ބަރުދަން ކޮންޓްރޯލު ކޮށްލުމަށް "އަލަ" ވަރެއް ނޯންނާނެ!

ބަރުދަން ލުއިކުރުމަށްޓަކައި އެކި ވައްތަރުގެ ޑައިޓް ޕްލޭންތައް ފޮލޯކުރަމުންދާއިރު، ބަނޑުހައިހޫނުކަން އިހުސާސްނުވެ، ހަށިގަނޑަށް ބޭނުންވާ ފުރިހަމަ ހަކަތަ ލިއްބައިދޭނެ ކާނާއެއް ހޯދުމަކީ ގިނަ ބަޔަކަށް ދިމާވާ އެންމެ ބޮޑު ގޮންޖެހުމެވެ. ބައެއް ފަހަރު ކެއުން މަދުކޮށްލުމުން ވަރުބަލިވެ، މާ އަވަހަށް ކާހިތްވުމުގެ އުނދަގޫ ދިމާވެއެވެ. ނަމަވެސް މިކަމަށް އޮތް އެންމެ ފުރިހަމަ އަދި ޤުދުރަތީ ޙައްލަކީ ކާބަފައިންގެ ޒަމާނުއްސުރެ ދިވެހި ސުފުރާމަތިން ފެންނަމުންދިޔަ "އަލަ" އެވެ.  އަލައަކީ، ދުޅަހެޔޮ ގޮތުގައި ބަރުދަން ކޮންޓްރޯލްކޮށްލަން ބޭނުންވާ ނަމަ ޑައިޓުގައި ހިމަނާލަން މިހާރު ދުނިޔޭގެ ސިއްޙީ މާހިރުން ވެސް އެންމެ ބޮޑަށް ލަފާދޭ އެއް "ސުޕަރފުޑް" އެވެ.

އޮޅު އަލައަކީ ވަރަށް ގިނަ ޤައުމުތަކުގައި ހައްދާ ފަލަމަޑީގެ ބާވަތެކެވެ. ދިވެހި ރާއްޖޭގައި އާއްމުކޮށް އަލަ ހައްދަނީ ހައްދުންމަތިން ފެށިގެން ދެކުނުގައެވެ. އެ ހިސާބުގަނޑުގައި އިހުގައި އަލައަކީ ކެއުމުގެ މައި ގަނޑު ބަޔެވެ. ރާއްޖޭގައި ގިނައިން ހައްދަނީ އަލައިގެ ދެ ބާވަތެކެވެ. އެއީ އޮޅުއަލައާއި (ނުވަތަ ބޮމްބައި އަލައާއި) ފުރެއްދެ އަލައެވެ. މީގެ އިތުރުން އެހެން ބާވަތްތައް މަދުމަދުން ހައްދައެވެ. ރަތް އަލައަކީ މީގެ ތެރެއިން އެއް ބާވަތެވެ. އަނެއް ބާވަތަކީ ބޮޑު އަލައެވެ. 

ގޮބޮޅި އަލައަކީވެސް ހަށިގަނޑަށް އެހާމެ ފައިދާހުރި ބާވަތެކެވެ. އެގޮތުން:

ގުލޫޓެން އެކުލެވިގެން ނުވުން:

ގޮބޮޅި އަލައަކީ ގުލޫޓެން އެއްގޮތަކަށްވެސް ނުހިމެނޭ ކާނާއެކެވެ. މީގެ ސަބަބުން ގުލޫޓެންގެ ސަބަބުން ދިމާވާ ބަނޑުގެ މައްސަލަ ތަކާއި، ގޮހޮރުގެ މައްސަލަތައް ކަމުގައިވާ 'ކްރޯންސް ޑިޒީޒް' އަދި 'ސީލިއެކް ޑިޒީޒް' ފަދަ ބަލިތައް ތަޙައްމަލުކުރަމުންދާ ފަރާތްތަކަށް މިއީ ނުހަނު ރައްކާތެރި ބާވަތެކެވެ.

ފައިބަރުން މުއްސަނދިވުން:

ދުޅަހެޔޮ ޞިއްޙަތަކަށް ކޮންމެހެން ބޭނުންވާ ފައިބަރު ގޮބޮޅި އަލައިގައި އެކަށީގެންވާ މިންވަރަކަށް އެކުލެވިގެންވެއެވެ. މިއީ ހަޖަމުގެ ނިޒާމު ހަރުދަނާކޮށްދީ، ބަނޑުހިކުމާއި ބަނޑުގައި ރިއްސުން ފަދަ އުނދަގޫތަކުން ދުރުކޮށްދޭ މާއްދާއެކެވެ. މީގެ އިތުރުން ލޭގައި ހުންނަ ކޮލެސްޓްރޯލް ދަށްކޮށްދީ، ހިތުގެ ބަލިތަކުން ރައްކާތެރިކޮށްދިނުމާއި، ލޭގެ ހަކުރު އެއްވަރެއްގައި ހިފެހެއްޓުމަށް ވެސް ފައިބަރު ބޮޑު ދައުރެއް އަދާކުރެއެވެ.

ފަސޭހައިން ހަޖަމުވުން:

ގޮބޮޅި އަލައަކީ ބަނޑަށް ލުއި، އަދި ނުހަނު ފަސޭހައިން ހަޖަމުވާ އެއްޗެކެވެ. މިއީ ހަޖަމުކުރުމަށްޓަކައި މަދު މިންވަރެއްގެ ހައިޑްރޯކްލޮރިކް އެސިޑް ބޭނުންވާ ބާވަތަކަށް ވާތީ، ބަނޑުގައްޔާއި ގޮހޮރުގައި ފާރު އުފެދުމުން ރައްކާތެރިކޮށްދެއެވެ. އަދި މެއިން ދިލަނެގުމާއި އެސިޑް މައްޗަށް އެރުމުގެ ސަބަބުން ތަހައްމަލު ކުރަންޖެހޭ ކަންކަން ކުޑަކޮށްދެއެވެ.

ހަކަތަ ލިއްބައިދޭ ކާބޯހައިޑްރޭޓްސް:

ގޮބޮޅި އަލައިގެ 75.5 އިންސައްތައަކީ ކާބޯހައިޑްރޭޓެވެ. އެހެންކަމުން މިއީ ހަށިގަނޑަށް ބޭނުންވާ ތާޒާކަމާއި އިތުރު ހަކަތަ ފޯރުކޮށްދިނުމަށް އެންމެ އެކަށޭނަ އެއް ކާނާއެވެ. ނަމަވެސް، ކާބޯހައިޑްރޭޓް މަދުކުރަން ޖެހޭ ފަރާތްތަކުން މި ބާވަތް ބޭނުންކުރުމުގައި ސަމާލުވާންވާނެއެވެ.

ސަރުބީ ނިސްބަތުން މަދުވުން:

މިއީ ސަރުބީގެ މިންވަރު ނުހަނު ދަށް، ޞިއްޙަތަށް ފައިދާހުރި ބާވަތެކެވެ. ކައްކާފައި ހުންނަ ގޮބޮޅި އަލަ ޖޯޑެއްގައި އެކުލެވެނީ އެންމެ ފެޓް ގްރާމެކެވެ. އަދި އޭގައި ހިމެނޭ ސަރުބީއަކީ ވެސް ހަށިގަނޑަށް ގެއްލުން ކުޑަ، ރައްކާތެރި ބާވަތެއްގެ ސަރުބީއެކެވެ.

އަލައަކީ ނިއުޓްރިޝަނަލް ގޮތުން ބަލާއިރު ބަރުދަން ލުއިކުރާ މީހުންނަށް ޚާއްޞަ ޚަޒާނާއެކެވެ. ކެއްކި އަލައިގެ 100 ގްރާމުގައި އެކުލެވެނީ އެންމެ 112 ކެލޮރީއާއި 0.2 ގްރާމްގެ ވަރަށް ކުޑަ ފެޓް (ސަރުބީ) މިންވަރެކެވެ. މީގެ އިތުރުން މީގައި %71 އެކުލެވެނީ ފެނުގެ ބަޔެވެ. އަދި އޭގައި ހިމެނޭ 4.1 ގްރާމްގެ  ޑައެޓަރީ ފައިބާގެ ސަބަބުން، ހަޖަމުވުމުގެ މަރުހަލާ ލަސްކޮށްދީ، ގިނަ ވަގުތުތަކެއް ވަންދެން ބަނޑު ފުރިފައި ހުންނަ ކަމުގެ އިހުސާސް ކޮށްދޭ އެއްޗެކެވެ. އަލައިގައި ހުންނަ "ކޮމްޕްލެކްސް ކާބޯހައިޑްރޭޓްސް" ގެ ސަބަބުން ލޭގައި ހަކުރު ހުންނަ މިންވަރު ކުއްލިއަކަށް މައްޗަށް ދިއުމާއި، އެކަމުގެ ސަބަބުން ލިބޭ ގެއްލުންތައް ކުޑަކުރުން ހިމެނެއެވެ. ގިނަގިނައިން ލުއިކާނާ ކެއުމަށް ހުންނަ "ކްރޭވިންގްސް" ނައްތާލުމަށް ވަރަށް ބޮޑު އެހީއަކަށް ވެގެންދެއެވެ.

މީގެ އިތުރުން ވެސް، ޑައިޓްކުރާ ދުވަސްވަރު ހަށިގަނޑުން މަދުވާ މުހިންމު ވިޓަމިންތަކާއި މިނަރަލްސް އަލައިން ފުރިހަމަކޮށްދެއެވެ. އެގޮތުން އަލައިގައި އެކުލެވޭ ވިޓަމިން ސީ އަދި ވިޓަމިން އީ ގެ ސަބަބުން ހަށިގަނޑުގެ ދިފާޢީ ނިޒާމު ވަރުގަދަވެ، ބަރުދަން ލުއިވާއިރު ހަންގަނޑު އެލި އަދި ރޫޖެހުމުން ރައްކާތެރިކޮށްދެއެވެ. އަދި ވިޓަމިން ބީ6، ފޮލޭޓް، މެގްނީޒިއަމް އަދި މެންގަނީޒް ފަދަ މާއްދާތަކަކީ ހަށިގަނޑުގެ މެޓަބޮލިޒަމް ހަލުވިކޮށް، ކާބޯތަކެތި ފަސޭހައިން ހަކަތައަށް ބަދަލުކޮށްދީ، ދުވަހުގެ މަސައްކަތްތަކަށް ބޭނުންވާ ތާޒާކަން ދެމެހެއްޓުމަށް އެހީތެރިވެދޭ މާއްދާތަކެކެވެ. އަދި އަލައިގައި ހިމެނޭ ޕޮޓޭސިއަމްގެ ސަބަބުން ހަށިގަނޑުގައި ލޮނުގެ މިންވަރު ހަމަހަމަކޮށްދީ، ލޭގެ ޕްރެޝަރު އެއްވަރެއްގައި ހިފަހައްޓައިދެއެވެ.

އަލައިގެ ފުރިހަމަ ފައިދާ ބަރުދަން ލުއިކުރުމަށް ހޯދުމަށްޓަކައި، އެ ތައްޔާރުކުރާ ގޮތަށް ޚާއްޞަ ސަމާލުކަމެއް ދޭންޖެހެއެވެ. އަލައަކީ ތެލުލައިގެން ނުވަތަ މާގިނައިން ހަކުރާއި ކާށިކިރު އަޅައިގެން ބޭނުންކުރުމުގެ ބަދަލުގައި، ފެނުކައްކައިގެން، ސްޓީމްކޮށްގެން، ނުވަތަ އަވަނުން ފިހެގެން ކާން އެންމެ އެކަށޭނަ އެއްޗެކެވެ. އަދި އަލައިގައި ހުންނަ ކެލްސިއަމް އޮކްސަލޭޓްގެ ސަބަބުން ކަރުތެރެ ކަހާ ގޮތްވިޔަ ނުދިނުމަށްޓަކައި ރަނގަޅަށް ފުރިހަމައަށް ކެއްކުން ވަރަށް މުހިންމެވެ. މި އުސޫލުން އަލަ ބޭނުންކުރާ ނަމަ، މިއީ ހަށިގަނޑަށް ބޭނުންވާ ހުރިހާ މާއްދާތަކެއް އެކުލެވޭ، ބަނޑުހައިހޫނުކަމާ ދުރުކޮށްދޭ، އަދި ބަރުދަން ލުއިކޮށްލުމަށް ހަމަ ގައިމުވެސް ދެވަނައެއް ނެތް މޮޅު ކާނާއެކެވެ.