މިފްކޯގެ ސީއީއޯގެ މަޤާމަށް 20 އަހަރުގެ ތަޖުރިބާހުރި ޔޫކްރެއިންގެ ބޭފުޅެއް ޢައްޔަންކޮށްފި

މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ގެ ސީއީއޯގެ މަޤާމަށް ޔޫކްރެއިންގެ ބޭފުޅެއް ކަމަށްވާ ޑރ. ވިތާލީ ލުބިމޮފް ޢައްޔަންކޮށްފިއެވެ. މިއީ މިފްކޯގެ ތާރީޚުގައި ފުރަތަމަ ފަހަރަށް ބޭރުގެ ބޭފުޅަކު މި މަޤާމަށް ޢައްޔަންކުރެވުނު ފަހަރެވެ.

މިފްކޯއިން މަޢުލޫމާތު ދެއްވިގޮތުގައި، ޑރ. ވިތާލީއަކީ ވިޔަފާރީގެ ދާއިރާގައި 20 އަހަރުގެ ތަޖުރިބާ ލިބިވަޑައިގެންފައިވާ ބޭފުޅެކެވެ. އަދި މާދަމާއިން ފެށިގެން އޭނާ ރަސްމީކޮށް މަސައްކަތާ ޙަވާލުވެވަޑައިގަންނަވާނެ ކަމަށްވެސް ވިދާޅުވިއެވެ.

މިފްކޯގެ ކުރީގެ ސީއީއޯ އަޙްމަދު ޝަމާހު ރަޝީދު މެއި މަހުގެ ތެރޭގައި މަޤާމުން ވަކިކުރެއްވުމާ ގުޅިގެން، އައު ސީއީއޯއެއް ހޯދުމަށް ދެ ފަހަރެއްގެ މަތިން އިޢުލާންކުރެވުނެވެ. އެހެންނަމަވެސް، ސަރުކާރުގެ ކުންފުނިތަކުގެ ބެލެނިވެރި ފަރާތްކަމަށްވާ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން މިހާތަނަށް ޑރ. ވިތާލީގެ ޢައްޔަންކުރެއްވުން ރަސްމީކޮށް އިޢުލާންކުރައްވާފައެއް ނުވެއެވެ.

ކުރިން ކުރެވުނު އިޢުލާނުގައި ބަޔާންކޮށްފައިވާ ގޮތުން، ސީއީއޯގެ މަޤާމަށް ކުރިމަތިލާ ފަރާތްތަކަކީ މަދުވެގެން 8 އަހަރު މަސްވެރިކަމާ ގުޅުންހުރި ކުންފުންޏެއް ހިންގުމުގެ ތަޖުރިބާ ހުރި، އަދި މަދުވެގެން 4 އަހަރު މަސްވެރިކަމާ ގުޅުންހުރި ބައިނަލްއަޤްވާމީ ކުންފުންޏެއް ހިންގުމުގެ ތަޖުރިބާ ހުރި ފަރާތަކަށް ވާންޖެހެއެވެ.

1993 ވަނަ އަހަރު އުފެދުނު މިފްކޯއަކީ ރާއްޖޭގެ މަސްވެރިކަމުގެ ސިނާޢަތް ކުރިއެރުވުމަށް އުފައްދާފައިވާ ކުންފުންޏެކެވެ. ނަމަވެސް، މިވީ ދިގު މުއްދަތުގެ ތެރޭގައި މިފްކޯއަކީ ދައުލަތަށް މާލީގޮތުން ބުރަ ބޮޑުވެފައިވާ ކުންފުންޏަކަށް ވެފައިވެއެވެ. މި ހާލަތު ބަދަލުކޮށް، ކުންފުނީގެ ހިންގުން ހަރުދަނާކުރުމަށްޓަކައި ސަރުކާރުން ނިންމެވީ ހިންގުމުގެ ދާއިރާގެ ތަޖުރިބާ ލިބިފައިވާ ބޭރުގެ ބޭފުޅެއް ކުންފުންޏަށް ގެނައުމަށެވެ.