ޚަބަރު
ޤައުމީ އެސެސަރުން ތަމްރީން ކުރުމަކީ ހުނަރުވެރި ޖީލެއް ބިނާކުރުމުގެ ނަތީޖާ: ޑރ. މާރިޔާ

ވަޒީރު ޑރ. މަރިޔަމް މާރިޔާ ފޮޓޯ:ޕީއެސްއެމް
ޤައުމީ އެސެސަރުން ތަމްރީން ވެގެންދިއުމަކީ ސަރުކާރުން ހުނަރުވެރި އަދި އަމިއްލަ ފައިމައްޗަށް ތެދުވެވޭ ޖީލެއް ބިނާކުރުމަށް ކުރާ މަސައްކަތުގެ ނަތީޖާ ކަމަށް މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ.
ވަޒީރު މިހެން ވިދާޅުވީ މިއަދު މީރުމާގައި ބޭއްވުނު ޚާއްސަ ރަސްމިއްޔާތެއްގައެވެ. މި ރަސްމިއްޔާތަކީ މޯލްޑިވްސް ނެޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމް.އެން.އެސް.ޑީ.އޭ) އިން ނޭޝަނަލް އެސެސަރ ޓްރެއިނިންގް ޕްލޭން ލޯންޗުކުރުމަށް ބޭއްވި ރަސްމިއްޔާތެކެވެ.
ވަޒީރު ޑރ. މާރިޔާ ވިދާޅުވީ މި ޕްލޭނަކީ ހަމައެކަނި ލިޔުމެއް ނޫންކަމަށާއި، މިހާރު ރަޖިސްޓްރީވެފައިވާ އެސެސަރުންނަށާއި އަދި ކުރިމަގުގައި މި ޓީމާ ގުޅޭ ފަރާތްތަކަށް ޚާއްޞަކޮށް ފަރުމާކޮށްފައިވާ ޕްލޭނެއްކަމަށެވެ. އަދި މި ޕްލޭންގެ އަމާޒަކީ އެކި ދާއިރާތަކުން ސަނަދު ދެވޭނެ ފެންވަރު ރަނގަޅު އެސެސަރުން ހޯދައި ތަރައްޤީކުރުންކަމަށް ވެސް ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ މިހާރުވެސް 201 ޤައުމީ އެސެސަރުން އެމްއެންއެސްޑީއޭގައި ރަޖިސްޓްރީވެފައިވާކަމަށާއި، މިއީ އެކި ދާއިރާތައް ތަމްސީލުކުރާ އަދި ޤައުމުގެ ތަޢުލީމީ ނިޒާމަށް ތަޖުރިބާއާއި ހުނަރު ގެނެސްދޭނެ ބައެއްކަމަށެވެ. އަދި އެސެސްމަންޓް އޮނިގަނޑުގެ ފެންވަރު އިތުރަށް މަތިކުރުމަށްޓަކައި، 29 މީހުން ޓްރެއިނިންގ އޮފް ޓްރެއިނަރސްގެ ގޮތުގައި ތަމްރީނުކުރުމަށް އިންވެސްޓްކޮށްފައިވާކަމަށްވެސް ވަޒީރު ފާހަގަކުރެއްވިއެވެ.
މި މަސައްކަތަކީ ހަމައެކަނި އިދާރީ އިޖުރާއަތެއް ނޫން. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދުރުވިސްނުމާއި، އަޅުގަނޑުމެންގެ ސަރުކާރުން ހުނަރުވެރި އަދި އަމިއްލަ ފައިމައްޗަށް ތެދުވެވޭ ޖީލެއް ބިނާކުރުމަށް ކުރާ މަސައްކަތުގެ ފުރިހަމަ ނަތީޖާއެއް
ވަޒީރު ޑރ. މާރިޔާ ވިދާޅުވިއެވެ.
ނޭޝަނަލް އެސެސަރ ޓްރެއިނިންގް ޕްލޭނަކީ ދިވެހިރާއްޖޭގައި ފަންނީ ހުނަރުވެރި މަސައްކަތްތެރިން ބިނާކުރުމަށް ހިންގާ ތަމްރީނު ޕްރޮގްރާމުތައް އެސެސްކުރުމުގެ މަސައްކަތުގައި ހަރަކާތްތެރިވާ ނޭޝަނަލް އެސެސަރުންގެ މަސައްކަތުގެ ފެންވަރު އެއް މިންގަނޑެއްގައި ދެމެހެއްޓުމަށްޓަކައި ވޯލްޑް ބޭންކުގެ އެހީގައި އެކުލަވާލާފައިވާ ޕްލޭނެކެވެ.
ވަޒީރު ޑރ. މާރިޔާ އިތުރަށް ފާހަގަކުރެއްވި ގޮތުގައި، ޤައުމީ އެސެސަރުންގެ ޕްރޮފެޝަނަލް ތަރައްޤީއަށް އިންވެސްޓްކުރުމަކީ ދިވެހިރާއްޖޭގެ ފަހި މުސްތަޤުބަލަށް ކުރެވޭ އަގުހުރި އިންވެސްޓްމަންޓެކެވެ. މި މަސައްކަތުގެ ސަބަބުން ދިވެހިރާއްޖޭގެ މަސައްކަތްތެރިކަމުގެ ދާއިރާގައި ފެންވަރު ރަނގަޅު، ހުނަރުވެރި މީހުން އުފެއްދުމަށް މަގުފަހިވެގެންދާނެ ކަމަށް ވަޒީރު އުންމީދު ފާޅުކުރެއްވިއެވެ.
މި ރަސްމިއްޔާތުގައި އެމް.އެން.އެސް.ޑީ.އޭގެ އިސްވެރިންނާއި، ތަޢުލީމީ ދާއިރާގެ ތަޖުރިބާކާރުން، އަދި އެކި ދާއިރާތަކުގެ މާހިރުން ބައިވެރިވެ ވަޑައިގެންނެވިއެވެ. އަދި މި ޕްލޭން ތަންފީޒުކުރުމުގައި ދިމާވެދާނެ ގޮންޖެހުންތަކާއި، އޭގެ ހައްލުތަކާ ބެހޭގޮތުން މަޝްވަރާކުރެވުނެވެ.
ނިންމާލަމުން ވަޒީރު ޑރ. މާރިޔާ ވިދާޅުވީ، މި ޕްލޭންގެ ކާމިޔާބީ ބިނާވެގެންވަނީ ހުރިހާ ފަރާތްތަކެއްގެ އެއްބާރުލުމާއި ވިލަރެސްކުރުމުގެ މައްޗަށް ކަމަށާއި، މި މަސައްކަތުގައި ހުރިހާ ފަރާތްތަކެއްގެ އެހީތެރިކަމާއި އެއްބާރުލުން ލިބޭނެ ކަމުގެ ޔަޤީންކަން އޮތް ކަމަށެވެ.