ކާސާ މިއާ ގެސްޓްހައުސް މަތިވެރީ ރައްޔިތުންނަށް ލިބޭނެ ގޮތް ހަދައިދޭނަން: ރައީސް މުޢިއްޒު

އއ. މަތިވެރީގައި ހުންނަ ކަސާ މިއާ ގެސްޓްހައުސް ރަށުގެ ރައްޔިތުންނަށް ލިބޭނެ ގޮތް ހައްދަވައިދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ. މި ވާހަކަ ރައީސް ވިދާޅުވެފައިވަނީ އއ. އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ހަވީރު މަތިވެރީ ކައުންސިލާ ބޭއްވެވި ބައްދަލުވުމެއްގައެވެ.

މި ބައްދަލުވުމުގައި ރައްޔިތުންގެ ފަރާތުން އެދުނު ކަމެއްގެ ގޮތުގައި ކައުންސިލުން ރައީސަށް ހުށަހަޅާފައިވަނީ ކުރީގެ މެންބަރު އަބްދުﷲ ޖާބިރު ހިންގި 50 ކޮޓަރީގެ ކާސާ މިއާ ގެސްޓްހައުސް ރައްޔިތުންނަށް ލިބޭނެ ގޮތެއް ހަދައިދިނުމަށެވެ. ރައީސް ވިދާޅުވީ މިދިޔަ އަށް އަހަރު މި ބިމުން ރަށަށް އެއްވެސް ފައިދާއެއް ނުވާކަމުގެ ކަންބޮޑުވުން ރައްޔިތުންގެ ފަރާތުން ކައުންސިލުން ހުށަހެޅި ކަމަށެވެ.

ލޯކަލް ޓޫރިޒަމްގެ ވަރަށް ބޮޑެތި ފައިދާތަކެއް އޭގެ ކުރިން މި ރަށަށް ވަމުން ދިޔަ. މިހާރު އެކަން ހުއްޓިފައި އެ އޮތީ. ވަރަށް ނާޖާއިޒް ގޮތެއްގައޭ ޓޫރިޒަމް މިނިސްޓްރީގެ ތެރެއިން އެ ބިން ދީފައި އޮތީ

ރައީސް ވިދާޅުވިއެވެ.

ރައީސް އިތުރަށް ވިދާޅުވީ މި މައްސަލަ ބެއްލެވުމަށް އެޓަރނީ ޖެނެރަލްގައި ދަންނަވާފައިވާ ކަމަށާއި، ޤާނޫނީ އިމުގެ ތެރެއިން މި މައްސަލައިން ނިކުމެވޭނެ ގޮތެއް ހޯއްދަވައިދެއްވާނެ ކަމަށެވެ. އަދި މަތިވެރީ ރައްޔިތުންނަށް ޔަޤީންކަން ދެއްވީ ޤާނޫނީ ހަމަތަކުގެ މަތިން އެ އެއްބަސްވުން އުވާލައްވާނެ ކަމަށެވެ.

ޖާބިރަށް ދޫކުރި ބިމުގައި ހިންގި ކަސާ މިއާ ގެސްޓްހައުސްގައި މަސައްކަތްކުރާ މީހުންނަށް މުސާރަ ނުދޭ މައްސަލަ އާއި ގެސްޓްހައުސްގެ ބިމު ކުއްޔަށް ދައްކަން ޖެހޭ 4 މިލިއަނަށް ވުރެ ގިނަ ރުފިޔާ ޖާބިރު ނުދައްކާ އޮތުމުން، ރައްޔިތުންނާއި ކައުންސިލުން މީގެ ކުރިން ކަންބޮޑުވުން ފާޅުކޮށް، ރަށުގައި ހަމަނުޖެހުންތަކެއް ވެސް ހިނގާފައިވެއެވެ. މީގެ ތެރޭގައި ގެސްޓް ހައުސްގެ ކޮޓަރިއެއްގައި ރޯކޮށްލުމާއި ޖާބިރާ ދެކޮޅަށް އިހުތިޖާޖުކޮށް، ރަށުން ބޭރުކުރުން ހިމެނެއެވެ.