުގައި އެންމެ ފަހުން ކުޅުނު މެޗުގައި ވެސް އެ ޓީމު ވަނީ ބަލިވެފައެވެ. ބުރާސްފަތި ދުވަހުގެރޭ އާސެނަލްއާ ދެކޮޅަށް ކުޅުނު މެޗު 2-0 އިން އާސެނަލްއަށް ގެއްލުނުއިރު، ރޭ ނޮޓިންހަމް ފޮރެސްޓް މެޗުގައި ބަލިވީ 3-2 އިންނެވެ. 

މެޗުގެ 2 ވަނަ މިނެޓުގައި ނިކޮލާ މިލެންކޮވިޗްގެ ގޯލަކުން ފޮރެސްޓު ލީޑު ނެގިއިރު، ރަސްމުސް ހޮއިލަންޑު ވަނީ މެޗުގެ 18 ވަނަ މިނެޓުގައި ޔުނައިޓެޑަށް ނަތީޖާ ހަމަހަމަކޮށްދީފައެވެ. 

ފޮރެސްޓުން ދެވަނަ ފަހަރަށް ލީޑު ނެގީ ދެވަނަ ހާފުގެ ދެވަނަ މިނެޓުގައެވެ. މޯގަން ގިބްސް-ވައިޓުގެ ގޯލަކުން އެ ޓީމުން ލީޑު ނެގިއިރު، އޭގެ 8 މިނެޓު ފަހުން ކްރިސް ވުޑް ވަނީ އެ ޓީމަށް ލީޑު ފުޅާކޮށްދީފައެވެ.  

އަދި ކެޕްޓަން ބުރޫނޯ ފެނާންޑޭޒްގެ ގޯލަކުން 61 ވަނަ މިނެޓުގައި ޔުނައިޓެޑަށް ފަރަގު ކުޑަ ކުރެވުނު ނަމަވެސް، ނަތީޖާ ހަމަހަމަ ކުރެވޭނެ މާ ރަނގަޅު ފުރުސަތުތަކެއް ހޯދިފައެއް ނުވެއެވެ.

ޔުނައިޓެޑަށް 15 މެޗުން ލިބުނު 19 ޕޮއިންޓާއެކު، އެ ކްލަބު މިހާރު އޮތީ ލީގު ޓޭބަލްގެ 13 ވަނައިގައެވެ. އަދި މި އަދަދަށް މެޗު ކުޅެގެން، 1986/87 ގެ ސީޒަނުގެ ފަހުން ޔުނައިޓު ލީގު ޓޭބަލްގައި މިހާ ދަށަށް ވެއްޓިފައެއް ނުވެއެވެ.