ކެމިކަލް ވިއްކުމުގެ ހުއްދައަށް އެދުމުގެ މުއްދަތު އިތުރުކޮށްފި

ކެމިކަލް ވިއްކުމުގެ ހުއްދައަށް އެދުމުގެ މުއްދަތު އިތުރުކޮށްފައިވާ ކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވުޒާރާއިން ވިދާޅުވެއްޖެއެވެ. 

އެ ވުޒާރާއިން ނެރުއްވި އިއުލާނެއްގައި ވަނީ، ދިވެހިރާއްޖޭގައި ނުރައްކާތެރި ކެމިކަލް ވިއްކާ ފަރާތްތަކުން އެ ކެމިކަލްތައް ވިއްކުމަށްޓަކައި "ކެމިކަލް ވިއްކުމުގެ ހުއްދަ" ނެންގެވުމަށާއި އަދި ނުރައްކާތެރި ކެމިކަލް ވިއްކުމަށްޓަކައި އެ ކެމިކަލްތައް ސްޓޯރ ކުރާ ނުވަތަ ބަހައްޓާ ތަންތަން "މަކުދި ޕޯޓަލް"ގައި ރަޖީސްޓަރ ކުރެއްވުމަށް ދެވިފައިވާ މުއްދަތު ހަމަވެފައިވާ ކަމަށެވެ. މި މުއްދަތުގެ ތެރޭގައި ކެމިކަލް ވިއްކާ ފިހާރަތައް ރަޖިސްޓްރީކުރުމާއެކު ހުއްދަ ހޯދުމަށް އެދިފައިވާ ފަރާތްތަކުގެ އަދަދު ނިސްބަތުން މަދުކަން ފާހަގަކުރެވިފައިވާ ކަމަށް ވުޒާރާއިން ވިދާޅުވިއެވެ.

ދިވެހިރާއްޖޭގައި ނުރައްކާތެރި ކެމިކަލް ވިއްކާ ފަރާތްތަކުން، "ކެމިކަލް ވިއްކުމުގެ ހުއްދަ" ނެންގެވުމަށާއި، އެ ކެމިކަލްތައް ވިއްކުމަށްޓަކައި ސްޓޯރ ކުރާ ނުވަތަ ބަހައްޓާ ތަންތަން މަކުދި ޕޯޓަލްގައި ރަޖީސްޓަރ ކުރެއްވުމަށް ދެވިފައިވާ މުއްދަތު މިއަދުން ފެށިގެން 1 މަސް ދުވަށް އިތުރުކޮށްފައިވާ ކަމަށް ވުޒާރާގެ އިއުލާނުގައިވެއެވެ.

އެހެންކަމުން، މި މުއްދަތުގެ ތެރޭގައި ރަޖިސްޓަރީ ނުކޮށް ކެމިކަލް ވިއްކަމުންގެންދާ ފަރާތްތަކާމެދު، ނުރައްކާތެރި ކެމިކަލްއާބެހޭ ގަވާއިދުގެ ދަށުން، ފިޔަވަޅު އަޅައި އެފަރާތްތަކަށް ނުރައްކާތެރި ކެމިކަލް ރާއްޖެ އެތެރެކުރުމުގެ ހުއްދަ އިތުރަށް ދެވެން ނޯންނާނެ ކަމުގައި ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވުޒާރާއިން ވަނީ ވިދާޅުވެފައެވެ.

މާލޭގައި މީގެ ކުރިން ހިނގާފައިވާ ނުރައްކާތެރި އަލިފާނުގެ ހާދިސާތަކުގައި ކެމިކަލް ގުދަންތަކުގެ ސަބަބުން ބޮޑެތި ގެއްލުންތަކެއް ލިބި، މީހުންގެ ފުރާނަ ވެސް ވަނީ ގެއްލިފައެވެ. އެގޮތުން 2019 ވަނަ އަހަރު ހެންވޭރުގައި ހިނގި ހާދިސާއަށްފަހު، މާލޭގައި ހުރި ކެމިކަލް ގުދަންތައް ތިލަފުއްޓަށް ބަދަލުކުރުމުގެ މަސައްކަތް ކުރީގެ ސަރުކާރުން ވަނީ ފަށާފައެވެ.

ވުޒާރާގެ ތަފާސްހިސާބުތަކުން ދައްކާ ގޮތުގައި މާލޭގައި މިހާރު ވެސް ކެމިކަލް ގުދަންކުރާ 144 ތަނަކާއި، ކެމިކަލް ވިއްކާ 62 ފިހާރައެއް އެބަހުއްޓެވެ.