ބޮޑު މޮޅަކާއެކު މެޑްރިޑުން ބާސެލޯނާ އާއި އޮތް ފަރަގު ކުޑަކޮށްފި

ސްޕެނިޝް ލަ ލީގާގެ ޕޮއިންޓު ޓޭބަލްގެ ވާދަވެރިކަން ބޮޑުވެ، 38 ޕޮއިންޓާއެކު ލީގުގެ އެއްވަނައިގައި އޮތް ބާސެލޯނާއާއި ދެ ޕޮއިންޓު ކައިރިޔަށް ރެއާލް މެޑްރިޑް ޖެހިލައިފިއެވެ. ހޮނިހިރު ދުވަހުގެރޭ 3-0 އިން ޖިރޯނާ ބަލިކުރުމުން ދެވަނައިގައި އޮތް މެޑްރިޑަށް މިހާރު 36 ޕޮއިންޓު ލިބިފައިވާއިރު، އެ ޓީމަށް ވުރެން އިތުރަށް ބާސެލޯނާއިން ވަނީ އެއް މެޗު ކުޅެފައެވެ.

މެޑްރިޑުން ޖިރޯނާ ބަލިކުރި މެޗުގެ ފުރަތަމަ ގޯލު ކާމިޔާބުކުރީ، އެ ޓީމަށް ކުޅޭ އިނގިރޭސި ކުޅުންތެރިޔާ ޖޫޑް ބެލިންގްހަމްއެވެ. ޖިރޯނާގެ ޑިފެންޑަރުންނަށް ރަގަޅަށް ސާފު ނުކޮށްލެވުނު ބޯޅައެއް، ޕެނަލްޓީ އޭރިޔާގެ މެދު ތެރެއިން ތިރިތިރިން ގޯލަށް އަމާޒުކޮށް ފޮނުވާލައި އޭނާ މެޑްރިޑަށް ލީޑު ނަގައިދިނީ މެޗުގެ 36 ވަނަ މިނެޓުގައެވެ.

މެޑްރިޑުން މެޗުގެ ފުރަތަމަ ހާފު ނިންމާލީ ރަގަޅު ފޯމެއްގައި އޮވެއެވެ. އަދި އެ ޓީމުން ވަނީ އެ ފޯމުގައި ދެވަނަ ހާފު ވެސް ކުރިޔަށް ގެންގޮސްފައެވެ. އަދި ދެވަނަ ހާފުގެ 10 ވަނަ މިނެޓުގައި، ޖިރޯނާގެ ޑިފެންސް ލައިނުގެ ތެރެއިން ބެލިންގްހަމް، އެ ޓީމުގެ ފޯވާޑް އަރދާ ގޫލާއަށް މޮޅު ޕާހެއް ފޮނުވާލުމުން، އޭނާ ވަނީ ޖިރޯނާގެ ޕެނަލްޓީ އޭރިޔާ ތެރެއަށް ވަނުމަށްފަހު މެޑްރިޑުގެ ލީޑު ފުޅާކޮށްދީފައެވެ.

އޭގެ އިތުކޮޅެއް ފަހުން ކީލިއަން އެމްބައްޕޭ މެޑްރިޑުގެ 3 ވަނަ ގޯލު ކާމިޔާބު ކުރިއެވެ. އެއީ އޭނާ މި ސީޒަނުގައި ކާމިޔާބުކުރި 9 ވަނަ ލީގު ގޯލެވެ. 

މީގެ އިތުރުން، އެއީ އެމްބައްޕޭގެ ސީނިއަރ ކެރިއަރުގެ 200 ވަނަ ގޯލު ވެސް މެއެވެ. އެމްބައްޕޭ މޮނާކޯއަށް 6 ގޯލު ކާމިޔާބުކުރިއިރު، ޕީއެސްޖީގެ ޖާރޒީގައި އޭނާ ވަނީ 175 ގޯލު ކާމިޔާބުކޮށްފައެވެ.