މިފްކޯގެ ހިންގުން ހަރުދަނާކުރުމަށް މަސައްކަތްކުރަނީ ރައީސްގެ އިރުޝާދުގެ ދަށުން: ޝިޔާމް

މިފްކޯގެ ހިންގުން ހަރުދަނާކުރުމަށް މަސައްކަތްކުރަނީ ސީދާ ރައީސުލްޖުމްހޫރިއްޔާ ޑރ، މުޙައްމަދު މުޢިއްޒުގެ އިރުޝާދުތަކުގެ ދަށުން ކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ވަޒީރު މިފަދައިން ވިދާޅުވީ، ހާމަކަން ބޮޑު ގޮތެއްގައި ޖަވާބުދާރީވާ ސަރުކާރެއް ހިންގެވުމަށް ރައީސް މުޢިއްޒު ވެވަޑައިގެންނެވި ވައުދުފުޅުގެ ދަށުން، ވުޒާރާތަކުން ކުރަމުން އަންނަ މަސައްކަތްތަކުގެ އަދާހަމަ ހިއްސާކުރުމަށާއި، ވަޒީރުންނާއި ރައްޔިތުން ކުރަން ބޭނުންވާ ސުވާލުތަކަށް ޖަވާބުދެއްވުމަށް ބާއްވާ ވަޒީރުންގެ "އަހާ" ފޯރަމްގައި ވާހަކަފުޅުދައްކަވަމުންނެވެ.

ވަޒީރު ޝިޔާމް ވަނީ ބޭރުގެ ގައުމުތަކަށް މަސް އެކްސްޕޯޓުކުރާއިރު، މަސް ބަލައި ނުގަންނަ މައްސަލައަށް އަލިއަޅުއްވާލަމުން، މިފްކޯއަކީ ރާއްޖޭގެ މަސްވެރިކަމުގެ ސިނާއަތުގައި އެންމެ މުހިންމު ދައުރެއް އަދާކުރާ ކުންފުނިކަން ފާހަގަކުރައްވާފައެވެ. 

އަދި އެމަނިކުފާނު ރައްޔިތުންގެ މަޖިލީހުގެ މެންބަރެއްގެ ގޮތުގައި މަސައްކަތް ކުރެއްވި ދުވަސްވަރު، އާންމުކޮށް ބޭރުގެ ބާޒާރަށް މަސް އެކްސްޕޯޓުކުރާއިރު ބަލައި ނުގަންނަ މިންވަރަށްވުރެ އިތުރަށް މަސް ރިޖެކްޓުވެފައި ހުންނަކަން ފާހަގަކުރެވުނު ކަމަށާއި، ބުއްދި ގަބޫލުނުކުރެވޭފަދަ ކަންތައްތަކެއް އޭރު ހިނގަމުންދިޔަކަމަށް ޝައްކުކުރެވުނު ކަމަށް ވަޒީރު ވިދާޅުވިއެވެ.

އަދި ބޭރުގެ ބާޒާރުތަކުން ރިޖެކްޓްވާ ފަދަ އެއްވެސް މަސް ޝިޕްމަންޓެއް މިހާރު މިފްކޯއިން ބޭރު ނުކުރާނެ ކަމުގެ ޔަގީންކަން ވަޒީރު ދެއްވިއެވެ. އެގޮތުން ފެންވަރު ދަށްވެގެން މަސް ރިޖެކްޓްވާނަމަ އެކަން އެނގޭނީ ކެރިއަރަށް މަސް ބަރުކުރާ ވަގުތު ކަމަށާއި، އޭގެ ސަބަބުން ކުރިން %10 އާއި %12 އާ ދެމެދުގެ މިންވަރަކަށް ބޭރުގެ ބާޒާރުތަކުން މަސް ރިޖެކްޓްވަމުން ދިޔަ ދިއުމަށް ނިމުމެއް އަންނާނެ ކަމަށް ވަޒީރު ވިދާޅުވިއެވެ.

"މިފްކޯގެ ހިންގުން ހަރުދަނާކުރުމަށް ޓަކައި، ރައީސުލްޖުމްހޫރިއްޔާގެ ޑައިރެކްޓް އިންސްޓަރަކްޝަންގަ މި މަސައްކަތްކުރަނީ. އަޅުގަނޑު ވެސް. އަދި މިފްކޯ ވެސް."

ވަޒީރު ވިދާޅުވިއެވެ.

ރައްޔިތުންގެ މިފަދަ ކަންބޮޑުވުންތައް ހައްލުކުރުމުގެ މަސައްކަތް އަބަދުވެސް ކުރައްވަމުން ގެންދަވާނެ ކަމަށާއި، މިފަދަ ޒަމާންވީ މައްސަލަތައް އެއްދުވަހުން ހައްލުނުކުރެވޭނެ ކަމަށް ވަޒީރު ވިދާޅުވިއެވެ. 

ވަޒީރު ވިދާޅުވީ، މިހާރު މަސް އެކްސްޕޯޓްކުރުމުގައި އަމަލުކުރަމުންދާ އުސޫލުގެ ދަށުން، ރާއްޖޭގެ ބަނދަރުތަކުން ކެރިއަރަށް މަސް ބަރުކުރާ ވަގުތު މަސް ގަންނަ ކުންފުނީގެ އިންސްޕެކްޓަރުން ހުންނާނެ ކަމަށެވެ. އަދި ފެންވަރު ދަށްވެގެން ރިޖެކްޓްވާ އެއްޗެއް ރިޖެކްޓްވާނީ އެ ހިސާބުން ކަމަށާއި، އޭގެ ސަބަބުން މިފްކޯއިން ބޭރުގެ ބާޒާރުތަކުގައި ރިޖެކްޓްވާ އެއްވެސް މަހެއް ބޭރުނުވާނެކަން ވަޒީރު ފާހަގަކުރެއްވިއެވެ.