ޚަބަރު
ބޭސް ބޭނުންކުރުމުގައި ސަމާލުވުމަށް ރައީސުލްޖުމްހޫރިއްޔާގެ އަނބިކަނބަލުން ގޮވާލައްވައިފި
ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު، ފޮޓޯ: ރައީސް އޮފީސް
ޖަރާސީމު ނައްތާލުމަށް ބޭނުންކުރާ ބޭސްތަކަށް ޖަރާސީމު ނުގުޑުމުގެ ނުވަތަ އެންޓިމައިކްރޯބިއަލް ރެސިސްޓެންސް (އޭ.އެމް.އާރް) މައްސަލަ އަކީ ދުނިޔެއަށް ކުރިމަތިވަމުން އަންނަ ނުރައްކަލެއްކަން ފާހަގަކުރައްވައި، ޒިންމާދާރުކަމާއެކު ބޭސް ބޭނުންކުރުމަށް ރައީސުލްޖުމްހޫރިއްޔާގެ އަނބިކަނބަލުން، މެޑަމް ސާޖިދާ މުޙައްމަދު ގޮވާލައްވައިފިއެވެ.
ދުނިޔޭގެ އެންޓިމައިކްރޯބިއަލް ހޭލުންތެރިކަމުގެ ހަފުތާއާ ގުޅިގެން ދެއްވި މެސެޖެއްގައި، އެކަމަނާ ފާހަގަކުރެއްވި ގޮތުގައި، އެންޓިމައިކްރޯބިއަލް ރެސިސްޓެންސްގެ ސަބަބުން އިންސާނުންނާއި ޖަނަވާރުންނާއި ގަސްގަހާގެހީގެ އިތުރުން މުޅި ތިމާވެށީގެ ދުޅަހެޔޮކަމަށްވެސް ބޮޑެތި ނުރައްކާތަކާ ކުރިމަތިލާންޖެހެއެވެ.
ބޭހަކީ އިންސާނުންގެ ފުރާނަ ސަލާމަތްކޮށްދޭ މުހިންމު އެއްޗެއްކަން ފާހަގަކުރައްވަމުން އެކަމަނާ ވިދާޅުވީ، ޖަރާސީމު ނައްތާލާ ބޭސްތަކުގެ އަސަރު ކެނޑިގެންދާ ހިނދު، އާންމު އިންފެކްޝަންތައް އިތުރުވެ، ބަލިތަކަށް ފަރުވާކުރުމަށް ދަތިވެގެންދާ ކަމަށެވެ. އަދި މީގެ ސަބަބުން އަޅުގަނޑުމެންގެ ދުވަހީ ދިރިއުޅުމަށް ބޮޑެތި ގޮންޖެހުންތަކެއް ކުރިމަތިވާނެ ކަމަށްވެސް އެކަމަނާ ބަޔާންކުރެއްވިއެވެ.
Antimicrobial resistance (#AMR) is an emerging global threat, putting the health of humans, animals, plants, and the environment at risk. Medicines save lives, and when antimicrobials lose their effectiveness, infections are more common, harder to treat, and challenges our daily lives. Together, we can create a more resilient future for coming generations by using antimicrobials responsibly, encouraging sustainable agricultural practices, and safeguarding the environment. This #WAAW2026, let’s embrace the One Health approach and act now to protect our shared future and pave the way for healthier and happier lives. #AntimicrobialResistance
— First Lady Sajidha Mohamed (@sajidhaamohamed) November 20, 2026
ރައީސުލްޖުމްހޫރިއްޔާގެ އަނބިކަނބަލުން އިތުރަށް ވިދާޅުވީ، އަންނަން އޮތް ޖީލުތަކަށް ދުޅަހެޔޮ އަދި ފާގަތި މުސްތަޤުބަލެއް ހޯދައިދެވޭނީ ޒިންމާދާރުކަމާއެކު މިފަދަ ބޭސްތައް ބޭނުންކޮށް، ދެމެހެއްޓެނިވި ގޮތެއްގައި ދަނޑުވެރިކަން ކުރުމަށް ހިތްވަރުދީ، އަދި ތިމާވެށި ރައްކާތެރިކުރުމަށް އެންމެން ގުޅިގެން މަސައްކަތް ކޮށްގެން ކަމަށެވެ.
މިއަހަރުގެ އެންޓިމައިކްރޯބިއަލް ހޭލުންތެރިކަމުގެ ހަފުތާ ފާހަގަކުރާއިރު، އިންސާނުންނާއި ޖަނަވާރާއި ތިމާވެށީގެ ދުޅަހެޔޮކަން ގުޅިލާމެހިފައިވާކަން ހާމަކޮށްދޭ "ވަން ހެލްތު" ސްލޯގަން ފެތުރުމަށޤ އެކަމަނާ ބާރުއެޅުއްވިއެވެ. އަދި އަޅުގަނޑުމެން އެންމެންގެ ހިއްސާވާ މުސްތަޤުބަލު ރައްކާތެރިކޮށް، ދުޅަހެޔޮ، އުފާވެރި ދިރިއުޅުމަކަށް މަގުފަހިކުރުމަށްޓަކައި މިހާރުން މިހާރަށް ފިޔަވަޅު އެޅުމަށްވެސް ރައީސުލްޖުމްހޫރިއްޔާގެ އަނބިކަނބަލުން ވަނީ ގޮވާލައްވާފައެވެ.