ނ. ފޮއްދޫ ޕޮލިސް ޕޯސްޓު އިމާރާތްކުރުމުގެ މަސައްކަތުގެ 82 އިންސައްތަ ނިމިއްޖެ

ނ. ފޮއްދޫގައި ތަރައްޤީކުރަމުން އަންނަ ޕޮލިސް ޕޯސްޓުގެ ޢަމަލީ މަސައްކަތުގެ 82 އިންސައްތަ ނިމިއްޖެއެވެ.

އެމްޓީސީސީއާ ހަވާލުކޮށްގެން ކުރިއަށްގެންދާ މި މަޝްރޫޢުގެ ދަށުން މިހާރު ކުރިއަށްދަނީ އިމާރާތުގެ ދޮރުތައް ހަރުކުރުމުގެ މަސައްކަތެވެ.

ރާއްޖޭގެ އެކި ކަންކޮޅުތަކުގައި ޤާނޫނު ތަންފީޛުކުރުމުގެ ޚިދުމަތް ހަރުދަނާކޮށް، އަތޮޅުތަކުގައި ފުލުހުންގެ ޚިދުމަތް ފުޅާކުރުމަށް ސަރުކާރުން ކުރިއަށްގެންދާ މަސައްކަތުގެ ދަށުން ހިންގާ މި މަޝްރޫޢަކީ ދިވެހި ފުލުހުންގެ ޚިދުމަތާއި އެމްޓީސީސީއާ ދެމެދު ވެވިފައިވާ އެއްބަސްވުމެއްގެ ދަށުން ކުރިއަށްގެންދާ މަޝްރޫޢެކެވެ. މި މަޝްރޫޢުގެ މައިގަނޑު މަޤްޞަދަކީ ވަގުތީ ތަންތަނާއި ކައުންސިލް އިދާރާތަކުގައި ފުލުހުން ދެމުންގެންދާ ޚިދުމަތްތައް، ޚާއްޞަ ފެސިލިޓީތަކަކަށް ބަދަލުކުރުމެވެ.

Project Update: Development of N. Fohdhoo Police Post

Installation of doors are ongoing. Overall project progress is 82%.

Follow more updates at: https://t.co/RjAFCf3rnI #MTCCProjects #TeamMTCC #RayyithungeKunfuni #GaumuBinaakurumugaaMTCC pic.twitter.com/84CKZ1ME85

— MTCC Plc (@MTCCPlc) September 27, 2026

މި ޕޮލިސް ޕޯސްޓުގައި އިދާރީ މަސައްކަތްތަކަށް ޚާއްޞަ އޮފީސް ބަޔަކާއި، ފުލުހުން ތިބުމަށް ޚާއްޞަ އެކޮމޮޑޭޝަން ބްލޮކެއް ހިމެނެއެވެ. މި ވަސީލަތްތައް ޤާއިމުކުރެވިގެން ދިއުމުން ކުއްލި ޙާލަތްތަކުގައި އަވަހަށް އިޖާބަދިނުމަށާއި ރަށުގެ އަމާންކަން ދެމެހެއްޓުމަށް ބޮޑު އެހީތެރިކަމެއް ލިބިގެންދާނެއެވެ.

އެމްޓީސީސީން ހާމަކޮށްފައިވާ ގޮތުގައި އިމާރާތުގެ ފައުންޑޭޝަން ފުޓިންގްސްއާއި ފައުންޑޭޝަން ބީމް ކޮންކްރީޓް ކުރުމާއި ކޮލަމް ކާސްޓިންގ މަސައްކަތްތައް ވަނީ މުޅިން ނިމިފައެވެ. އަދި ރޫފް ބީމް ކާސްޓިންގ މަސައްކަތާއި ފުރާޅުގެ ސްޓްރަކްޗަރަލް އެސެމްބްލީ އަދި ޕާލިން ހަރުކުރުމުގެ އިތުރުން ވަށާފާރު ރޭނުމުގެ މަސައްކަތްތައްވެސް ވަނީ އެއްކޮށް ނިންމާލެވިފައެވެ.

މި މަޝްރޫޢުގެ ބާކީ ހުރި 18 އިންސައްތަ މަސައްކަތް ނިންމުމަށްޓަކައި އެމްޓީސީސީން އަންނަނީ ހަލުވި ދުވެލީގައި މަސައްކަތް ކުރަމުންނެވެ.