ކަރާ އެތެރެކުރުމަށް ކޮންމެ އަހަރަކު 70 މިލިޔަނަށްވުރެ ގިނަ ރުފިޔާ ހޭދަކުރޭ: ޝިޔާމް

ރާއްޖެއަށް ކަރާ އެތެރެކުރުމަށް ކޮންމެ އަހަރަކު 70 މިލިޔަނަށްވުރެ ގިނަ ރުފިޔާ ހޭދަކުރާ ކަމަށް މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ވުޒާރާތަކުން ކުރަމުން އަންނަ މަސައްކަތްތަކުގެ އަދާހަމަ ހިއްސާކުރުމަށާއި، ވަޒީރުންނާއި ރައްޔިތުން ކުރަން ބޭނުންވާ ސުވާލުތަކަށް ޖަވާބުދެއްވުމަށް ބާއްވާ ވަޒީރުންގެ "އަހާ" ފޯރަމްގައި ވާހަކަފުޅުދައްކަވަމުން ދަނޑުވެރިކަމާއި ބެހޭ ވަޒީރު އަޙްމަދު ޝިޔާމް ވަނީ، ރާއްޖެއަށް އެތެރެކުރެވޭ މުދަލުގެ މައްޗަށް އަލިއަޅުއްވާލެއްވިއެވެ.

އެގޮތުން، ކަރައަކީ ރާއްޖޭގައި ވަރަށް ގިނައިން ހައްދާ ބާވަތެއްކަން ނަމަވެސް، މިދިޔަ ދެ އަހަރު ވެސް ރާއްޖެއަށް ކަރާ އެތެރެކުރަމުންދާ ކަމަށް ވަޒީރު ވިދާޅުވިއެވެ. 

"70 މިލިއަނަށް ވުރެ ގިނަ ރުފިޔާ ހޭދަ އެބަކުރޭ ކޮންމެ އަހަރަކު ކަރާ އެތެރެކުރަން."

ވަޒީރު ވިދާޅުވިއެވެ.

މީގެ އިތުރުން، ރާއްޖެއަށް ގިތެޔޮ މިރުހާއި، ކަނޑު މަސް އެތެރެކުރާކަމަށާއި، މި ތަކެތި ރާއްޖެ އެތެރެކުރާ ވާހަކަ ގިނަ މީހުން ޤަބޫލުނުކުރާނެ ކަމަށް ވަޒީރު ވިދާޅުވިއެވެ. ނަމަވެސް، މި ތަކެތި އެތެރެ ކުރާކަން ކަސްޓަމްސްގެ ތަފާސް ހިސާބުތަކުން ދައްކާ ކަމަށާއި، ކަރާ އެތެރެކުރުމަށް 73 މިލިއަން ރުފިޔާ ހޭދަވާ ކަމަށާއި، ގިތެޔޮ މިރުސް އެތެރެކުރުމަށް ސާޅީހަކަށް މިލިއަން ރުފިޔާ ހޭދަވާ ކަމަށް ވަޒީރު ވިދާޅުވިއެވެ. އަދި މި ތަކެތި ގަތުމަށް ޚަރަދުކުރަނީ ޑޮލަރު ކަމަށް ވެސް ވަޒީރު ޝިޔާމް ވިދާޅުވިއެވެ.

ރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރާއިރު، ރާއްޖެ އެތެރެކުރާ ކާބޯތަކެތީގެ ބާވަތްތަކަށް އަލިއަޅުވާލައި، ދުރު ރާސްތާގެ މަސައްކަތްތަކެއް ކުރަންޖެހޭ ކަމަށް ވަޒީރު ވިދާޅުވިއެވެ.