ކުޅިވަރު

ލަންޑަންގެ ދެ ޓީމުގެ ކުރިމަތި ލުމުގައި ހަތް ގޯލު ފެނުނުއިރު، ޗެލްސީ އިން ލީގު ރޭހުގައި އަތްގަދަކޮށްފި

ލަންޑަންގެ ދެ ޓީމުގެ ކުރިމަތި ލުމުގައި ހަތް ގޯލު ފެނުނުއިރު، ޗެލްސީ އިން ލީގު ރޭހުގައި އަތްގަދަކޮށްފި

ޓޮޓެންހަމް ކޮޅަށް ގޯލު ޖެހުމަށްފަހު ޗެލްސީގެ ކުޅުންތެރިން އުފާފާޅު ކުރަނީ--- ފޮޓޯ: ގެޓީ އިމޭޖަސް

މިފްތާޙް މުޙައްމަދު

މިފްތާޙް މުޙައްމަދު

09 ޑިސެމްބަރު 2024، 10:35

09 ޑިސެމްބަރު 2024، 10:35

ހުލާސާ

ލަންޑަނަށް ނިސްބަތްވާ ޓޮޓެންހަމް ހޮޓްސްޕަރ އާއި ޗެލްސީ ބައްދަލުކުރި މެޗުގައި 7 ގޯލު ފެނިގެން ދިޔައިރު، ކޯލް ޕާމާ ކާމިޔާބުކުރި ދެ ޕެނަލްޓީއިން ޓޮޓެންހަމްގެ މައްޗަށް ޗެލްސީއިން ކުރި ހޯދައި، އެ ޓީމުން ވަނީ ލީގުގެ އެއްވަނައިގައި އޮތް ލިވަޕޫލާއި 4 ޕޮއިންޓު ކައިރިއަށް ޖެހިލާފައި.

ލަންޑަނަށް ނިސްބަތްވާ ޓޮޓެންހަމް ހޮޓްސްޕަރ އާއި ޗެލްސީ ބައްދަލުކުރި މެޗުގައި 7 ގޯލު ފެނިގެން ދިޔައިރު، ކޯލް ޕާމާ ކާމިޔާބުކުރި ދެ ޕެނަލްޓީއިން ޓޮޓެންހަމްގެ މައްޗަށް ޗެލްސީއިން ކުރި ހޯދައިފިއެވެ. އަދި މި ނަތީޖާއާއެކު، އެ ޓީމުން ވަނީ ލީގުގެ އެއްވަނައިގައި އޮތް ލިވަޕޫލާއި 4 ޕޮއިންޓު ކައިރިއަށް ޖެހިލާފައެވެ.

ލަންޑަންގެ ޓޮޓެންހަމް ހޮޓްސްޕަރ ސްޓޭޑިއަމްގައި ކުޅުނު މި ފޯރި ގަދަ މެޗު ޗެލްސީއިން ކާމިޔާބުކުރީ 4-3 އިންނެވެ. 

މެޗުގެ ފުރަތަމަ 11 މިނެޓުގެ ތެރޭގައި ޓޮޓެންހަމްއިން ދެ ގޯލުގެ ލީޑެއް ނެގިއެވެ. މި ދެ ގޯލުގައި ވެސް ޓޮޓެންހަމްގެ ކުޅުންތެރިން ފައިދާ ނެގީ، ޗެލްސީގެ ޑިފެންޑަރ މާކް ކުކުރެލާ ޑިފެންސް ކުރުމުގެ ތެރޭގައި ކައްސާލުމުންނެވެ.

ކުކުރެލާ ކައްސާލުމުގެ ފައިދާ ފުރަތަމަ ނެގީ ސްޕާސްގެ ކަނާތް ފަރާތުން ކުޅެމުން ދިޔަ ބްރެނަން ޖޯންސަންއެވެ. އޭނާއަށް ލިބުނު ހުސްޖާގައަށް ގޮސް ޗެލްސީގެ ގޯލު ކުރިމައްޗަށް ހުރަސްކޮށްލި ބޯޅަ ގޯލުގެ ތެރެއަށް ފޮނުވާލީ ޑޮމިނިކް ސޮލަކީއެވެ. އަދި އޭގެ 6 މިނެޓުފަހުން އެ ޓީމަށް ލީޑު ފުޅާކޮށްދިނީ ޑީޖަން ކްލުސެވްސްކީއެވެ. 

މެޗުގެ ކުރީކޮޅު އިދިކޮޅު ޓީމުން ރަގަޅު ލީޑެއް ނެގިނަމަވެސް، ޗެލްސީއިން ހިތްވަރު އެލުވާ ނުލައި މެޗުގެ ތެރެއަށް ވަނުމަށް މަސައްކަތް ކުރިތަން ފެނުނެވެ. އެގޮތުން، ޗެލްސީއިން ވެސް މެޗުގެ ކުރީކޮޅު ގޯލެއް ކާމިޔާބު ކުރިއެވެ. ޗެލްސީގެ ވާތް ފަރާތުން ކުޅޭ ޖޯޑަން ސަންޗޯއަށް ލިބުނު ހުސް ޖާގައިގެ ބޭނުން ހިފައި އެތެރެއަށް ވަނުމަށްފަހު، ސްޕާސްގެ ޕެނަލްޓީ އޭރިއާ ބޭރުން އޭނާ ފޮނުވާލި ބޯޅަ ތިރިތިރިން ގޮސް ވަނީ ގޯލުގެ ދުރު ފަރާތަށެވެ. 

އެ ގޯލަށްފަހު މެޗުގެ ނަތީޖާ ހަމަހަމަ ކުރުމަށް ޗެލްސީއަށް ރަގަޅު ފުރުސަތެއް ލިބުނެވެ. ނަމަވެސް ސަންޗޯ ތަނަވަސްކޮށްދިން ފުރުސަތެއްގައި ކޯލް ޕާމާ ގޯލަށް ފޮނުވާލަން މަސައްކަތްކުރި ބޯޅަ ޓޮޓެންހަމްގެ ޑިފެންޑަރުން ވަނީ ހުޝިޔާރުކަމާއެކު ދިފާއުކޮށްފައެވެ.

ޗެލްސީއަށް މެޗުގެ ނަތީޖާ ހަމަހަމަ ކުރެވުނީ ދެވަނަ ހާފުގައި ލިބުނު ޕެނަލްޓީއަކުންނެވެ. ޗެލްސީގެ މޫސަސް ކައިސޭޑޯއަށް ޔުވެސް ބިސޫމާ ކުރި ފައުލަކަށް ލިބުނު މި ޕެނަލްޓީ ޖެހުމަށް ނިކުތީ ޕާމާއެވެ. ޓޮޓެންހަމްގެ ކީޕަރު ނުބައި ފަރާތަށް ފޮނުވާލުމަށްފަހު ޕާމާ މެޗުގެ މަތީޖާ ހަމަހަމަކުރީ 61 ވަނަ މިނެޓުގައެވެ. 

ޗެލްސީއިން މެޗުގެ އޮއިވަރު އެ ޓީމުގެ ކޮޅަށް އަނބުރާލީ މެޗު ނިމެން ގާތްގަނޑަކަށް 20 މިނެޓަށްވެފައި ވަނިކޮށެވެ. ޓޮޓެންހަމްގެ ޕެނަލްޓީ އޭރިއާ ތެރެއިން ޕާމާ ގޯލަށް ފޮނުވާލަން މަސައްކަތްކުރި ބޯޅައެއް ޓޮޓެންހަމް ކުޅުންތެރިއެއްގެ ގައިގަ ޖެހުމަށްފަހު ގޮސް ވެއްޓުނީ ޕެނަލްޓީ އޭރިއާ ތެރޭގައި ހުރި އެންޒޯ ފެނާންޑޭޒްގެ ކުރިމައްޗަށެވެ. ކޮންޓްރޯލް ކުރުމެއް ނެތި އެއް ޓަޗުން ބޯޅަ ގޯލުގެ ތެރެއަށް ފޮނުވާލުމަށްފަހު ޗެލްސީއިން ފުރަތަމަ ފަހަރަށް މެޗުގައި ލީޑު ނެގިއެވެ.

ޗެލްސީއިން އެ ޓީމުގެ ލީޑު ފުޅާ ކުރީ އަނެއްކާ ވެސް ޕެނަލްޓީއަކުންނެވެ. ޕާމާއަށް ކުރި ފައުލަކަށް ލިބުނު ޕެނަލްޓީ، އޭނާ މިފަހަރު ގޯލަށް ފޮނުވާލީ މަޝްހޫރު ޕެނަންކާ ސްޓައިލަށެވެ. 

މެޗު ނިމުމުގެ ކުރިން، އިތުރު ވަގުތުގެ 6 ވަނަ މިނެޓުގައި ޓޮޓެންހަމްއިން އިތުރު ގޯލެއް ކާމިޔާބުކޮށް ފަރަގު ކުޑަކުރިއެވެ. ޖޭމްސް މެޑިސަންގެ ހުރަހަކުން ސޮން މި ގޯލު ކާމިޔާބުކުރިއިރު، މެޗުގައި އިތުރު ގޮތެއް ހަދާނެ ވަގުތެއް އެ ޓީމަކަށް ނެތެވެ.

މި މެޗާއެކު ޗެލްސީއިން މިހާރު މިވަނީ އެ ޓީމުން އެންމެ ފަހުން ކުޅުނު 4 މެޗު ކާމިޔާބުކޮށް ލީގުގެ ކާމިޔާބު ކުރުމުގެ ރޭހަށް ރަގަޅަށް އަތްގަދަކޮށްފައެވެ.

މި ލިޔުން ކިޔާލުމުން

Ads by MSS