އަތުގައި އޮތް ފޯނު ރަނގަޅިއްޔާ، އައު އައިފޯނެއް ގަތުމުގެ ބޭނުމަކީ ކޮބާ؟

ޒަމާނީ ދުނިޔޭގައި އިންސާނާގެ ދުވަހުގެ ދިރިއުޅުމުގެ އެންމެ މުހިންމު އެއް ބަޔަކަށް މޮބައިލް ފޯނު މިވަނީ ވެފައެވެ. މުއާމަލާތް ކުރުމާއި، އޮފީސް މަސައްކަތްތައް ނިންމުމާއި، ކިޔެވުމާއި އަދި ދުނިޔޭގެ އެކި ކަންކޮޅުތަކުގެ މައުލޫމާތު ހޯދުމުގެ ވައްޓަފާޅިއަށް މި ޓެކްނޮލޮޖީގެ ސަބަބުން މިވަނީ އިންގިލާބީ ބޮޑެތި ބަދަލުތަކެއް އައިސްފައެވެ. ދިވެހިރާއްޖޭގެ ބާޒާރަށް ބަލާއިރު ވެސް އެންމެ މަގުބޫލު އެއް ބްރޭންޑަކީ އެޕަލްގެ އައިފޯނެވެ. ތަފާސްހިސާބުތަކުން ދައްކާ ގޮތުގައި 2026 ވަނަ އަހަރުގެ ޖުލައި މަހުގެ ނިޔަލަށް، ރާއްޖޭގެ މޮބައިލް ވެންޑަރ މާކެޓްގެ 48.71 އިންސައްތަ ހިއްސާކުރަނީ އެޕަލްއެވެ. މިއީ ވާދަވެރި ސެމްސަންގްގެ 14.65 އިންސައްތައާ އަޅާބަލާއިރު ބޮޑު ތަފާތެކެވެ.

ނަމަވެސް އުފެދޭ މައިގަނޑު ސުވާލަކީ، އެޕަލްއިން ކޮންމެ އަހަރަކު ވެސް އައު އައިއޯއެސް (iOS) އާއި އައު ޑިޒައިންތަކާއެކު ނެރޭ އައިފޯނުތައް ހޯދުމަށް ދިވެހިން މިކުރާ އަވަސް ދަތުރަކީ ހަގީގަތުގައި ވެސް ބޭނުންތެރި ކަމެއް ހެއްޔެވެ؟ ޒަމާނީ ފަރުމާތަކުގެ ޖާދޫގައި ޖެހި، އަތުގައި އޮތް ފޯނު ރަނގަޅަށް މަސައްކަތް ކުރަނިކޮށް ލޯނު ނަގައިގެން ވެސް އައު ފޯނު ގަތުމުގެ ޓްރެންޑަކީ މާލީ ގޮތުންނާއި ބުއްދީގެ ހަމައިން ބަލާއިރު ކިހާވަރެއްގެ ކަމެއް ހެއްޔެވެ؟

އައު ޓެކްނޮލޮޖީއާއި އަޕްގްރޭޑްތަކުގެ ހަގީގަތް

އައު އައިފޯނެއް ނުކުންނަ އިރަށް ގަންނަން މީހުން ބޭނުންވާ މައިގަނޑު ސަބަބަކީ އޭގައި ހިމެނޭ އައު ޓެކްނޮލޮޖީއެވެ. އާންމުގޮތެއްގައި ކޮންމެ އައު މޮޑެލްއަކާއެކު ކެމެރާގެ ފެންވަރާއި، ޕްރޮސެސަރ، ބެޓެރި ލައިފް، ޑިސްޕްލޭ އަދި ސޮފްޓްވެއާގެ ދުވެއްޔަށް ކުރިއެރުންތައް ގެނެއެވެ. ޕްރޮފެޝަނަލް ފޮޓޯގްރާފަރުންނާއި، ވީޑިއޯ އުފައްދާ ފަރާތްތަކާއި، ގޭމް ކުޅޭ މީހުން ނުވަތަ ފޯނުން ބުރަ މަސައްކަތްތައް ކުރާ ފަރާތްތަކަށް މި ބަދަލުތަކަކީ ވަރަށް މުހިންމު ކަންކަމަށް ވެދާނެއެވެ. އެހެނީ އައު ފީޗާތަކުގެ ސަބަބުން މަސައްކަތްތައް އަވަސްވެ، ބޭނުންކުރަން ފަސޭހަވެގެންދެއެވެ.

ނަމަވެސް އާދައިގެ މުއާމަލާތްތަކާއި ސޯޝަލް މީޑިއާ ބޭނުންކުރާ އާންމު ފަރުދަކަށް މި ކުދިކުދި އަޕްގްރޭޑްތަކަކީ ކޮންމެހެން ކޮންމެ އަހަރަކު ބޮޑު އަގު ދީފައި ހޯދަންޖެހޭ ވަރުގެ ބަދަލުތަކެއް ނޫނެވެ. މީގެއިތުރުން، އެޕަލްއިން ދުވަސްވީ ފޯނުތަކަށް ވެސް އެތައް އަހަރެއް ވަންދެން ސޮފްޓްވެއަރ އަދި ސެކިއުރިޓީ އަޕްޑޭޓްތައް ފޯރުކޮށްދެއެވެ. މާނައަކީ އައު ފޯނެއް ނުގަނެ، ކުރީގެ މޮޑެލްއެއްގައި ވެސް އެންމެ ފަހުގެ އައިއޯއެސްގެ ރައްކާތެރިކަމާއި ފީޗާތައް ބޭނުންކުރުމުގެ ފުރުސަތު އޮވެއެވެ. ވުމާއެކު، އައު ފޯނެއް ނުކުތުމަކީ ކުރީގެ ފޯނު ބޭކާރުވާ ސަބަބެއް ނޫނެވެ.

މާލީ ބުރައާއި އަވަސް އަޕްގްރޭޑްގެ ގެއްލުން

އައު އައިފޯނުތައް ބާޒާރަށް ނެރޭއިރު އޭގެ އަގު ހުންނަނީ ވަރަށް މަތީގައެވެ. އަތުގައި އޮތް ފޯނު އެއްވެސް މައްސަލައެއް ނެތި  އޮއްވައި، ހަމައެކަނި ދެއްކުންތެރިކަމަށް ނުވަތަ ޓްރެންޑަކަށްޓަކައި އަހަރަކު އެއްފަހަރު ބޮޑު ހޭދައެއް ކުރުމަކީ އަމިއްލަ މާލިއްޔަތަށް ލިބޭ ބޮޑު ގެއްލުމެކެވެ. އިސްލާމީ ރިވެތި އުސޫލުތައް ވެސް ބާރުއަޅަނީ އިސްރާފު ނުކުރުމަށާއި، ބޭނުންތެރި ނޫން ކަންކަމުގައި ފައިސާ ބޭކާރު ނުކުރުމަށެވެ. އެ ފައިސާ މާ މުހިންމު ކަމަކަށް ރައްކާކުރުމަކީ ނުވަތަ ފޯނު އަގުހެޔޮވާ ވަގުތުތަކާއި، ޓްރޭޑް-އިން އޮފާތަކުގެ ބޭނުން ހިފުމަކީ މާ ބުއްދިވެރި ގޮތެކެވެ.

ދުވަސްވީ ފޯނުތައް ލަސްކުރުމުގެ މައްސަލަ: ހަގީގަތަކީ ކޮބާ؟

އައިފޯނުތަކުގެ ވާހަކަ ދެކެވޭއިރު، މީހުން އައު ފޯނު ގަތުމަށް މަޖުބޫރު ކުރުވުމުގެ ގޮތުން އެޕަލްއިން ގަސްދުގައި ދުވަސްވީ ފޯނުތަކުގެ ސްޕީޑް ލަސްކުރާ ކަމަށް (ޕްލޭންޑް އޮބްސޮލެސެންސް) ދެކެވޭ ވާހަކައަކީ ވެސް ބޮޑު ބަހުސެކެވެ. މި މައްސަލަ އެންމެ ބޮޑުވީ 2017 ވަނަ އަހަރު، ބެޓެރީ ބާވެފައިވާ ފޯނުތަކުގެ ޕާފޯމަންސް ސޮފްޓްވެއާ މެދުވެރިކޮށް ދަށްކުރި ކަމަށް އެޕަލް އިން އެއްބަސްވުމުންނެވެ. މިކަމުގެ ސަބަބުން އެޕަލްއަށް ބޮޑެތި ފާޑުކިޔުންތަކާއި ގާނޫނީ މައްސަލަތައް ކުރިމަތިވިއެވެ.

މިކަމާ ގުޅިގެން 2018 ވަނަ އަހަރު އޭބީސީ ނިއުސްއަށް ދެއްވި އިންޓަވިއުއެއްގައި އެޕަލްގެ ކުރީގެ ސީއީއޯ ޓިމް ކުކް ވަނީ މައާފަށް އެދިވަޑައިގެން، އެކަން ސާފުކޮށްދެއްވާފައެވެ. ކުކް ވިދާޅުވީ، ފޯނުތައް ސްލޯކޮށްލީ ބެޓެރީ ދަށްވުމުގެ ސަބަބުން ފޯނު ކުއްލިއަކަށް ނިވޭ މައްސަލަ ހައްލުކުރުމަށް ކަމަށެވެ. އަދި އޭގެ ފަހުން އެޕަލްއިން ވަނީ ބެޓެރީ ބަދަލުކުރުމުގެ އަގު ހެޔޮކޮށްދީ، ފޯނުގެ ޕާފޯމަންސް މެނޭޖްމަންޓް ކޮންޓްރޯލް ކުރެވޭ ފީޗާ ޔޫޒަރުންނަށް އަމިއްލައަށް ނިއްވާލެވޭނެ އިންތިޒާމު ހަމަޖައްސައިދީފައެވެ.

އެޕަލްއިން ކޮންމެ އަހަރަކު އައު ފޯނެއް ނެރުނު ކަމުގައި ވިޔަސް، އެ ފޯނު ގަތުމަކީ ކޮންމެހެން ކުރަންޖެހޭ ކަމެއް ނޫނެވެ. ނުވަތަ ވާޖިބެއް ނޫނެވެ. ތިމާގެ އަތުގައި އޮތް ފޯނުން ކޮންމެ ދުވަހަކު ކުރަންޖެހޭ މުއާމަލާތްތަކާއި މަސައްކަތްތައް ފަސޭހަކަމާއެކު ކުރެވޭނަމަ، ހަމައެކަނި ޓްރެންޑަކަށްޓަކައި އަގުބޮޑު ފޯނެއް ގަތުމަކީ ހިކުމަތްތެރި ގޮތެއް ނޫނެވެ. އެހެންކަމުން، އެންމެ ފަހުގެ ޓެކްނޮލޮޖީގެ ފަހަތުން ދުވުމުގެ ބަދަލުގައި، އަމިއްލަ މާލީ ހާލަތަށާއި ހަގީގީ ބޭނުމަށް ވިސްނައި، އަތުގައި އޮތް ފޯނުގެ ބޭނުން އެންމެ ފުރިހަމައަށް ހިފުމަކީ ދިރިއުޅުމަށް އެންމެ ފައިދާހުރި ގޮތެވެ.