ޖޫޑީ ގާލަންޑް ބޭނުންކުރި ބޫޓު 28 މިލިއަން ޑޮލަރަށް ވިއްކާލައިފި

ހޮލީވުޑްގެ މަޝްހޫރު ފިލްމު "ދަ ވިޒާޑް އޮފް އޮޒް" ގައި އެކްޓްރެސް ޖޫޑީ ގާލަންޑް ބޭނުންކުރި ރަތްކުލައިގެ ބޫޓު ޖޯޑެއް އެމެރިކާގެ ނީލަމެއްގައި 28 މިލިއަން ޑޮލަރަށް ވިއްކާލައިފިއެވެ. މި ނީލަން ބޭއްވުނީ ހޮނިހިރު ދުވަހު އެމެރިކާގައެވެ.

މި ފިލްމުގައި ބޭނުންކުރި ހަތަރު ޖޯޑުގެ ތެރެއިން އެއް ޖޯޑަކީ މިއީއެވެ. މިނެސޯޓާގެ މިއުޒިއަމަކުން މި ބޫޓ ވަގަށް ނަގާފައިވާކަން ފާހަގަކޮށްލެވެއެވެ. 

ނީލަމުގެ އޮންލައިން ބިޑިންގ ފެށުނީ އެއް މަސް ކުރިންނެވެ. ހެރިޓޭޖް އޯކްޝަންސްއިން ލަފާކުރި ގޮތުގައި މި ބޫޓޫ ވިއްކޭނީ 3 މިލިއަން ޑޮލަރަށެވެ. ނަމަވެސް އެ އަގަށްވުރެ 25 މިލިއަން ޑޮލަރު އިތުރަށް ވިއްކިފައިވެއެވެ.

ނީލަންކުރި ފަރާތުން މި ބޫޓޫ ވަނީ "ހޮލިވުޑް މެމޮރަބިލިއާގެ ހޯލީ ގްރެއިލް" ގެ ގޮތުގައި ސިފަކޮށްފައެވެ. އަދި މިއީ ނީލަމުގައި އެންމެ އަގުބޮޑުކޮށް ވިއްކުނު ފިލްމީ ތަކެތި ކަމަށް ބުނެފައިވެއެވެ.

ޑަލަސްގައި ބޭއްވުނު ނީލަމުގައި މި ބޫޓު ވިއްކާލުމުން ބައިވެރިން ވަނީ އަތްތިލަބަޑިޖަހާފައެވެ. މި ނީލަން ބޭއްވުނީ "ވިކެޑް" ގެ ނަމުގައި އައު ފިލްމެއް ނެރުމާ ގުޅިގެން "ދަ ވިޒާޑް އޮފް އޮޒް" އަށް އަލުން ޝައުގުވެރިކަން އިތުރުވެފައިވާ ދަނޑިވަޅެއްގައެވެ.

1939 ވަނަ އަހަރު ނެރުނު "ދަ ވިޒާޑް އޮފް އޮޒް" ގައި ޑޮރޮތީގެ ރޯލު ކުޅުނުއިރު ޖޫޑީ ގާލަންޑްގެ އުމުރަކީ އެންމެ 16 އަހަރެވެ. މީޑިއާ އައުޓްލެޓް ވެރައިޓީން "އެންމެ މޮޅު 100 ފިލްމު" ގިލްމު" ގެ ލިސްޓުގައި މި ފިލްމު ވަނީ ދެވަނައަށް ރޭންކްކޮށްފައެވެ.