އެނބޫދޫފަޅު ވިއްކާލުން 'ހަލާލު' ވެފައި، ރަސްމާލެއިން ރައްޔިތުންނަށް ބޯހިޔާވަހިކަން ދިނުން 'ހަރާމް' ވީ ކީއްވެ؟

ދިވެހިރާއްޖޭގެ ފަހުގެ ތާރީޚުގައި އިޤްތިޞާދީ އަދި އިޖުތިމާޢީ ތަރައްޤީގެ ނަމުގައި ހިންގާފައިވާ ބިޔަ މަޝްރޫޢުތަކަށް ނަޒަރު ހިންގާއިރު، އެކި ވެރިކަންތަކުގައި ޤައުމުގެ އަގުހުރި ބިންތަކާއި ފަޅުތައް ބޭނުންކޮށްފައިވާ ގޮތުގެ ތަފާތު ވަރަށް ސާފުކޮށް ފެންނަން އެބައޮތެވެ. ބޭރުގެ އިންވެސްޓަރުންނަށް ރާއްޖޭގެ އެންމެ އަގުބޮޑު ޤުދުރަތީ ވަސީލަތްތައް ނުއަގުގައި ދިގު މުއްދަތަކަށް ދޫކޮށްލުމުގައި ކުރީގެ ވެރިކަންތަކުން ގެންގުޅުނު ސިޔާސަތުތަކާއި، މިއަދު ދިވެހި ރައްޔިތުންގެ ލާބަޔާއި މަންފާއަށްޓަކައި ސީދާ ރައްޔިތުންގެ ޙައްޤުގައި ހިންގޭ މަޝްރޫޢުތަކާ އަޅައިކިޔާއިރު ފެންނަނީ ދެބަސްވެވެން ނެތް ހިތި ޙަޤީޤަތްތަކެކެވެ.

މާލެ އަތޮޅުގައި އޮތް އެންމެ އަގުބޮޑު އެއް ޤުދުރަތީ ޚަޒާނާ ކަމުގައިވާ އެނބޫދޫ ފަޅު، ކުރީގެ ރައީސް ޢަބްދުﷲ ޔާމީންގެ ވެރިކަމުގައި ތައިލެންޑުގެ ސިންގާ އެސްޓޭޓް އާއި އެސް ހޮޓެލްސް އެންޑް ރިސޯޓްސްއާ ގުޅިގެން "ކްރޮސްރޯޑްސް މޯލްޑިވްސް" ގެ ނަމުގައި ތަރައްޤީކުރަން ދޫކޮށްލިއެވެ. މި މަޝްރޫޢަކީ ރާއްޖޭގެ ފުރަތަމަ މަލްޓި-އައިލެންޑް އިންޓަގްރޭޓެޑް ލެއިޜާ މަންޒިލް ކަމުގައި ބުނެ ކުލަޖެއްސި ނަމަވެސް، މި ފަޅު ދޫކޮށްލުމުގެ ފަހަތުގައި ހިނގައިދިޔަ ކަންކަމަކީ ޤައުމަށް ލިބުނު ބޮޑު ގެއްލުމެކެވެ. އެމްއެމްޕީއާރުސީގެ ބޮޑު ޚިޔާނާތުގެ ތެރެއިން އެތައް ސަތޭކަ މިލިއަން ޑޮލަރެއްގެ އަގުހުރި މި ފަޅު ފުރަތަމަ ވިއްކާލަން އުޅުނީ އެންމެ 3 މިލިއަން ޑޮލަރަށެވެ. އެއަށްފަހު، ޤާނޫނަށް ބަދަލުތައް ގެނެސް، 50 އަހަރަށްވުރެ ދިގު މުއްދަތަކަށް އަދި 99 އަހަރަށް ބަދަލުކުރެވޭ ގޮތަށް މި ފަޅު ބޭރު ކުންފުންޏަކަށް ދޫކޮށްލުމަކީ ދިވެހި ދައުލަތުގެ އަގުހުރި މިލްކިއްޔާތު ނުއަގުގައި ބޭރު ފަރާތްތަކަށް "ވިއްކާލުން" ފަދަ ޢަމަލެކެވެ.

އެ ދުވަސްވަރު ސަރުކާރުން ދެއްކީ އެނބޫދޫ ފަޅުން 1000 އަށްވުރެ ގިނަ ދިވެހިންނަށް ވަޒީފާ ލިބި، ދައުލަތަށް ބޮޑު އާމްދަނީއެއް ލިބޭނެ ކަމަށް ބުނެ ދަޅަ ދައްކާ ރައްޔިތުން ސްކޭމެއްގެ ތެރެއަށް ވައްޓާލިއެވެ. އެނބޫދޫ ފިނޮޅު ބޭރުގެ ކުންފުންޏަކަށް ދީގެން، އެ ފަޅުގެ ބަދަލުގައި އަޅަން ބުނި 10 ރިސޯޓް ކޮބައިތޯ މިއަދު ސުވާލު އުފައްދަން ޖެހެއެވެ. ޤައުމުގެ ފަޅުތަކާއި ރަށްތައް ވިއްކައި، ޤައުމުގެ ރައުސުލްމާލު ހިއްޕަވައިގެން ގެއަށް ވަޑައިގަތުމަކީ އޯކޭ ކަމަކަށް ވާންވީ ކީއްވެގެން ހެއްޔެވެ؟ ފުއްގިރި މައްސަލަ ފަދަ ކޮރަޕްޝަންގެ އެތައް މައްސަލައެއް ކޯޓުތަކުގައި ހިނގަމުންދާއިރު، އެ ފަދަ ބޭއިންސާފު ޢަމަލުތަކަށް އެއްޗެއް ބުނަން ނުކެރުނު މީހުން މިއަދު ފެންނަނީ މުޅިން އެހެން ސިފައެއްގައެވެ.

ރައްޔިތުންގެ ހައްގުތަކާއި އެންމެ ވަރުގަދައަށް ވާކާލާތު ކުރާ ކަމަށް ވެގަނެގެން އުޅުނު އެމްޑީޕީވެސް ފެންނަނީ ޔާމީނާއިއެކު އެއްތަށިން ކާ މަންޒަރެވެ. މި ކަމުންވެސް އެނގެނީ މި ވާހަކަތައް ދައްކާ މޮޅެތި ޗައްކަރުތައް ޖައްސަނީ ޤައުމަށް ހެޔޮ އެދިގެން ނޫން ކަމެވެ. ހަމައެކަނި ޖީބަށް ލެވޭ ފައިސާ ކޮޅަކަށާއި، ސިޔާސީ ބޭނުމަށާއި އަދި އަމިއްލަ އެދުމާއިގެން ކަމެވެ.

މިއާ މުޅިން ޚިލާފަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިސްކަންދެއްވަނީ ދިވެހި ރައްޔިތުންނަށް ދިމާވެފައިވާ އެންމެ ބޮޑު އިޖުތިމާޢީ ތަކުލީފު ކަމުގައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯއްދަވައިދެއްވުމަށެވެ. އެގޮތުން ފެށިގެންދިޔަ "ރަސްމާލެ" މަޝްރޫޢަކީ ދިވެހި އެތައް ހާސް އާއިލާއަކަށް ގެދޮރުވެރިކަން ކަށަވަރުކޮށްދިނުމަށް ރާއްޖޭގައި މިހާތަނަށް ފެށުނު އެންމެ އުންމީދީ އަދި ސީދާ ރައްޔިތު މީހާއަށް ފައިދާވާނެ ބިޔަ މަޝްރޫޢެކެވެ.

މި މަޢުޟޫގައި އިދިކޮޅު ފަރާތްތަކުން ޤައުމުގެ ހަރު މުދާ ވިއްކާލަން ގޮވާލައި އެފަދަ ވާހަކަތައް ދެއްކި ނަމަވެސް، އަދުގެ ސަރުކާރުން ޤައުމުގެ ހަރު މުދަލާއި ރައްޔިތުންގެ ޙައްޤުތައް ވިއްކާލާކަށް ދުވަހަކުވެސް ނޭދެއެވެ. މި ސަރުކާރުގެ އަޒުމަކީ ދިވެހިންގެ މިލްކިއްޔާތު ރައްކާތެރިކޮށް، ދިވެހި ފަސްގަނޑުގެ މަންފާ ސީދާ ދިވެހި ދަރިންނަށް ހޯދައިދިނުމެވެ.

އަމިއްލަ ޚަރަދުގައި ބްރިޖެއް އަޅާލުމުގެ މާލީ ތަނަވަސްކަން ނެތް ޤައުމެއްގައި، އެއްވެސް މަސައްކަތެއް ނުކޮށް ހަމައެކަނި ޖީބަށް ޑޮލަރު ބޮނޑި ޖަހައިގެން، ދުބާއީ އާއި ސިންގަޕޫރު ފެންވަރުގެ ސިޓީއެއް ބިނާކުރެވޭނެ ހެއްޔެވެ؟ ރައްޔިތުންނަށް ފުދުންތެރިކަން ލިބޭނެ އެއްވެސް ތަރައްޤީގެ ޕްރޮޖެކްޓެއް މި ޤައުމުގައި ހިންގިޔަ ނުދިނުމަށް އިދިކޮޅު ފަރާތްތަކުން މަސައްކަތް ކުރަމުންދާއިރު، ރައްޔިތުން ސިޔާސީ މީހުންގެ ދަޅަތަކަށް ސިކުނޑި ދޫކޮށްނުލައި ހޭލަން ވެއްޖެއެވެ.

އެނބޫދޫ ފަޅުފަދަ އަގުހުރި އެތައް ސަރަހައްދެއް ބޭރު ކުންފުނިތަކަށް 99 އަހަރަށް ނުއަގުގައި ދިނުން "ހަލާލު" ކަމެއްގެ ގޮތުގައި ދެކޭ ބަޔަކު، ރަސްމާލެއިން ދިވެހި ރައްޔިތުންނަށް ބޯހިޔާވަހިކަން ހޯދައިދިނުމުގެ މަޝްރޫޢު "ހަރާމް" ކޮށްގެން ފާޑުކިޔުމަކީ ދެކޮޅުޖެހޭ ވާހަކައެއް ނޫނެވެ. ރައީސް ޑރ. މުޢިއްޒުގެ ސަރުކާރުން ރައްޔިތުންގެ ޙައްޤުތައް އިސްކޮށް، ދިވެހިންގެ ބިމުން އެންމެ ފުރަތަމަ މަންފާ ލިބެންޖެހޭނީ ހަމަ ދިވެހި ރައްޔިތުންނަށް ކަން ސާބިތުކޮށްދެއްވައި ފަށްޓަވާފައިވަނީ ޤައުމީ ތަރައްޤީގެ އައު ބާބެކެވެ. މިއީ މާޒީގެ ކަޅު އަނދިރި ޚިޔާނާތްތަކުން އަރައިގަނެ، ދިވެހި އުންމަތަށް އުފާވެރި މާދަމާއެއް ހޯދައިދިނުމަށް އެޅުނު އެންމެ ސާބިތު ފިޔަވަޅެވެ.