ދެކުނު ކޮރެއާގެ ރައީސްއަށް ބޭރަށް ދަތުރުކުރުން މަނާކޮށްފި

ދެކުނު ކޮރެއާގެ ރައީސް ޔޫން ސުކް ޔެއޯލްއަށް ބޭރަށް ދަތުރުކުރުން މަނާކުރުމަށް އެ ޤައުމުގެ ކޮރަޕްޝަން ތަޙްޤީޤު ބިއުރޯގެ ޗީފް ޕްރޮސެކިއުޓަރު އަމުރުކޮށްފިއެވެ. މިއީ ފާއިތުވި ހަފްތާގައި ރައީސް ޔޫން ކުއްލިއަކަށް މާޝަލް ލޯ އިޢުލާނުކުރުމާ ގުޅިގެން ހިންގަމުންދާ ތަޙްޤީޤެއްގެ ދަށުންނެވެ.

ރައީސް ޔޫންގެ އިތުރުން އޭނާގެ ސަރުކާރުގެ އިސް އެތައް އޮފިޝަލުންނަކަށްވެސް ބޭރަށް ދަތުރުކުރުން މަނާކޮށްފައިވެއެވެ.

މާޝަލް ލޯ އިޢުލާނުކުރުމާ ގުޅިގެން، ދެކުނު ކޮރެއާގެ އެތައް ހާސް ރައްޔިތުންނެއް މަގުމައްޗަށް ނުކުމެ، ރައީސް ޔޫން އިސްތިއުފާ ދިނުމަށް ނުވަތަ އިމްޕީޗްކުރުމަށް ގޮވާލައި އިހުތިޖާޖުކޮށްފައިވެއެވެ. ނަމަވެސް ހޮނިހިރު ދުވަހު ބޭއްވުނު ވޯޓެއްގައި ރައީސް ޔޫން އިމްޕީޗްކުރުމަށް ފާސްނުވިއެވެ.

ވެރިކަންކުރާ ޕީޕަލްސް ޕަވަރ ޕާޓީ (ޕީޕީޕީ)ގެ ލީޑަރު ހާން ޑޮންގް-ހޫން ވިދާޅުވެފައިވަނީ ރައީސް ޔޫން އިސްތިއުފާ ދެއްވަންދެން ޤައުމު ހިންގާނީ ޕާޓީގެ ލީޑަރާއި ބޮޑުވަޒީރު ކަމަށެވެ. އަދި މި މުއްދަތުގައި ރައީސް ޔޫން ޤައުމުގެ އެއްވެސް ކަމެއްގައި ބައިވެރިވެވަޑައިނުގަންނަވާނެ ކަމަށް އޭނާ ވިދާޅުވިއެވެ.

ނަމަވެސް އިދިކޮޅު ޑިމޮކްރެޓިކް ޕާޓީގެ މެންބަރުން މި ހުށަހެޅުން ދެކޮޅުހަދާ، މިއީ ޤާނޫނާ ޚިލާފު އަދި ޤާނޫނުއަސާސީއާ ޚިލާފު ކަމެއް ކަމަށް ބުނެފައިވެއެވެ. އަދި ރައީސް ޔޫން އިމްޕީޗްކުރުމަށް ކޮންމެ ހޮނިހިރު ދުވަހަކު ވޯޓެއް ނަގާނެ ކަމަށް އިދިކޮޅު ފަރާތްތަކުން ބުނެފައިވެއެވެ.

މި ހާލަތުގައި ޤައުމު ހިންގަނީ ކާކުކަން ސާފުނުވާ ކަމަށް ގިނަ ރައްޔިތުން ކަންބޮޑުވުން ފާޅުކޮށްފައިވެއެވެ. ނަމަވެސް ދިފާޢީ މިނިސްޓްރީން ހޯމަ ދުވަހު ބުނެފައިވަނީ ރައީސް ޔޫންގެ އަތުގައި އަދިވެސް ހަނގުރާމަވެރި ބާރުތަކުގެ ކޮމާންޑް އޮތް ކަމަށެވެ.

ރައީސް ޔޫން ހޮނިހިރު ދުވަހު ފުރަތަމަ ފަހަރަށް މީޑިއާއަށް ނުކުމެ، މާޝަލް ލޯ އިޢުލާނުކުރުމުން ރައްޔިތުންނަށް ދިމާވި ދަތިތަކަށް މަޢާފަށް އެދިވަޑައިގެންނެވިއެވެ. އަދި އަލުން މާޝަލް ލޯ އިޢުލާނު ނުކުރައްވާނެ ކަމަށް ވަޢުދުވެވަޑައިގެންނެވިއެވެ.