ފުލަމްއާ ދެކޮޅަށް ކުޅުނު މެޗުން މޮޅު ނުވެވި، އާސެނަލް ފަހަތަށް ފިޔަވަޅެއް

އިންގްލިޝް ޕްރިމިއަރ ލީގުގައި އާސެނަލްއިން ފުލަމްއާ ދެކޮޅަށް ކުޅުނު މެޗު 1-1 އިން އެއްވަރުވެ، އެ ޓީމަށް މުހިންމު ޕޮއިންޓުތަކެއް ގެއްލިއްޖެއެވެ. ފުލަމްގެ ކްރޭވަން ކޮޓޭޖުގައި އާދީއްތަ ދުވަހުގެރޭ ކުޅުނު މި މެޗުގެ ނަތީޖާގެ ސަބަބުން، މިވަގުތު ލީގުގެ އެއްވަނައިގައި އޮތް ލިވަޕޫލާއި 4 ޕޮއިންޓު ކައިރިއަށް ޖެހިލުމަށް އާސެނަލްއަށް ލިބުނު ފުރުސަތު މިވަނީ ބޭކާރުވެފައެވެ.

ފުލަމްއިން ވަނީ މި މެޗުގެ 11 ވަނަ މިނެޓުގައި ލީޑު ނަގާފައެވެ. އެ ޓީމުގެ ކައުންޓަރ އެޓޭކެއްގައި މި ގޯލު ކާމިޔާބުކުރީ، ފުރަތަމަ އެގާރައިގައި އަލުން ހިމެނިގެން ކުޅެން ނިކުތް ރައުލް ހިމެނޭޒްއެވެ. ކަނާތް ފަރާތުން ދުއްވާލި ތުރޫ ބޯޅައެއް ހޯދައި އާސެނަލްގެ އޭރިއާ ތެރެއަށް ވަނުމަށްފަހު، ތިރިތިރިން ދުރު ފަރާތަށް އޭނާ ފޮނުވާލި ބޯޅަ ގޮސް ގޯލަށް ވަނީ، އާސެނަލްގެ ގޮލްކީޕަރ ޑޭވިޑް ރާޔާގެ އަތް ނުފޯރައިގެނެވެ.

ފުލަމްގެ ގޯލަށްފަހު އާސެނަލްއިން ވަނީ މެޗުގެ ކޮންޓްރޯލް ނަގާފައެވެ. ނަމަވެސް ފުލަމްގެ ޑިފެންސް ފޫއަޅުވާލެވޭ ވަރުގެ ނުރައްކާތެރި ހަމަލާއެއް އެ ޓީމަށް އުފެއްދިފައެއް ނުވެއެވެ. ނަމަވެސް ސަކާގެ ހަމަލާއަކުން ފުލަމްގެ ގޯލްކީޕަރު ބާންޑް ލެނޯ ވަނީ އެއް ފަހަރު ޓެސްޓު ކޮށްލެވިފައެވެ.

އާސެނަލްއަށް މެޗުގެ ނަތީޖާ ހަމަހަމަ ކުރެވުނީ ދެވަނަ ހާފުގެ 7 ވަނަ މިނެޓުގައި ޑެކްލެން ރައިސް ނަގައިދިން ކޯނަރަކުންނެވެ. ފުލަމްގެ ގޯލު އޭރިއާ ތެރެއަށް ދުވެފައި ވަތް ކައި ހަވަޓްސްއަށް ކޯނަރު އަމާޒުވިއިރު، އޭނާ ބޮލުން އެ ބޯޅަ ގޯލު ކުރިމައްޗަށް ހުރަސްކޮށްލުމުން ގޯލުގެ ކުރިމަތީގައި ހުސްކޮށް ހުރި އާސެނަލްގެ ޑިފެންޑަރު ވިލިއަމް ސަލީބާ ވަނީ އެ ބޯޅަ ގޯލުގެ ތެރެއަށް ފޮނުވާލާލައި މެޗުގެ ނަތީޖާ ހަމަހަމަކޮށްފައެވެ.

މެޗު ނިމެން 2 މިނެޓަށް ވެފައިވަނިކޮށް، އާސެނަލްއަށް މެޗުން މޮޅު ވެވުނު ފަދައެވެ. ފުލަމްގެ ގޯލު ކުރިމައްޗަށް ހުރަސްކޮށްލި ބޯޅައެއް އާސެނަލްގެ ބުކާޔޯ ސަކާ ބޮލުން ގޯލުގެ ތެރެއަށް ޖައްސާލިއިރު، ވީޑިއޯ އެސިސްޓެންޓް ރެފްރީ ނިންމީ އެ ބޯޅަ ހުރަސް ކޮށްދިން މާޓިނެލީއަށް ބޯޅަ ލިބުނު އިރު އޭނާ ހުރީ އޮފްސައިޑުގައި ކަމަށެވެ.

އާސެނަލްއަށް މި މެޗުން ޕޮއިންޓެއް ލިބުނު އިރު، އެ ޓީމާ އެންމެ ކައިރީގައި އޮތް ޗެލްސީއިން ޓޮޓެންހަމް ބަލިކުރުމަށްފަހު 3 ޕޮއިންޓު ހޯދުމުން، 29 ޕޮއިންޓާއެކު އާސެނަލް މިހާރު އޮތީ ލީގުގެ ތިން ވަނައިގައެވެ. އަދި ލީގުގެ އެއްވަނައިގައި އޮތް ލިވަޕޫލަށް ވުރެން އިތުރަށް އެ ޓީމުން މެޗެއް ކުޅެފައިވާއިރު، ދެ ޓީމުގެ ދޭތެރޭގައި 6 ޕޮއިންޓުގެ ފަރަގެއް އެބައޮތެވެ.