ބަންކަރިން ޚިދުމަތުން މިހާތަނަށް 80 މިލިޔަން ޑޮލަރުގެ ޢާމްދަނީއެއް ލިބިއްޖެ

ރާއްޖޭގައި އަލަށް ފެށި ބަންކަރިން ޚިދުމަތުން މިހާތަނަށް 80 މިލިޔަން އެމެރިކާ ޑޮލަރުގެ ޢާމްދަނީއެއް ލިބިފައިވާ ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ސަޢީދު ވިދާޅުވީ، މިއީ މީގެ ކުރިން ރާއްޖެއަށް ލިބެމުން އައި ރެވެނިއުއެއް ނޫން ކަމަށާއި ކުރިއަށް އޮތް ތަނުގައި މި އާމްދަނީ މިއަށްވުރެ އިތުރަށް މަތިވެގެންދާނެ ކަމަށް އުންމީދު ކުރައްވާ ކަމަށެވެ.

މި މަޝްރޫޢާ ގުޅޭގޮތުން އިތުރަށް ވާހަކަދައްކަވަމުން ވަޒީރު ވިދާޅުވީ، "ސަރުކާރުގެ ތެރެއިން ކުރެވެމުންދަ މަސައްކަތުން އުންމީދު ދަނީ ބޮޑުވަމުން. އެއްވެސް ކަހަލަ ބަނދަރެއް އުތުރުގައިވެސް ނެތި ފެށީ މި މަސައްކަތް. ރާއްޖޭގެ ކަނޑު ހުރަސްކޮށް ދަތުރުކުރާ ބޯޓުފަހަރަށް އެ ޚިދުމަތް ދޭންޖެހޭ. އަމަލީ މަސައްކަތް ފެށެން ގާތްވަމުން ދަނީ." މިހެންނެވެ.

ދިވެހިރާއްޖޭގެ އިޤްތިޞާދު ސިންދަފާތުކޮށް، ދައުލަތަށް ވަންނަ އާމްދަނީ އިތުރުކުރުމުގެ މަޤްޞަދުގައި މި ޚިދުމަތް ރަސްމީކޮށް ފަށާފައިވަނީ 2024 ވަނަ އަހަރުގެ ސެޕްޓެންބަރު މަހުގައެވެ. ބައިނަލްއަޤްވާމީ ގޮތުން މި ދާއިރާގެ ބޮޑު ތަޖުރިބާއެއް ލިބިފައިވާ ވިޓޯލް ކުންފުންޏާ ގުޅިގެން މި ޚިދުމަތް ދެމުން އަންނަނީ އެކަމަށް ޚާއްސަ ބޯޓެއް ގެނެސްގެން، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) މެދުވެރިކޮށް އޮފްޝޯކޮށެވެ.

މި ޚިދުމަތް ފެށިފަހުން މަހުން މަހަށް ބަންކަރިން ޚިދުމަތް ހޯދާ ފަރާތްތަކުގެ އަދަދު އިތުރުވަމުން އަންނައިރު، ލިބުނު އާމްދަނީގެ ބޮޑު ބައެއް ހިއްސާކުރަނީ އަލަށް އެތެރެކޮށް ވިއްކަން ފެށި ލޯ ސަލްފަރ އޮއިލްއިންނެވެ. ސަރުކާރުގެ އަމާޒަކީ އިޤްތިޞާދު ފުޅާކުރުމަށް ފަށާފައިވާ މި މަސައްކަތް އިތުރަށް ހަރުދަނާކޮށް ކުރިއަށް ގެންދިއުމެވެ.