ކުޅިވަރު
އިތުރު ވަގުތުގައި ބާސެލޯނާއަށް މާޔޫސްކަން ގެނުވި އިރު، ހެންސީ ފްލިކަށް ރަތް ކާޑެއް

ރިއާލް ބެޓިސްއަށް ޕެނަލްޓީ ދިނުމާއި ގުޅިގެން ބާސެލޯނާގެ ކޯޗު، ހެންރީ ފްލިކް ބަހުސް ކުރުމުން އޭނާ ވަނީ ދަނޑުން ފޮނުވާލާފައި--- ފޮޓޯ: ގެޓީ އިމޭޖަސް
ހުލާސާ
ބެޓިސްގެ ބެނިޓޯ ވިލެމެރީންގައި ހޮނިހިރު ދުވަހުގެރޭ ކުޅުނު މި ފޯރިގަދަ މެޗުގައި، ބާސެލޯނާގެ ހެޑް ކޯޗު، ހެންސީ ފްލިކަށް ވަނީ ރަތް ކާޑު ދައްކާ ދަނޑުން ފޮނުވާލާފައި.
މި ނަތީޖާއާއެކު 38 ޕޮއިންޓާއެކު ބާސެލޯނާ ކުރީގައި އޮތް ނަމަވެސް، 1 މެޗު މަދުން ކުޅެފައިވާ މެޑްރިޑާއި ދެމެދު އޮތީ 2 ޕޮއިންޓުގެ ފަރަގެއް.
ސްޕެނިޝް ލަ ލީގާގައި ބާސެލޯނާ އާއި ރިއާލް ބެޓިސް ބައްދަލުކުރި މެޗު 2-2 އިން އެއްވަރުވެ، ބާސެލޯނާއަށް މުހިންމު ޕޮއިންޓުތަކެއް ގެއްލިއްޖެއެވެ. ބެޓިސްގެ ބެނިޓޯ ވިލެމެރީންގައި ހޮނިހިރު ދުވަހުގެރޭ ކުޅުނު މި ފޯރިގަދަ މެޗުގައި، ބާސެލޯނާގެ ހެޑް ކޯޗު، ހެންސީ ފްލިކަށް ވަނީ ރަތް ކާޑު ދައްކާ ދަނޑުން ފޮނުވާލާފައެވެ.
މި މެޗުގެ ފުރިހަމަ ކޮންޓްރޯލް ބާސެލޯނާއިން ނަގައިގެން ކުޅުނު ނަމަވެސް، ބެޓިސް އިން ވަނީ ނުރައްކާތެރި ގިނަ ހަމަލާތަކެއް އުފައްދާފައެވެ. އެގޮތުން މުޅި މެޗަށް ބަލާއިރު، ބާސެލޯނާއަށް ވުރެން ގިނައިން އިދިކޮޅު ގޯލަށް ނުރައްކާ ކުރީ ވެސް ބެޓިސްއެވެ.
މެޗު ފަށައިގެން 3 ވަނަ މިނެޓުގެ ތެރޭގައި ބެޓިސްއިން ވަނީ ރަގަޅު ފުރުސަތެއް ތަނަވަސްކޮށްފައެވެ. ނަމަވެސް އެ ޓީމުގެ މޮރޮކޯ ފޯވާޑް، އެއްޒަލްޒޫލީ ފޮނުވާލި ހަމަލާ ވަނީ ބާސެލޯނާގެ ގޯލްކީޕަރު، އިނާކީ ޕެނިޔާ ދިފާއުކޮށްފައެވެ.
މެޗުގެ ފުރަތަމަ ގޯލު ކާމިޔާބުކޮށް ބާސެލޯނާއަށް ލީޑު ނަގައިދިނީ ރޮބަޓް ލެވަންޑޯސްކީއެވެ. ފުރަތަމަ ހާފުގެ 39 ވަނަ މިނެޓުގައި ކުންޑޭ ގޯލު ކުރިމައްޗަށް ތިރިތިރިން ހުރަސްކޮށްލި ބޯޅަ، އެއް ޓަޗުން ގޯލުގެ ތެރެއަށް ފޮނުވާލައި ލެވަންޑޯސްކީ މި ކާމިޔާބުކުރީ މި ސީޒަނުގައި އޭނާގެ 16 ވަނަ ލީގު ގޯލެވެ.
ބެޓިސްއިން މެޗުގެ ނަތީޖާ ހަމަހަމަ ކުރީ އެ ޓީމަށް ލިބުނު ޕެނަލްޓީއަކުންނެވެ. ބާސެލޯނާގެ ކޯޗަށް ރަތް ކާޑު ދައްކާފައިވަނީ ވެސް މި ހާދިސާގައެވެ. ވީއޭއާރުގެ ލަފާގެ ދަށުން ބާސެލޯނާގެ ޕެނަލްޓީ އޭރިއާ ތެރެއިން އެ ޓީމުގެ ފްރެންކީ ޑީޔޮންގުގެ އަތުގައި ބޯޅަ ޖެހުނުކަމަށް ނިންމައި ޕެނަލްޓީ ދިނުމުން، ހެންސީ ފްލިންކް ވަނީ ޓެކްނިކަލް އޭރިއާއިން ނިކުމުގެން ގޮސް، މެޗުގެ ހަތަރު ވަނަ އޮފިޝަލާއި މި މައްސަލާގައި ބަހުސްކޮށްފައެވެ. ދެން ފެނުނީ އޭނާއަށް ރަތް ކާޑު ދެއްކި މަންޒަރެވެ.
ބެޓިސްއަށް މެޗުގެ ނަތީޖާ ހަމަހަމަކޮށްދިން ގޯލު ކާމިޔާބުކުރީ ބޮރްހާ އިގްލެސިއާސްއެވެ.
އެ ގޯލަށްފަހު ކޯޗެއް ނެތި ކުޅެމުން ދިޔަ ބާސެލޯނާއިން އަނެއްކާ ވެސް ލީޑު ނެގިއެވެ. އެ ޓީމުގެ އުއްމީދީ ކުޅުންތެރިޔާ، ލެމިން ޔަމާލްގެ ރީތި ބޯޅައަކުން މެޗު ނިމެން 7 މިނެޓަށް ވެފައި ވަނިކޮށް މި ގޯލު ކާމިޔާބުކުރީ ފެރަން ޓޮރޭސްއެވެ.
ނަމަވެސް ލީޑުގައި އޮވެ ބާސެލޯނާއަށް މެޗު ނިންމައެއް ނުލެވުނެވެ. ބެޓިސްއަށް މެޗުގެ ނަތީޖާ ހަމަހަމަ ކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް އަސާނޭ ޑިއާއޯއެވެ. މެޗުގެ އިތުރު ވަގުތުގައި އާސާނެ ޑިއާއޯ މި ގޯލު ކާރިޔާބު ކުރިއިރު، މިއީ އޭނާ ދަނޑަށް އެރުމަށްފަހު ކުރި ފުރަތަމަ ޓަޗު ވެސް މެއެވެ.
މި ނަތީޖާއާއެކު 38 ޕޮއިންޓާއެކު ބާސެލޯނާ ކުރީގައި އޮތް ނަމަވެސް، 1 މެޗު މަދުން ކުޅެފައިވާ މެޑްރިޑާއި ދެމެދު އޮތީ 2 ޕޮއިންޓުގެ ފަރަގެކެވެ.