ގދ. ތިނަދޫ ކޯލްޑް ސްޓޯރޭޖް މަޝްރޫޢުގެ އަށްޑިހަ އިންސައްތަ ނިމިއްޖެ

ގދ. ތިނަދޫގައި ޤާއިމުކުރާ ކޯލްޑް ސްޓޯރޭޖް އަދި އެއާ ގުޅުންހުރި އެހެނިހެން ޢިމާރާތްތަކުގެ މަސައްކަތް އެމްޓީސީސީން ބާރަށް ކުރިއަށް ގެންދާ ކަމަށް އެ ކުންފުނިން ހާމަކޮށްފިއެވެ.

 މިއީ ސަޢޫދީ ފަންޑް ފޯ ޑިވެލޮޕްމަންޓް (އެސްއެފްޑީ) ގެ އެހީގައި މިފްކޯއާ ގުޅިގެން ހިންގާ މުހިންމު މަޝްރޫޢެކެވެ.

އެމްޓީސީސީގެ އެންމެ ފަހުގެ މަޢުލޫމާތުތަކަށް ބަލާއިރު، މުޅި މަޝްރޫޢުގެ ސިވިލް މަސައްކަތްތަކުގެ 53.14 އިންސައްތަ ވަނީ ނިމިފައެވެ. އެގޮތުން ކޯލްޑް ސްޓޯރޭޖް ފެސިލިޓީގެ 80 އިންސައްތަ މަސައްކަތް ނިމިފައިވާއިރު، ކެމިކަލް ސްޓޯރާއި ލޮނު ރައްކާކުރާ ސްޓޯރުގެ 56 އިންސައްތަ މަސައްކަތް ވަނީ ފުރިހަމަކުރެވިފައެވެ. މީގެއިތުރުން އެޑްމިން ބިލްޑިންގުގެ 48 އިންސައްތަ މަސައްކަތް ވަނީ ނިމިފައެވެ.

Project Update: Gdh. Thinadhoo Cold Storage Civil Works and Associated Facilities

Admin building, cold storage, chemical and salt store works are ongoing.

Follow more updates at: https://t.co/RjAFCf3rnI #MTCCProjects #TeamMTCC #RayyithungeKunfuni #GaumuBinaakurumugaaMTCC pic.twitter.com/lIrWgAZBZ1

— MTCC Plc (@MTCCPlc) September 28, 2026

މި މަޝްރޫޢުގެ ދަށުން ތިނަދޫގައި ޤާއިމުކުރެވޭ ފެސިލިޓީގައި 1،000 މެޓްރިކް ޓަނުގެ ކޯލްޑް ސްޓޯރޭޖަކާއި، ދުވާލަކު 120 މެޓްރިކް ޓަނުގެ މަސް ގަނޑުކުރެވޭ ބްރައިން ފްރީޒިންގ ސިސްޓަމެއް ހިމެނެއެވެ. އަދި 4،790 އަކަފޫޓުގެ އެއްބުރީގެ އެޑްމިނިސްޓްރޭޓިވް އޮފީހަކާއި، ކެމިކަލް އަދި ލޮނު ރައްކާކުރާ ޢިމާރާތްތަކުގެ އިތުރުން ޑީސަލް ޓޭންކުގެ ފައުންޑޭޝަނާއި ބަނދަރުގެ ޚާއްޞަ ސަރަޙައްދެއް ތަރައްޤީކުރުން ހިމެނެއެވެ.

ދެކުނުގެ މަސްވެރިންނަށް މަސް ކިރުވުމުގައި ދިމާވާ ދަތިތަކަށް ޙައްލެއް ހޯދައިދިނުމުގެ މަޤްޞަދުގައި ކުރިއަށްގެންދާ މި މަޝްރޫޢު އަވަސްކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން ކަމާބެހޭ ވުޒާރާތަކުންނާއި ޔުޓިލިޓީ ކުންފުނިތަކުން ދަނީ ގުޅިގެން މަސައްކަތްކުރަމުންނެވެ.