ސޫރިޔާގެ ރައީސް އަސަދު މޮސްކޯގައި ، ހުންނެވީ ރަޝިޔާގެ ހިމާޔަތުގަ

ސޫރިޔާގެ ރައީސް ބައްޝާރް އަލް-އަސަދު މި ވަގުތު ހުންނެވީ ރަޝިޔާގެ ވެރިރަށް މޮސްކޯގައި، ރަޝިޔާ ސަރުކާރުން ޙިމާޔަތް ހޯއްދަވައިގެން ކަން ހާމަވެއްޖެއެވެ. އަސަދާއި އޭނާގެ ޢާއިލާ، ސޫރިޔާ ދޫކޮށް ފިއްލަވައިގެން ވަޑައިގަންނަވާފައި ވަނީ، ހަޔިއަތު ތަޙްރީރް އަލް-ޝާމް (އެޗްޓީއެސް) އަދި އެ ޤައުމުގައި ހަރަކާތްތެރިވާ ހަތތެރިވާ ހަތިޔާރު އެޅި އެހެން ޖަމާޢަތްތަކުން ނުރައްކާތެރި ޢުދުވާނެއް ފަށައި، ވެރިރަށް ދިމިޝްޤަށް ވެރިވެގަތުމާ އެކުގައެވެ.

ރަޝިޔާގެ ޚާރިޖީ ވުޒާރާއިން މިއަދު ހާމަކުރި ގޮތުގައި، ސޫރިޔާގެ ރައީސް އަސަދު މިހާރު ހުންނެވީ މޮސްކޯގައެވެ. އަދި ސުލްޙަވެރިކަމާ އެކު ސޫރިޔާގެ ވެރިކަން ފުރޮޅުމުގެ ފުރުޞަތު ދެއްވަން އޭނާ ނިންމަވާފައިވާ ކަމަށް ވެސް އެ ވުޒާރާއިން ބުންޏެވެ. މިއީ 23 އަހަރު ދުވަހުގެ އަސަދުގެ ވެރިކަން ނިމުމަކަށް އައިސްފައިވާ ކަމުގެ ނިޝާނެކެވެ.

އެޗްޓީއެސްގެ ހަނގުރާމަވެރިން ދިމިޝްޤަށް އަރާފައި ވަނީ އެއްވެސް ހުރަހަކާ ނުލައެވެ. ދިމިޝްޤު ދިފާޢު ކުރަން ސޫރިޔާގެ އަސްކަރިއްޔާއިން ހަރުދަނާ ފިޔަވަޅުތަކެއް އަޅާފައި ނުވާ ކަމަށް މަސްރަޙު ދިރާސާ ކުރާ ފަރާތްތަކުން ބުނެއެވެ.

ރަޝިޔާގެ އިންޓަރފެކްސް ނޫސް އޭޖެންސީއަށް މަޢުލޫމާތު ދެމުން ރަޝިޔާ ރިޔާސީ ގަނޑުވަރު، ކްރެމްލިންގެ މަޞްދަރުތަކުން ބުނީ "ސޫރިޔާގެ ރައީސް އަސަދާއި އޭނާގެ ޢާއިލާ ވަނީ މޮސްކޯއަށް ދަތުރު ކޮށްފައި. އިންސާނިއްޔަތު ކަން އިސްކޮށް ރަޝިޔާއިން ވަނީ އެ ބޭފުޅުންނަށް ޙިމާޔަތް ދީފައި" ކަމަށެވެ.

އަސަދު ސުލްޙަވެރިކަމާ އެކު ސޫރިޔާގެ ސަރުކާރު ބަދަލުވުމުގެ ފުރުޞަތު ދެއްވަން ނިންމަވާފައިވާ ކަމަށާއި، ސަރުކާރާއި ހަނގުރާމަވެރި ޖަމާޢަތްތަކާ ދެމެދު ބާއްވާ މަޝްވަރާތައް ވިލަރެސް ކުރަން ޖެހޭނީ އދ މެދުވެރިކޮށް ކަމަށް އޭނާ ޤަބޫލު ކުރައްވާ ކަމަށް ވެސް އެ މަޞްދަރުތަކުން ބުންޏެވެ.

2011 އިން ފެށިގެން ހިނގަމުން އައި ސޫރިޔާގެ ދާޚިލީ ހަނގުރާމައިގައި އަސަދުގެ ސަރުކާރަށް އެންމެ ބޮޑަށް އެހީތެރިވެފައިވަނީ ރަޝިޔާއާއި އީރާނުންނެވެ. ސޫރިޔާގެ އެކި ކަންކޮޅުތަކުގައި ރަޝިޔާގެ އަސްކަރިއްޔާއިން މިހާރު ވެސް ދަނީ ހަރަކާތްތެރިވަކާތްތެރިވަމުންނެވެ.