ދައުލަތުގެ ހުރިހާ މަސައްކަތެއްވެސް ރައްޔިތުންނާ ވަރަށް ގާތުން ދަނީ ހާމަކުރަމުން: ވަޒީރު ޝިޔާމް

މި ސަރުކާރަކީ ކަންކަން ވަރަށް ބޮޑަށް ހާމަކޮށްގެން ހިންގަމުންދާ ސަރުކާރެއް ކަމަށާއި، ދައުލަތުގެ ހުރިހާ މަސައްކަތެއްވެސް ރައްޔިތުންނާ ވަރަށް ގާތުން ހިއްސާކުރަމުންދާ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް ވިދާޅުވެއްޖެއެވެ.

ވަޒީރު މިހެން ވިދާޅުވީ ރޭ ބޭއްވި "އަހާ" ފޯރަމުގައި ވާހަކަފުޅު ދައްކަވަމުންނެވެ.

ވަޒީރުގެ ވާހަކަފުޅުގައި ފާހަގަކުރެއްވި ގޮތުގައި، ސަރުކާރުންނާއި ވަޒީރުން ކުރައްވާ ކަންކަމާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންނެވި ވައުދުތަކުގެ މެނިފެސްޓޯ ތަންފީޒުވަމުންދާ މިންވަރު ބަލައި ވަޒަންކުރުމަކީ ރައްޔިތުން އެދޭނެ ކަމެކެވެ. އަދި މި ވެރިކަން އަބަދުވެސް ކުރިއަށްދާނީ ރައްޔިތުންގެ އެދުމާ އެއްގޮތަށް، ނުހަނު ދެފުށް ފެންނަ އުސޫލުން ކަމަށް ޝިޔާމް ވިދާޅުވިއެވެ.

 މި ސަރުކާރަކީ ވަރަށް ހާމަކަން ބޮޑުކޮށް ސަރުކާރުގެ ދުވަސްތައް ގުނަމުންދާ ސަރުކާރެއް. މިހެން މި ދެންނެވީ ކުރަމުންދާ ހުރިހާ ކަމެއް ރައްޔިތުންނާއި ގާތުން ހިއްސާ ކުރަމުންދާ ސަރުކާރަކަށް ވާތީ. ވަކިން ހާއްސަކޮށް ރައީސުލްޖުމްހޫރިއްޔާ ވަރަށް އިސްކަން ދެއްވާ ވުޒާރާތަކުން ކުރާކަންކަން ރައްޔިތުންނަށް ރަނގަޅަށް އެނގެން،

މަސްވެރިކަމާ ބެހޭ ވަޒީރު އަޙްމަދު ޝިޔާމް

 މި ސަރުކާރުގެ ކޮންމެ ދުވަހެއްވެސް ގުނަމުން މިދަނީ ރައްޔިތުންނާ ނުހަނު ގާތް ގުޅުމެއް ބާއްވައި، ހުރިހާ ކަމެއް ސާފުކޮށްދެމުން ކަމަށް ވަޒީރު ފާހަގަކުރެއްވިއެވެ.

މީގެއިތުރުން، މި ސަރުކާރުން ވެރިކަމާ ހަވާލުވި ދަނޑިވަޅުގައި މަސްވެރިކަމުގެ ސިނާއަތުގައި ހަރަކާތްތެރިވާ އަމިއްލަ ވިޔަފާރިތަކުގެ ހާލަތު އޮތީ އިންތިހާއަށް ދަށަށް ގޮސްފައި ކަމަށް ޝިޔާމް ވިދާޅުވިއެވެ. އެކަން އެގޮތަށް ދިމާވީ ޕްރައިވެޓް ސެކްޓަރަށް ނުއުފުލޭ ވަރުގެ ބުރައެއް އަންނާނެހެން މަހުގެ އަގުތަކަށާއި ސިޔާސަތުތަކަށް މީގެކުރިން ބަދަލު ގެނައުމުން ކަމަށް ވަޒީރު ފާހަގަކުރެއްވިއެވެ.

ނަމަވެސް، މި ސަރުކާރު އައިސް ހުރިހާ ފަރާތްތަކެއް ގުޅިގެން ކުރެވުނު މަސައްކަތްތަކުގެ ނަތީޖާއެއްގެ ގޮތުން، މަސްވެރިކަމުގެ ދާއިރާއަށް މިހާރު ވަރަށް ބޮޑު ކުރިއެރުމެއް ލިބި، ސިނާއަތުގެ ހާލަތު ރަނގަޅުވަމުން އަންނަކަން ވަޒީރު ވަނީ ހާމަކުރައްވާފައެވެ.