ފުވައްމުލަކު ސިޓީގެ 560 އަށްވުރެ ގިނަ ގޭބިސީއަށް "ހާލު ކިހިނެއް؟" ޕްރޮގްރާމްގެ ދަށުން ޒިޔާރަތްކޮށްފި

އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ބުނެފައިވާ ގޮތުގައި، ރައްޔިތުންގެ ގާތަށް ގޮސް ހާލަތު ދެނެގަތުމަށް ސަރުކާރުން ފަށާފައިވާ "ހާލު ކިހިނެއް؟" ޕްރޮގްރާމްގެ ދަށުން ފުވައްމުލަކު ސިޓީގެ 560 އަށްވުރެ ގިނަ ގޭބިސީއަށް ޒިޔާރަތްކޮށް ހާލު ބަލާފައިވެއެވެ.

އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރުގެ ނައިބު ނަޒީޙާ އަޙްމަދު ސޯޝަލް މީޑިޔާގައި ހިއްސާކުރެއްވި ވީޑިޔޯ މެސެޖެއްގައި ވިދާޅުވެފައިވަނީ،  ފުވައްމުލަކު ސިޓީގައި "ހާލު ކިހިނެއް" ޕްރޮގުރާމް ފެށީ މިމަހުގެ 3 ވަނަ ދުވަހު ކަމަށާއި، އިއްޔެގެ ނިޔަލަށް 560 އަށްވުރެ ގިނަ ގޭބިސީއަށް ޒިޔާރަތްކޮށް، ކަންބޮޑުވުންތައް އަޑުއަހާފައިވާ ކަމަށެވެ.

ނަޒީޙާ އިތުރަށް ވިދާޅުވެފައިވަނީ ފުވައްމުލަކު ސިޓީގައިވެސް މި ޕްރޮގުރާމްގެ ދަށުން ހުރިހާ ގޭބިސީއަކަށް ޒިޔާރަތްކުރާނެ ކަމަށާއި، ޢާއިލާތަކާއި ވަކިވަކި މީހުންގެ ފަރާތުން ލިބޭ ކަންބޮޑުވުންތައް ހައްލު ކޮށްދޭން މަސައްކަތްކުރައްވާނެ ކަމަށެވެ. އަދި ފުވައްމުލަކު ސިޓީގެ ރައްޔިތުން އެންމެ ގިނައިން ފާހަގަކޮށްފައިވަނީ ސްޕެޝަލިސްޓް ޑޮކްޓަރުންނަށް ދެއްކުމަށް ދިމާވާ ދަތިތައްކަމަށް ނަޒީޙާ ވިދާޅުވިއެވެ.

"ހާލު ކިހިނެއް" ޕްރޮގްރާމަކީ ރާއްޖޭގައި މީހުން ދިރިއުޅޭ ހުރިހާ ގެތަކަށް ޒިޔާރަތްކޮށް ހާލު ބަލައި، ދައުލަތުގެ އެހީތެރިކަން ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމަށް ކުރިއަށްގެންދާ ޕްރޮގްރާމެކެވެ. މިހާތަނަށް މާލެއާއި ގއ. އަތޮޅާއި ތ. އަތޮޅުގައި މި ޕްރޮގުރާމް ވަނީ ފަށާފައެވެ.

މި ޕްރޮގްރާމްގެ ތެރެއިން ޢާއްމުން އެންމެ ގިނައިން ހުށައަޅާފައިވަނީ ބޯހިޔާވަހިކަމުގެ ދަތިކަމުގެ މައްސަލަތަކެވެ. މީގެ އިތުރުން ބޭސްފަރުވާއަށް އެހީތެރިކަން ބޭނުންވުމާއި އިޖުތިމާޢީ ރައްކާތެރިކަމުގެ ނިޒާމުގެ ތެރެއިން މާލީ އެހީ ހޯދުމުގެ މައްސަލަތަކާއި ޑޮކްޓަރަށް ދެއްކުމާއި ރާއްޖޭން ބޭރުން ބޭސް ގެނައުންފަދަ ކަންކަމުގައި ދަތިތައް ދިމާވާކަމުގެ ކަންބޮޑުވުންތައްވެސް ޢާންމުން ވަނީ ފާހަގަކޮށްފައެވެ.