އެކްސިޑެންޓާ ގުޅިގެން އެންޓޯނިއޯ އެއްކޮށް ކުޅުން ހުއްޓާލަން ޖެހިދާނެކަމުގެ ބިރު އެބައޮތް

އިންގްލިޝް ޕްރިމިއަރ ލީގުގެ ވެސްޓް ހޭމް ޔުނައިޓެޑުގެ ކުރިޔަށް ކުޅެމުން އަންނަ މިޝައިލް އެންޓޯނިއޯއަށް ނުރައްކާތެރި ކާރު އެކްސިޑެންޓެއްގައި ބޮޑު އަނިޔާތަކެއް ވެފައިވާއިރު، މި ސީޒަނުގައި އޭނާއަށް ދެން ނުކުޅެވޭނެއެވެ. އަދި މި އެކްސިޑެންޓުގެ ސަބަބުން އޭނާ އެއްކޮށް ފުޓުބޯޅަ ކުޅުން ހުއްޓާލަން ޖެހުން ވެސް އެކަށީގެންވެއެވެ. 

އެންޓޯނިއޯއަށް ލިބުނު ގެއްލުންތަކާ ގުޅިގެން އޭނާގެ ފައިގެ އޮޕަރޭޝަނެއް އާދީއްތަ ދުވަހު ކޮށްފައިވާކަމަށް، ވެސްޓް ހޭމްއިން ނެރުނު ބަޔާނެއްގައި ބުނެފައިވެއެވެ. އަދި މި އޮޕަރޭޝަނަށްފަހު އަނިޔާތަކުން އެއްކޮށް ފަސޭހަވުމަށް މަދުވެގެން އެއް އަހަރު ހޭދަވާނެކަމަށް ބެލެވިފައިވާއިރު، ބަލިން ފަސޭހަވުމުގެ ކަންތައްތައް އެންމެ ރަގަޅަށް ނުގޮސްފިނަމަ އުމުރުން 34 އަހަރުގެ އެންޓޯނިއޯ ދެން ދަނޑުމަތިން ނުފެނުމަކީ ވެސް ދުރުކަމެއް ނޫނެވެ.

ވެސްޓް ހޭމްއިން އާދީއްތަ ދުވަހު ނެރުނު ބަޔާނުގައި ބުނީ، އެންޓޯނިއޯގެ "ލޯވަރ ލިމްބް"ގެ ސާޖަރީއެއް ކޮށްފައިވާ ކަމަށާއި، އޭނާގެ ހާލަތު ވަރަށް ކައިރިން މޮނިޓަރ ކުރަމުން އަންނަ ކަމަށެވެ. އެ ބަޔާނުގައި އިތުރަށް ބުނެފައިވަނީ، މި ހާދިސާއާއި ގުޅިގެން މުޅި ފުޓުބޯޅަ އައިލާ މާޔޫސްވެ، މި ހިތާމައިގައި ބައިވެރިވެފައިވާތީ ޝުކުރު އަދާކުރާ ކަމަށެވެ. 

މީގެ އިތުރުން، އެކްސިޑެންޓު ހިނގިތާ ގިނަ އިރުތަކެއް ނުވެ، އެމެޖެންސީ ހިދުމަތްދޭ ފަރާތްތަކުން ހަރަކާތްތެރިވެ އެންޓޯނިއޯ އަވަހަށް ހޮސްޕިޓަލަށް ގެންދިޔައީތީ އެކަމަށް ވެސް ޝުކުރު އަދާކޮށްފައިވެއެވެ. 

މި އެކްސިޑެންޓަށްފަހު ވެސްޓް ހޭމް ކުޅޭ ފުރަތަމަ މެޗު އޮންނާނީ މިރެއެވެ. މިރޭ އެ ޓީމުން ވޫލްސްއާ ދެކޮޅަށް ނިކުންނައިރު، އެ ޓީމު ވަނީ އެންމެ ފަހުން ކުޅުނު ދެ މެޗުން ވެސް ބަލިވެފައެވެ.

އެސެކްސް ޕޮލިސް އިން ހާމަކޮށްފައިވާ ގޮތުގައި، މި ހާދިސާ އަންނަނީ ތަހުގީގު ކުރަމުންނެވެ. އަދި ހާދިސާއާ ގުޅޭ ވީޑިއޯ ފޫޓެޖެއް އޮތްނަމަ، ޕޮލިހުންނާއި ހިއްސާ ކޮށްދިނުމަށް ވެސް ވަނީ އެދިފައެވެ.

ކުޑަ ވަގުތު ކޮޅެއްގެ ތެރޭގައި އެކްސިޑެންޓުވި ސަރަހައްދަށް ހާޒިރުވި އެސެކްސް ފަޔަރ ސަރވިސަސް އިން ބުނީ، އެ ސަރވިސަސްއިން އެ ތަނަށް ދިޔައިރު ކާރު ދުއްވަން އިން އެންޓޯނިއޯ އޮތީ ތާށިވެފައި ކަމަށެވެ. އަދި އެ ޓީމުގެ މަސައްކަތުން އޭނާ ވަގުތުން ސަލާމަތް ކުރެވުނު ކަމަށް ވެސް ބުނެފައިވެއެވެ.

އިނގިރޭސިވިލާތަށް އުފަން ޖެމެއިކާގެ އޮންޓޯނިއޯ، ވެސްޓް ހޭމްއަށް ކުޅެމުން އަންނަތާ މިއީ 10 ވަނަ ސީޒަނެވެ. އޭނާ ވެސްޓް ހޭމްއާ ގުޅުނީ ނޮޓިންހަމް ފޮރެސްޓްއިން 2015 ވަނަ އަހަރުއެވެ. އޭގެ ފަހުން ވެސްޓް ހޭމްއަށް 323 މެޗު ކުޅެދީފައިވާއިރު، އޭނާ ވަނީ މިހާތަނަށް އެ ކްލަބަށް 83 ގޯލު ކާމިޔާބުކޮށްދީފައެވެ.