ދުންފަތުގެ އިސްތިޢުމާލު ކުރުން ހުއްޓާލަން ބޭނުންވާ މީހުންނަށް ޚާއްސަ “ކުއިޓްލައިން” ގެ ޚިދުމަތް ފަށައިފި

ދުންފަތުގެ އިސްތިޢުމާލު ކުރާ މީހުންގެ ތެރެއިން އެކަން ހުއްޓާލަން ބޭނުންވާ މީހުންނަށް އެހީވެެދޭ ޚާއްސަ "ކުއިޓްލައިން" ތަޢާރަފްކޮށް ޚިދުމަތް ފަށައިފިއެވެ.

ދުންފަތުގެ އިސްތިޢުމާލު ކުރުން ހުއްޓާލަން ބޭނުންވާ މީހުންނަށް ޚާއްސަ ކޮށް ފަށައިފައިވާ “ކުއިޓްލައިން”ގެ ނަންބަރެއްގެ ގޮތުގައި ހަމަޖައްސައިފައިވާ ނަންބަރަކީ 1617 އެވެ. 

ހެލްތް ޕްރޮޓެކްޝަން އޮތޯރިޓީ އިން ބުނެފައިވަނީ މި ނަންބަރަކީ 24ގަޑިއިރު ޚިދުމަތް ލިބޭނެ ނަންބަރެއް ކަމަށެވެ. މީގެއިތުރުން "ކުއިޓްލައިން" އިން ދުންފަތުގެ އިސްތިޢުމާލު ކުރުން ހުއްޓާލަން ބެނުންވާ ފަރާތްތަކަަށް ކަމާގުޅޭ ތަޖުރިބާ ކާރުންގެ އިރުޝާދާއި އެހީތެރިކަން ކޮންމެ ވަގުތަކުވެސް ލިބޭނެ ކަމަށް އެޗްޕީއޭ އިން ބުނެފައިވެއެވެ. 

Introducing Tobacco Quit Line 1676 – Your Support for a Tobacco-Free Life. Reach out anytime for expert guidance and assistance on your journey to quit tobacco.#quittobacco#beatNCDs#25by30#HealthForAll#DhafaraaForTobaccoFreeNextGen pic.twitter.com/G1PD4oDyIf

— Health Protection Agency (@HPA_MV) December 8, 2024

ދުންފަތުގެ އިސްތިޢުމާލު ކުރުން ހުއްޓާލަން ބޭނުންވާ މީހުންނަށް ބޭނުންވާ އެހީތެރިކަން ދިނުމުގެ ގޮތުން ސެޒޭޝަންގެ ޚިދުމަތް މާލޭގައި ދެނީ 3 ހޮސްޕިޓަލަކުންނާއި ދަމަނަވެށިންނެވެ. އަދި އަތޮޅުތެރޭގެ 48 ތަނަކުން މިޚިދުމަތް ލިބޭގޮތަށް މިހާރުވަނީ ހަމަޖައްސާފައެވެ.

ޢާންމު ޞިއްޙަތަށް ބޮޑެތި ގެއްލުންތަކެއް ދެމުންދާ ދުންފަތުގެ އިސްތިޢުމާލު ކުރުން ރާއްޖޭގައި މަދުކުރުމަށް ސަރުކާރުން އެކުލަވާލާފައިވާ ޕްލޭންގެ ދަށުން، މިފާއިތުވި ދުވަސްތަކުގައި ގިނަ ފިޔަވަޅުތަކެއް އަޅައިފައިވާކަން ފާހަގަކޮށްލަން ޖެހެއެވެ.

އެގޮތުން ދުންފަތް ކޮންޓްރޯލުކުރުމާ ބެހޭ ޤާނޫނާއި، އެކްސްޕޯޓް އިމްޕޯޓް ޤާނޫނަށް އިސްލާޙު ގެނެސް ވޭޕްކުރަން ބޭނުންކުރާ އިލެކްޓްރޯނިކް ވަސީލަތްތަކުގެ އިމްޕޯޓް ޑިއުޓީއަށް ވަނީ ބޮޑެތި ބަދަލުތަކެއް ގެނެސްފައެވެ.އަދި މިދިޔަ މަހުގެ 15 އިން ފެށިގެން ރާއްޖެއަށް ވޭޕް އެތެރެކުރުން މަނާކޮށް، މި މަހުގެ 15އިން ފެށިގެން އެ ތަކެތި ވިއްކުމާއި ބޭނުންކުރުން ވަނީ މަނާކޮށްފައެވެ.

 ހަމަމިއާއިއެކު، ދުންފަތް ކޮންޓްރޯލްކުރުމާ ބެހޭ ޤާނޫނު ތަންފީޒުކުރުމާއި އެ ޤާނޫނު މިހާރަށް ވުރެ ހަރުކަށި ކުރުމަށް ބަދަލުތައް ގެންނަންވަނީ ނިންމަވާފައެވެ. މިގޮތުން ސިނގިރޭޓާއި ބިޑި ފަދަ ދުންފަތުގެ ބާވަތްތަކުން ޑިއުޓީ ވަނީ މިދިޔަ މަހުގެ އެއްވަނަ ދުވަހުން ފެށިގެން ބޮޑުކޮށްފައެވެ.