ބައްޝާރުގެ ވެރިކަން ވެއްޓުމާއެކު ޖަލުތަކުގައި ތިބި ޢަސީރުން މިނިވަންކުރަން ފަށައިފި

ސީރިޔާގައި ހިނގަމުންދިޔަ ބައްޝާރުލް އަސަދުގެ އަނިޔާވެރި ވެރިކަން ވެއްޓުމާއެކު އޭނާގެ ވެރިކަމުގައި ސީރިޔާގެ ޖަލުތަކަށް ލައިިފައިތިބި ޢަސީރުންތައް މިނިވަންކުރަން ފަށައިފިއެވެ. 

ސީރިޔާގެ ދިމިޝްޤުން ރިޕޯޓު ކުރަމުން އަލްޖަޒީރާގެ ނޫސްވެރިޔާ ޒެއިނާ ޚުދުރް ބުނެފައިވަނީ ދިމިޝްޤަށް ދަތުރުކުރަމުންދިޔައިރު އެތަނުގެ ޑިޓެންޝަން ސެންޓަރުތަކުގައި ތިބި ޢަސީރުންގެ މައިން އެމީހުންގެ ދަރިން ހޯދަމުން ދިޔަ މަންޒަރު ފެނިފައިވާކަމަށެެވެ.

 އެމީހުންގެ ދަރިން އަދިވެސް ދިރިތިބިކަން އެނގި އުފަލުން ރޮމުންދިޔަ މަންޒަރުވެސް ފެނިގެން ގޮސްފައިވާކަމަށް ޒެއިނާ ބުނެފައިވެއެވެ. އަލްޖަޒީރާގައި ބުނެފައިވަނީ އިދިކޮޅު ބާރުތައް ދިމިޝްޤަށް ދަތުރުކޮށް ޝަރީޢަތެއް ނުވަތަ ދައުވާއެއް ނެތި ޖަލުތަކުގައި ބައިތިއްބާފައި ތިބި އެތައް ހާސް ޢަސީރުންނެއް މިނިވަން ކުރަމުންދާކަމަށެވެ. 

 އިދިކޮޅު ހަނގުރާމަވެރިންގެ އަތްދަށަށް ގޮސްފައިވާ ޖަލުތަކުގެ ތެރޭގައި އެތައް ހާސް ބަޔަކު މަރާލާފައިވާ އިންސާނުން ކަތިލާ ތަނެއްގެ ގޮތުގައި މަޝްހޫރު ސައިދުނާޔާ ޖަލު ހިމެނެ އެވެ. 

ބައްޝާރުލް އަސަދުގެ ވެރިކަން ވެއްޓުމާއިއެކު ދިމިޝްޤުވަނީ އެކި ޖަޒުބާތުތަކުން ފުރިފައެެވެ. ދިމިޝްޤުގެ މީހުން ބުނެފައިވަނީ މީގެ 13 އަހަރު ކުރިންސުރެ ދެކެމުންއަންނަ ހުވަފެނަކީ އަހުލުވެރިންނާއި އެކު މަގުތައްމަތިން ސުލްޙަވެރި ކަމާއެކު ބައްދަލުވުންކަމަށެވެ. އަދި އެމީހުން އެދެނީ ހަމައެކަނި ސުލްޙަ މަސަލަސް ކަން ކަމަށްވެސް ދިމިޝްޤުގެ މީހުންވަނީ ބުނެފައެވެ. ބޭނުންވީ ޑިމޮކްރަސީ އާއި މިނިވަންކަމާއި ޤާނޫނީ ވެރިކަން ކަމެއް ކަމަށްވެސް ދިމިޝްޤުގެ އަހުލުވެރިން ވަނީ ބުނެފައެވެ. 

 އެމީހުން ތަކުރާރުކޮށް ބުނެފައިވަނީ ބޭނުންވަނީ އިއްޒްތަތާއި އެމީހުން ކަރާމަތްކަމަށެވެ. ބައްޝާރުލް އަސަދުގެ ވެރިކަން ނިމުމަކަށް އައިސް މިހާރު މިއޮތީ މިކަން ލިބޭނެ ކަމުގެ އުއްމީދު އައުވެފައިކަމަށް ވެސް ދިމިޝްޤުގެ އަހުލުވެރިންވަނީ ބުނެފައެވެ. 

ދިމިޝްޤުގެ އިތުރުން ސޫރިޔާގެ އުތުރުގައި އޮންނަ ބައެއް އަވަށްތައް ކަމަށްވާ ޖާމޫސް،އަލް ފާރް، އަލް ދަންދަލިޔާ، ޖަބް ޢަރޫސް އަދި ޢައުން އަލް ދާދަތް އިދިކޮޅުގެ ބާރުގެ ދަށަށް ގެނެސްފައިވާ ކަމަށް އިދިކޮޅު ހަނގުރާމަވެރިން ވަނީ ބުނެފައެވެ.