އެކްސަސައިޒް “ރަންނަމާރި ހަންޓް 2024” ފަށައިފި

ދިވެހި ސިފައިންގެ ޤާބިލުކަން އިތުރުކުރުމަށް ބާއްވަމުން އަންނަ އެކްސަސައިޒް “ރަންނަމާރި ހަންޓް 2024” ފަށައިފިކަމަށް މޯލްޑިވްސް ނޭޝަނަލް ޑިފެންސް ފޯސްއިން ބުނެފިއެވެ. 

އެމްއެންޑީއެފުން ބުނެފައިވަނީ މި އެކްސަަސައިޒް ފެށުމުގެ ގޮތުން ބަންޑާރަކޮށީ އޮޑިޓޯރިއަމްގައި މިއަދު ބޭއްވި ޚާއްޞަ ރަސްމިއްޔާތު ޝަރަފުވެރިކޮށްދެއްވީ ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާޙީމް ޙިލްމީ ކަމަށެވެެ.

މި ރަސްމިއްޔާތުގައި ޗީފް އޮފް ޑިފެންސް ފޯސް ވަނީ ބައިވެރިންނާ މުޚާޠަބު ކުރައްވައި ވާހަކަފުޅު ދައްކަވާފައެވެ. 

މި މަހުގެ 8 އިން 19 އަށް ބަންޑާރަކޮށީ އޮޑިޓޯރިއަމްގައި ކުރިއަށްދާ މި އެކްސަސައިޒްގައި ބައިވެރިވެފައި ވަނީ އެމްއެންޑީއެފް ހުރިހާ ކޯރތަކެއް ހިމެނޭ ގޮތުން ޖުމްލަ 39 ބައިވެރިން ކަމަށް އެމްއެންޑީއެފުން ބުނެއެވެ.

އެކްސަސައިޒް "ރަންނަމާރި ހަންޓް" ގެ މަޤުޞަދަކީ އެމްއެންޑީއެފް ސަރވިސްތަކުގެ މެދުގައި އޮޕަރޭޝަންތައް ހިންގުމުގައި ޖޮއިންޓްނެސް ވަރުގަދަ ކުރުމާއި އަދި ޖޮއިންޓް ޕްލޭނިންއަށް އަހުލުވެރި ކުރުވުމުގެ ގޮތުން، ޖޮއިންޓް ޕްލޭނިންގ ޕްރޮސެސް (ޖޭޕީޕީ) ކިޔަވައިދީ، ޢަމަލީ މައިދާނުގައި ބޭނުންކުރާނެ ގޮތް ދަސްކޮށްދިނުން ކަމަށް ޤައުމީ ދިފާޢީ ބާރުން ވަނީ ބުނެފައެވެ.

އެކްސަސައިޒް ރަންނަމާރި ހަންޓް ފެށުމުގެ ރަސްމިއްޔާތުގައި ޗީފް އޮފް ޑިފެންސް ފޯސްގެ އިތުރުން ހުރިހާ ކޯރތަކުގެ ކޮމަޑާންޓުން ބައިވެރިވެވަޑައިގެންނެވިކަމަށްެވެސް އެމްއެންޑީއެފުން ބުނެފައިވެއެވެ.