ޤައުމީ ޚިދުމަތުގެ ބިލު އެކުލަވައިލުމަށް މަޝްވަރާކުރަނީ

ޤައުމީ ޚިދުމަތުގެ ބިލު އެކުލަވައިލުމަށް މަޝްވަރާތައް ފަށައިފިއެވެ.

މިމަޝްވަރާތައް ފަށައިފައިވަނީ މަތީ ތަޢުލީމާއި މަސައްކަތްތެރިކަމާ ހުނަރުތައް ތަރައްޤީކުރުމާ ބެހޭ ވުޒާރާއާއި ކަމާ ގުޅުންހުރި އެހެނިހެން މުއައްސަސާތަކާއި އެކުއެެވެ. 

އެގޮތުން މަތީތަޢޫލީމާ ބެހޭ ވުޒާރާގައި މިއަދު މޯލްޑިވްސް ނޭޝަނަލް ޑިފެންސް ފޯސް އަދި މޯލްޑިވްސް ޕޮލިސް ސަރވިސްގެ އިސް ފަރާތްތަކުގެ ޚިޔާލާއި މަޝްވަރާ ހޯދުމަށް އަމާޒުކޮށްގެން ބޭއްވުނު ފުރަތަމަ މަޝްވަރާ  ވަނީ ކުރިއަށް ގެންގޮސްފައެވެ.

މި މަޝްވަރާތަކަކީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ އިސްނެންގެވުމުގެ ދަށުން، ތަޢުލީމީ ދާއިރާގައި ނުވަތަ ވަޒީފާގެ މައިދާނުގައި ހަރަކާތްތެރިނުވާ ޒުވާނުންނަށް އަމާޒުކޮށްގެން ލާޒިމު ޤައުމީ ޚިދުމަތެއް ތަޢާރަފުކުރުމުގެ މަސައްކަތުގެ ތެރެއިން ފެށިގެންދިޔަ މަޝްވަރާ ބައްދަލުވުންތަކެކެވެ.

ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ވަނީ ކިޔަވާ ނިމިގެން ނުވަތަ ގްރޭޑް 7 އާ ހަމައަށް ވިޔަސް ނިންމުމަށްފަހު ކިޔެވުމުގެ އިތުރު މަރުޙަލާއަކަށް ނުގޮސް، ކިޔެވުމުގެ އިތުރު ފުރުސަތެއް ނުލިބި އަދި ވަޒީފާއެއް އަދާނުކުރާ، 16 އަހަރުވެފައިވާ ކުދިން، ޤައުމީ ދިފާޢީ ބާރުގެ ރެކްރޫޓްމަންޓް ޕްރޮގްރާމްގައި ބައިވެރިވުން މަޖުބޫރުވާގޮތަށް ޤާނޫނެއް އެކުލަވާލަވާލުމަށާއި، ދިވެހިރާއްޖޭގެ ޤައުމީ ޚިދުމަތުގެ ޕްރޮގްރާމެއް 2025 ވަނަ އަހަރުން ފެށިގެން ކުރިޔަށް ގެންދެވުމަށް 4 ނޮވެންބަރ 2024 ގައި އިރުޝާދު ދެއްވައިފައެވެ.