މަޑުއްވަރީގައި ހިނގި ފޭރުމުގެ މައްސަލާގައި މީހަކު ހައްޔަރުކޮށްފި

ރ. މަޑުއްވަރީ މަގުމަތީގައި ބިދޭސީ އަންހެނަކު ހިފަހައްޓައި، އޭނާއަށް އަނިޔާކުރުމަށްފަހު އަތުން ފައިސާ ފޭރިގަތް މައްސަލައާ ގުޅިގެން ކޯޓު އަމުރެއްގެ ދަށުން މީހަކު ހައްޔަރުކޮށްފިއެވެ.

ފުލުހުންގެ އިދާރާއިން މައުލޫމާތު ދެއްވި ގޮތުގައި، މަޑުއްވަރީގައި ބިދޭސީ އަންހެނަކާ މެދު މާރާމާރީ ހިންގައި، އޭނާގެ އަތުން ފައިސާ ފޭރުނު މި ހާދިސާ ފުލުހުންނަށް ރިޕޯޓުކޮށްފައިވަނީ އިއްޔެ އިރުއޮއްސި 6:00 ހާއިރުއެވެ. މި މައްސަލައާ ގުޅިގެން ކޯޓު އަމުރެއްގެ ދަށުން ހައްޔަރުކޮށްފައިވަނީ 24 އަހަރުގެ ނޭޕާލް ފިރިހެނެކެވެ. އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ފަސް ދުވަހުގެ މުއްދަތަކަށް ބަންދުކުރުމަށް ކޯޓުން ވަނީ އަމުރުކޮށްފައެވެ.

މި ހާދިސާ ހިނގި މަންޒަރު ފެންނަ ވީޑިއޯއެއް މީސްމީޑިއާގައި ވަނީ ވަރަށް ބޮޑަށް ދައުރުވެފައެވެ. އެ ވީޑިއޯއިން ފެންނަ ގޮތުގައި، ބިދޭސީ ފިރިހެނަކު މަގުމަތިން އަންހެން މީހާ ގަދަކަމުން ހިފަހައްޓައި، އޭނާއަށް އަނިޔާކުރެއެވެ. އަދި އަންހެން މީހާ އެހީއަށް އެދި ހަޅޭއްލަވައިގަތުމުގެ ފުރުސަތު ނުދިނުމަށްޓަކައި، އެ ފިރިހެން މީހާ އަންހެން މީހާގެ އަނގަމަތީގައި އަތްއަޅައިގެން ހިފަހައްޓަން މަސައްކަތްކުރާ މަންޒަރު ވެސް ފެނެއެވެ.

މީގެއިތުރުން، އެ ސަރަހައްދަށް އެހެން މީހަކު އައިސް އެ ދެ މީހުން ދުރުކުރުމަށް މަސައްކަތްކުރާ މަންޒަރާއި، އެ ހަމަނުޖެހުމުގެ ތެރޭގައި މަގުމައްޗަށް ފައިސާތަކެއް ވެރިފައި ހުރި މަންޒަރު ވެސް އާންމުވެފައިވާ ވީޑިއޯއިން ސާފުކޮށް ފެންނަން ހުއްޓެވެ.

މި ހާދިސާއާ ގުޅިގެން މަޑުއްވަރީގެ ރައްޔިތުންގެ މެދުގައި ކަންބޮޑުވުން އުފެދިފައިވާއިރު، ފުލުހުން ދަނީ މި މައްސަލަ ވަރަށް ސީރިއަސް މައްސަލައެއްގެ ގޮތުގައި ބަލައި، ފުރިހަމަ ތަހުގީގެއް ހިންގަމުންނެވެ.